ގާނޫނުއަސާސީގެ ފޮނިމީރުކަން ހަމައެކަނި ލިބެނީ އެއިރަކު ހުންނަވާ ރައީސުލްޖުމްހޫރިއްޔާއަކަށް އެކަނި ކަމަށް ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.
އަދަދު ނޫހުން ގެނެސްދޭ އެތެރެފުށް ޕްރޮގްރާމުގައި އަލީ ހުސައިން ވިދާޅުވީ ގާނޫނުއަސާސީގެ ފޮނިމީރުކަމާއި އިންސާފު ވެސް ލިބެނީ އެއިރެއްގައި ހުންނަ ރައީސުލްޖުމްހޫރިއްޔާއަކަށް ކަމަށާއި ކުންފުނިތަކާއި ހުރިހާ ރަށްތަކާއި ފަޅުތަކުގެ އިތުރުން ދައުލަތުގެ ފައިސާއަކީ ވެސް ރައީސުލްޖުމްހޫރިއްޔާގެ އެއްޗަކަށް ވެފައިވާ ކަމަށެވެ.
"މި ގާނޫނުއަސާސީގެ ފޮނިމީރުކަން ލިބެނީ އެއިރެއްގައި ރައީސުލްޖުމްހޫރިއްޔާގެ މަގާމުގައި ހުންނަ މީހާއަށް އެކަނި. އަދި އިންސާފުވެސް ލިބޭނީ އެއިރެއްގައި ރައީސުލްޖުމްހޫރިއްޔާއަކަށް ހުންނަ މީހާއަށް އެކަނި. އިތުރު އެއްވެސް މީހަކަށް ނުލިބޭނެ،" އަލީ ހުސައިން ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި މިއަދު ދިވެހިރާއްޖޭގައި ހުރި ހުރިހާ ދައުލަތުގެ ކުންފުނިތަކަށް ވެސް އަޅުގަނޑު ކިޔާކަށް ބޭނުމެއް ނޫން ދައުލަތުގެ ކުންފުންޏޭ. އެއީ ރައީސުލްޖުމްހޫރިއްޔާގެ ކުންފުނި. ރައީސުލްޖުމްހޫރިއްޔާގެ މުދާ. ރައީސުލްޖުމްހޫރިއްޔާގެ ފަޅު ރަށް. ރައީސުލްޖުމްހޫރިއްޔާގެ ރަށްތައް. ރައީސުލްޖުމްހޫރިއްޔާގެ އަނެއްކާ ދިވެހި ރާއްޖޭގެ ހުރިހާ ފައިސާއަކީ ވެސް. ބޭނުން މީހަކަށް ބޭނުން އަދަދެއް ދޭންވީ. ކުރެވޭނީ އެއް ކަމެއް ވެސް ނެތް."
ގާނޫނުއަސާސީ ފަރުމާކޮށްފައި އޮތް ގޮތުން ރައީސުލްޖުމްހޫރިއްޔާ ހިތުހުރި ގޮތަކަށް އަމަލުކުރުމުގެ ފުރުސަތު ފަހިވެފައިވާކަން ފާހަގަކުރައްވައި އަލީ ހުސައިން ވިދާޅުވީ އެކަމުގެ ބޭނުން ހިފައި މަޖިލީހާއި، މިނިވަން މުއައްސަސާތަކާއި އަދި ޖުޑިޝަރީގެ ކޮންޓްރޯލް ވެސް ނަގާ ކަމަށެވެ.
"މިހާރުގެ ފެހި ގާނޫނުއަސާސީގައި ވެރިކަމަކީ ސަބީލިއްލާހި ހަމަ އެމީހަކު ހިތުހުރިގޮތަކަށް ރައީސުލްޖުމްހޫރިއްޔާއަށް ވެދުމަށް އަރުވާ އެއްޗެއް ގޮތުގައި މުޅި ގާނޫނުއަސާސީ ފަރުމާކޮށްފައި މިއޮތީ. އެއީ ގާނޫނުއަސާސީ ފަރުމާކޮށްފައި އޮތްގޮތުން ރައީސުލްޖުމްހޫރިއްޔާއަށް މުޅި ރައްޔިތުންގެ މަޖިލީހުގެ ކޮންޓްރޯލް އެބަ ނެގޭ. ހުރިހާ މިނިވަން މުއައްސަސާއެއްގެ ކޮންޓްރޯލް އެބަ ނެގޭ،" އަލީ ހުސައިން ވިދާޅުވި އެވެ.
"މުޅި ޖުޑީޝަރީގެ ކޮންޓްރޯލް އެބަ ނެގޭ. ބޭނުން އަދަދަކަށް ކުންފުނި ހިންގޭ. ބޭނުން އަދަދަކަށް ފަޅުރަށް ކުއްޔަށް އެބަދެވޭ. ބޭނުން އަދަދަކަށް ފަރުތައް ކުއްޔަށް އެބަ ލިބޭ. ބޭނުން ފަރެއް އެބަ ހިއްކޭ. އެހެންވީމަ ރައީސުލްޖުމްހޫރިއްޔާއަށް ވެދުމަކަށް ރައީސުލްޖުމްހޫރިއްޔާއަށް ހިތަކަށް ގައުމު ލިބޭ ގޮތަށް ހަދާފައި އޮތް ގާނޫނުއަސާސީއެއް މިއީ."
އަލީ ހުސައިން ވިދާޅުވީ ރައީސުލްޖުމްހޫރިއްޔާއަށް ދީފައިވާ ބާރުތައް ކުޑަކޮށް، ގާނޫނުއަސާސީއަށް ގިނަ އިސްލާހުތަކެއް ގެންނަން ޖެހޭ ކަމަށެވެ. އެގޮތުން ރައީސުލްޖުމްހޫރިއްޔާއަށް ވައްކަން ނުކުރެވޭ ގޮތަށް ގާނޫނުއަސާސީ އިސްލާހުކުރަން ޖެހޭ ކަމަށް އޭނާ ވިދާޅުވި އެވެ.
އޭނާ ވިދާޅުވީ މިނިވަން މުއައްސަސާތަކާއި މަތީ ކޯޓުތަކުގެ ފަނޑިޔާރުން ރައްޔިތުންގެ ވޯޓުން އައްޔަން ކުރެވޭ ގޮތަށްވެސް ހަދައި، އޭގެ ތެރޭގައި ޕްރޮސެކިއުޓާ ޖެނެރަލް އާއި ކޮމިޝަނާ އޮފް ޕޮލިސްފަދަ ބޭފުޅުންވެސް ހިމަނަން ޖެހޭ ކަމަށެވެ.
