ޕެރިސް (ޖުލައި 29) - އެމެރިކާ، މެކްސިކޯ އަދި ކެނަޑާގައި މި ފަހަރު ބޭއްވި ފީފާ ވޯލްޑް ކަޕް ފުޓްބޯޅަ މުބާރާތުގައި ޖެހި އެންމެ މޮޅު ގޯލަކަށް ކޭޕް ވާޑުގެ ފުލްބެކް، ސިޑްނީ ލޯޕޭސް ކަބްރާލް ޖެހި ގޯލު ހޮވިއްޖެ އެވެ.
މި ފަހަރުގެ ވޯލްޑް ކަޕްގައި ޖުމްލަ އެކު، 104 މެޗު ކުޅުުނުއިރު، 308 ގޯލު ފެނިގެންގޮސްފައިވެ އެވެ. އޭގެ ތެރެއިން، ހޮވި އެންމެ މޮޅު ގޯލަކީ، ގަދަ 32 ޓީމު ވާދަކުރި ބުރުގައި، އާޖެންޓީނާ ކޮޅަށް، އުމުރުން 22 އަހަރުގެ ލޯޕޭސް ކަބްރާލް ޖެހި ގޯލެވެ.
އާޖެންޓީނާ އިން އިތުރު ވަގުތުގެ ދެ ހާފު ކުޅެގެން ކޭޕް ވާޑް އަތުން 3-2 އިން މޮޅުވި މި މެޗުގައި، ލޯޕޭސް ކަބްރާލް ގޯލު ޖެހީ. މެޗުގައި ދެ ވަނަ ފަހަރަށް ކޭޕް ވާޑަށް އެއްވަރުކޮށްދޭށެވެ. އަރިމަތިން ލިބުނު ފުރުސަތެއްގައި ހުސް ޖާގައެއް ހޯދާލުމަށް ފަހު، ލޯޕޭސް ކަބްރާލް ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އެ ބޯޅަ ގޯލުގެ ކަނަށް ވަނީ އާޖެންޓީނާގެ ކީޕަރު، އެމިލިއާނޯ މާޓީނޭޒް އަތް މަތިން ގޮހެވެ.
މި މެޗުގައި ކޭޕް ވާޑުން ދެ ގޯލު ޖަހައިގެން ތާރީހުން ޖާގަ އެއް ވެސް ހޯދި އެވެ. އެ ގޮތުން، ކޭޕް ވާޑަކީ، ވޯލްޑް ކަޕްގެ ނޮކައުޓް މެޗެއްގައި މުބާރާތުގެ އެންމެ ފަހުގެ ޗެމްޕިއަން ކޮޅަށް ދެ ގޯލު ޖެހި އެފްރިކާގެ ފުރަތަމަ ޓީމެވެ. އެ މެޗުގައި ކޭޕް ވާޑުގެ ދެ ވަނަ ލަނޑު ޖެހީ ވެސް ލޯޕޭސް ކަބްރާލް އެވެ.
ޕޯޗުގަލްގެ ބެންފީކާ އަށް ކުޅެމުން އައި ލޯޕޭސް ކަބްރާލް ވަނީ މި ފަހަރުގެ ޓްރާންސްފާގައި، 15 މިލިއަން ޑޮލަރަށް ތުރުކީގެ ޓްރަބްޒޯންސްޕޯ އަށް ބަދަލުވެފަ އެވެ.
މުޅިން އަލަށް ވޯލްޑް ކަޕްގައި ކުޅުނު ކޭޕް ވާޑުން، މުބާާރާތުގެ ގްރޫޕް ސްޓޭޖުގައި ކުޅުނު ތިން މެޗުން ވެސް ވީ އެއްވަރެވެ. އެ ގޮތުން، ފުރަތަަަމަ މެޗުގައި ވަނީ، މި ފަހަރު ވޯލްޑް ކަޕް ކާމިޔާބުކުރި ސްޕެއިނާ ލަނޑެއް ނުޖެހި އެއްވަރުވެފަ އެވެ. އޭގެ ފަހުން، ވޯލްޑް ކަޕްގެ ޗެމްޕިއަންކަން ކުރިން ހޯދާފައިވާ އުރުގުއޭ އާއި އޭޝިއާ ފުޓްބޯޅައިގެ ވަރުގަދަ ނަމެއް ކަމަށްވާ ސައުދީ އަރަބިއްޔާއާ ވެސް އެއްވަރުވި އެވެ.
