ޕާކިސްތާނުގެ ޗީފް އޮފް ޑިފެންސް ފޯސް، އާސިމް މުނީރުއާ ބައްދަލުކުރައްވައި، ރާއްޖެ އާއި ޕާކިސްތާނާ ދެމެދު އޮންނަ އަސްކަރީ ގުޅުން އިތުރަށް ބަދަހިކުރުމަށް ރައީސް މުއިއްޒު މަޝްވަރާކުރައްވައިފި އެވެ.
ޕާކިސްތާނުގެ ޗީފް އޮފް އާމީ ސްޓާފްގެ މަގާމުގައި ވެސް ހުންނެވި، އެ ގައުމުގެ އެންމެ އިސް މިލިޓަރީ ކޮމާންޑަރު، އާސިމް އާއެކު މުއިއްޒު މިއަދު ކުރިއަށް ގެންދެވި ބައްދަލުވުމުގެ ތެރެއިން، ސަރަހައްދީ ހަމަޖެހުން ގާއިމުކުރުމުގައި ދެ ގައުމުގެ އަސްކަރީ ގުޅުން އިތުރަށް ބަދަހިކުރުމުގެ މުހިންމުކަމާ ގުޅޭގޮތުން މަޝްވަރާކުރި ކަމަށް އެ ގައުމުގެ ނޫސްތަކުން ރިޕޯޓުކޮށްފައިވެ އެވެ.
އެގޮތުން، އަސްކަރީގޮތުން ތަމްރީނުވުމަށް ދެ ގައުމުގެ ދެމެދުގައި ޕްރޮފެޝަނަލް އެހީތެރިކަން ބަދަލުކުރުމާ ގުޅޭގޮތުން މަޝްވަރާކުރި ކަމަށް އެ ނޫސްތަކުން ރިޕޯޓުކޮށްފައިވެ އެވެ.
އެ ބައްދަލުވުމުގައި މުއިއްޒު ވަނީ ޕާކިސްތާނު އަސްކަރިއްޔާގެ ފަންނީ ގާބިލުކަމާއި މި ސަރަހައްދުގެ ސުލްހަ މަސަލަސްކަމާއި ހަމަޖެހުން ގާޢިމުކުރުމަށް އެ ގައުމުން ކުރަމުންދާ މަސައްކަތުގެ އަގުވަޒަންކުރައްވާ ކަމަށް ވިދާޅުވެފަ އެވެ. އަދި، ޕާކިސްތާނު އަސްކަރިއްޔާގެ ގާބިލުކަމާއި ސަރަހައްދީ ކަންކަމުގައި އެ ގައުމުން އަދާކުރާ ދައުރަށް އިތުބާރު އެބަ އޮތް ކަމަށް މުއިއްޒު ވިދާޅުވި އެވެ.
ރަސްމީ ދަތުރެއްގައި މުއިއްޒު ޕާކިސްތާނަށް ވަޑައިގެންނެވީ މިދިޔަ އަންގާރަ ދުވަހު އެވެ. އެމަނިކުފާނަކީ ފާއިތުވި 10 އަހަރު ތެރޭގައި ޕާކިސްތާނަށް ވަޑައިގެންނެވި ރާއްޖޭގެ ފުރަތަމަ ރައީސް އެވެ.
އެ ގައުމަށް ކުރައްވާ ދަތުރުގެ ތެރެއިން، އިއްޔެ ވަނީ ޕާކިސްތާނާއެކު މުހިންމު 20 އެއްބަސްވުމެއްގައި ސޮއިކޮށްފަ އެވެ.
