އިދިކޮޅު އެމްޑީޕީގެ މެންބަރުންނަށް ރައްޔިތުންގެ މަޖިލީހުގައި ކޮޅަށް ތެދުވެވެނީ ވެސް ވެރިކަންކުރާ ޕީއެންސީން އެކަމަށް ފުރުސަތު ދޭތީ ކަމަށާއި އެ ބޭފުޅުން ބޭނުންވާ ގޮތަށް ކަންކަން ނުކުރައްވާނަމަ، ކުރިއަށް އޮތް ތަނުގައި އެ ފުރުސަތު ވެސް ނުދޭނެ ކަމަށް ޕީއެންސީގެ ޕީޖީ ލީޑަރު، އިބްރާހިމް ފަލާހު ވިދާޅުވެއްޖެ އެވެ.
މަޖިލީހުގައި މިއަދު ވާހަކަދައްކަވަމުން ފަލާހު ވިދާޅުވީ އެ މަޖިލީހުގައި ޕީއެންސީގެ 73 މެންބަރުން ތިއްބެވި ކަމަށާއި އެމްޑީޕީއަށް ނިސްބަތްވެވަޑައިގަންނަވާ ތިބީ އެންމެ 11 ވަރަކަށް މެންބަރުން ކަމަށެވެ. އަދި، އެ ބޭފުޅުންނަށް މަޖިލީހުގައި އުޅެވެނީ ޕީއެންސީން އެ ފުރުސަތު ދީފައި އޮތުމުން ކަމަށް ފަލާހު ވިދާޅުވި އެވެ.
"ވަރަށް ހިތާމަޔާ އެކީގައި ދަންނަވަން ބޭނުންވަނީ އެމްޑީޕީގެ މިތަނުގައި ތިބި މެންބަރުންނަށް މި ބޭފުޅުން އަޅުގަނޑުމެން ވަރަށް ގާތްކޮށް މި ގެންގުޅެނީ މި ތަނުން ދެވެން ހުރި ހުރިހާ ފުރުސަތެއް، 70 މެންބަރުން، 73 މެންބަރުންގެ ތެރޭގައި 11 ވަރަކަށް ބޭފުޅުން އުޅޭއިރުގައި އިއްޒަތްތެރި ރައީސް ބައްލަވާ ކިހައި ބަލައިގެން އުޅެވޭތީތޯ މި ބޭފުޅުންނާ އެކީގައި މި އުޅެވެނީ،" ފަލާހު ވިދާޅުވި އެވެ.
"އެކަމަކު މި ބޭފުޅުންނެއް ބަލައިލަނީކީ ނޫން، ހަމަ ހިތަށް އެރިހާ އެއްޗެއް ގޮވަނީ، ހިތަށް އެރިހާ ވާހަކައެއް މި ތަނުގައި ދައްކަނީ. ހަގީގަތުގައި އަޅުގަނޑުމެން ފުރުސަތު ނުދޭނަމަ، މި ބޭފުޅުންނަށް ނުވެސް ތެދުވެވޭނެ."
ފަލާހު އެހެން ވިދާޅުވީ ރަސްމާލެ މަޝްރޫއުއާ ގުޅޭގޮތުން، އެމްޑީޕީގެ މެންބަރުން ކަންބޮޑުވުން ފާޅުކުރައްވާތީ އެވެ. އޭނާ ވިދާޅުވީ މަޖިލީހުގައި ތިއްބެވި އެމްޑީޕީގެ މެންބަރުންނަށް ހަގީގަތުގައި ރަސްމާލެ މަޝްރޫއުއާ ގުޅޭގޮތުން ކަންބޮޑުވުން ފާޅުކޮށް މަޖިލީހަށް ގަރާރު ނުވެސް ހުށަހެޅުއްވޭނެ ކަމަށެވެ. ސަބަބެއްގެ ގޮތުގައި އޭނާ ވިދާޅުވީ އެމްޑީޕީގެ ޗެއާޕާސަން، މުހައްމަދު ނަޝީދު އެ މަޝްރޫއުއަށް ތާއީދުކުރައްވާފައިވާ ކަމަށެވެ.
އޭގެ އިތުރުން، ރައްޔިތުންގެ މަޖިލީހަށް ހުށަހަޅާ ގަރާރުތަކަށް ބަހުސް ކުރުމުގެ ކުރިން ވޯޓަށް އަހަންޖެހޭ ގޮތަށް މަޖިލީހުގެ ގަވާއިދު އިސްލާހުކުރުން ދިފާއުކުރައްވައި ވެސް ފަލާހު ވާހަކަދެއްކެވި އެވެ. އޭނާ ވިދާޅުވީ އެގޮތަށް މަޖިލީހުގެ ގަވާއިދު އިސްލާހުކުރަން ޖެހެނީ އެމްޑީޕީން ކޮންމެ ކަމަކާ ގުޅިގެން މަޖިލީހަށް ގަރާރު ހުށަހަޅުއްވާތީ ކަމަށެވެ.
ރަސްމާލެ މަޝްރޫއުއާ ގުޅޭގޮތުން އެންމެ ބޮޑަށް ކަންބޮޑުވުން ފާޅުކުރައްވާ، ކުރީގެ ރައީސް ޔާމީންގެ އެކައުންޓުތަކުގައި ހުރި ފައިސާގެ އަދަދު ވިދާޅުވުމަށްފަހު ފަލާހު ވިދާޅުވީ އެ ފަދަ ބޭފުޅުންގެ މައްސަލަތައް ގަރާރުގެ ގޮތުގައި އެމްޑީޕީން މަޖިލީހަށް ހުށަހަޅާ ނަމަ، އެ ކަމަށް ފުރުސަތު ދެއްވާނެ ކަމަށެވެ.
"މި ކިޔަނީ ވެރިކަންކުރި ވެރިއެއްގެ އެކައުންޓުގައި، އެންމެ ބޭންކު އެކައުންޓެއްގައި ހުރި ވާހަކަ. 457 މިލިއަން ދިވެހި ރުފިޔާ، ގައިމު ދައުލަތުގެ ބަޖެޓަށް އެ ވައްދައިދީފިއްޔާ ލުޔެއް ލިބޭނެއެއްނު؟ ދެން ސިންގަޕޫރުގެ ކޮންމެވެސް އެކައުންޓެއްގައި 700 މިލިއަން ޑޮލަރު ހުރި ވާހަކަ،" ފަލާހު ވިދާޅުވި އެވެ.
"މި ވާހަކަދައްކައިގެން ނޫންތީ ގަރާރު ހުށަހަޅަންވީ. އޭރުން އަޅުގަނޑުމެން ފުރުސަތު ދޭނަން މި ތަނުގައި ވޯޓު ދީގެން ގަރާރަށް ބަހުސްކުރަން ވެސް، އެހެން ނޫނީ ދެން ކުރިއަށް އޮތް ތަނުގައި ފުރުސަތެއް ނުލިބޭނެ އިއްޒަތްތެރި ރައީސް،" ފަލާހު ވިދާޅުވި އެވެ.
ރައްޔިތުންގެ މަޖިލީހަށް އެކި ކަންކަމާ ގުޅޭގޮތުން ހުށަހަޅާ ގަރާރުތަކަށް ބަހުސް ކުރުމުގެ ކުރިން ވޯޓަށް އަހަންޖެހޭ ގޮތަށް މަޖިލީހުގެ ގަވާއިދަށް އިސްލާހެއް ހުށަހެޅުއްވީ ޕީއެންސީއާއެކު މަސައްކަތް ކުރައްވާ އަމިއްލަ މެންބަރު، އަބްދުލްހަންނާނު އަބޫބަކުރު އެވެ.
އޭނާ ހުށަހެޅުއްވި އިސްލާހުގައި ބުނެފައި ވަނީ މަޖިލީހަށް ހުށަހަޅާ ގަރާރު ބަލައިގަންނަން ވޯޓަށް އަހާނީ ގަރާރުގެ އިބްތިދާއީ ބަހުސް ފެށުމުގެ ކުރިން ކަމަށެވެ. އަދި، އެގޮތަށް ވޯޓަށް އަހާއިރު، ފާސްނުވެއްޖެ ނަމަ، ގަރާރު ބާތިލުވާނެ ކަމަށް ވެސް އެ އިސްލާހުގައި ބުނެފައިވެ އެވެ.
މަޖިލީހުގެ ގަވާއިދުގެ ދަށުން މަޖިލީހަށް މިހާރު ގަރާރެއް ހުށަހަޅައިފި ނަމަ، ގަރާރު ބަލައިގަތުމާމެދު ވޯޓެއް ނަގަނީ އެ ގަރާރަކަށް ބަހުސްކުރުމަށްފަހު، އެވެ. މަޖިލީހަށް ގަރާރު ހުށަހެޅުމުގެ ފުރުސަތު ކޮންމެ މެންބަރަކަށް ވެސް މަޖިލީހުގެ ގަވާއިދުގައި ދީފައި އޮންނަނީ ތަފާތު އެކި މައްސަލަތައް މަޖިލިސް މެންބަރުންގެ ސަމާލުކަމަށް ގެނައުމުގެ ގޮތުންނެވެ.
ނަމަވެސް، މަޖިލީހަށް މިހާރު ހުށަހަޅާފައިވާ އިސްލާހު ފާސްކޮށްފި ނަމަ، މަޖިލީހަށް ގަރާރު ހުށަހަޅައި ބަހުސް ކުރުމަށް އޮންނަ ފުރުސަތު ހަނިވެގެންދާނެ އެވެ.