ޕާކިސްތާނާއެކު މިއަދު ސޮއި ކުރި އެއްބަސްވުންތައް
- ޓެކްނޮލޮޖީ، ސައިބާ ސެކިއުރިޓީ، އޭއައި، ގެ ދާއިރާއިން އެއްބާރުލުން ދިނުމަށް
- މަސްތުވާތަކެއްޗާ ދެކޮޅަށް މަސައްކަތް ކުރުމަށް
- އިޖްތިމާއީ ރައްކާތެރިކަމާ ގުޅޭ
- ސިއްހީ ދާއިރާއިން އެއްބާރުލުން ދިނުމަށް އަދި އެފްޑީއޭއަށް އެހީތެރިވުމަށް
- ޕާކިސްތާނުން ސިއްހީ ހިދުމަތްތެރިން ހޯދުމަށް
- އަސްކަރީ ގޮތުން ދެ ގައުމުން އެއްބާރުލުން ދިނުމަށް
- މެރިޓައިމް ސެކިއުރިޓި ކޯޕަރޭޝަންގެ ދާއިރާއިން އެއްބާރުލުން ދިނުމަށް
- ދަނޑުވެރިކަމުގެ ދާއިރާއިން އެއްބާރުލުން ދިނުމަށް
- މަސްވެރިކަމުގެ ދާއިރާއިން އެއްބާރުލުން ދިނުމަށް
- ޓެކްނިކަލް އަދި ވޮކޭޝަނަލް ޓްރެއިނިން ދިނުމަށް
- ތައުލީމީ ދާއިރާއިން އެއްބާރުލުން ދިނުމަށް
- ޔޫތު އެންޑް ސްޕޯޓްސް ޑިވެލޮޕްމަންޓުގެ ދާއިރާއިން އެއްބާރުލުން ދިނުމަށް
- ދެ ގައުމުގެ ދެމެދުގައި ކުރާ ވައިގެ ދަތުރުފަތުރު އިތުރު ކުރަން
- ފަތުރުވެރިކަމުގެ ދާއިރާއިން ގުޅުން ބަދަހި ކުރަން
- އާޓްސް، ކަލްޗާ އަދި ހެރިޓޭޖުގެ ދާއިރާއިން ގުޅުން ބަދަހި ކުރަން
- ދެ ގައުމުގެ ޕޮލިސް އެކަޑަމީއިން ސޮއި ކުރި އެމްއޯޔޫ
- ދެ ގައުމުގެ ސިވިލް ސާވިސް ކޮމިޝަނުގެ މެދުގައި ސޮއި ކުރި އެމްއޯޔޫ
- ސިވިލް ސާވިސް ކޮމިޝަނާއި ޕާކިސްތާނުގެ ފެޑެރަލް ޕަބްލިކް ސާވިސް ކޮމިޝަނާ ދެމެދު ސޮއި ކުރި އެމްއޯޔޫ
- ދަނޑުވެރިކަމުން އުފައްދާ ތަކެތީގެ ވިޔަފާރި ކުރން އެސްޓީއޯ އާއީ ޓްރޭޑިން ކޯޕަރޭޝަން ޕާކިސްތާނާ ދެމެދު ސޮއި ކުރި އެމްއޯޔޫ
- ތިމާވެށީގެ ދާއިރާއިން ގުޅުން ބަދަހި ކުރަން
ރައީސް މުއިއްޒު ވެރިކަމަށް އައީ "އިންޑިއާ އައުޓް" އެޖެންޑާއަކާއެކު އެވެ. އިންޑިއާއާ ދުރަށް ޖެހުމުގެ މަގުޗާޓެއް ވެސް ވެރިކަމަށް ވަޑައިގަތުމަށްފަހު އެމަނިކުފާނު އިއުލާނު ކުރެއްވި އެވެ. ނަމަވެސް މާލީ ގޮތުން ދަތިވުމުން ރައީސް މުއިއްޒު ވަނީ އިންޑިއާއާއެކު އޮތް ގުޅުން ރަނގަޅު ކުރަން މަސައްކަތް ކުރައްވާފަ އެވެ.
އޭގެ ފަހުން އޮކްޓޯބަރު، 2024، ގައި މުއިއްޒު އިންޑިއާއަށް ވަޑައިގެން ބޮޑުވަޒީރު މޯދީއާ ބައްދަލު ކުރެއްވި އެވެ. އަދި ރާއްޖެ އާއި އިންޑިއާގެ ގުޅުން ކުރިއަށްގެންދާނެ ގޮތުގެ އެއްބަސްވުމެއްގައި ދެ ގައުމުން ސޮއި ކުރި އެވެ.
ޕާކިސްތާނާއެކު 20 އެމްއޯޔޫއެއްގައި ދިވެހި ސަރުކާރުން މިއަދު ސޮއިކުރިއިރު، އިންޑިއާ ސަރުކާރުން ވަނީ ރާއްޖެއިން ދައްކަންޖެހޭ 30 ބިލިއަން ރުޕީސްގެ ކަރަންސީ ސްވޮޕެއް ރޯލްއޯވާ ކޮށްދީފަ އެވެ. އަދި އެއީ އިންޑިއާ އަތުން ކުރިން ނެގި ކަރަންސީ ސްވޮޕު ދެއްކި ދުވަހު ދިން ސްވޮޕެކެވެ.
