އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒު ޖަމާލް އަބޫބަކުރު މިއަދު ރަސްމީކޮށް އައްޔަން ކުރައްވައިފި އެވެ.
އެ ރަސްމިއްޔާތު ބާއްވާފައި ވަނީ މިއަދު ރައީސް އޮފީހުގަ އެވެ. އޭނާއަކީ މައުލޫމާތު ހޯދުމާއި ލިބިގަތުމުގެ ގާނޫނު 2014 ވަނަ އަހަރު ވުޖޫދުވި ފަހުން އަލަށް ކޮމިޝަނަރުގެ މަގާމަށް އައްޔަން ކުރި ބޭފުޅާ އެވެ.
އިންފޮމޭޝަން ކޮމިޝަނަރުގެ މަގާމަށް ޖަމާލް އައްޔަން ކުރައްވާފައި މި ވަނީ މަދަނީ ޖަމިއްޔާތަކުންނާއި ހައްގުތަކަށް މަސައްކަތް ކުރާ ފަރާތްތަކުން އެކަމާ ކަންބޮޑުވުން ފާޅުކޮށްފައި ވަނިކޮށެވެ.
އަބްދުލްއަޒީޒްގެ ދައުރުގައި ކުރިއަށް ގެންދިޔަ އާރްޓީއައި އެސެސްމަންޓް ހޯދުންތަކަށް ބަލާއިރު ހުށަހެޅުނު މައްސަލަތަކުގެ 53 ޕަސަންޓު މައްސަލަ އޭނާ ވަނީ ބޭރުކޮށްލައިފަ އެވެ. އަދި ހުށަހެޅި މައްސަލަތަކުގެ ތެރެއިން 16 ޕަސެންޓު މައްސަލައަށް އެއްވެސް ޖަވާބެއް ނުދެ އެވެ.
"މަހޯލި" ފޯމުތައް މެދުވެރިކޮށް މައުލޫމާތު ބޭނުންވާ ސަބަބު ލިޔަން މަޖުބޫރުކުރުވުމުން ދައުލަތުގެ އިދާރާތަކަށް މައުލޫމާތު ހިފެހެއްޓުމުގެ ފުރުސަތު ވެސް އޭނާގެ ދައުރުގައި ފަހިވެގެންދިޔަ އެވެ.
އާރުޓީއައި ގާނޫނުގައި އިންފޮމޭޝަން ކޮމިޝަނަރުގެ މަގާމުގެ މުއްދަތު ބަޔާންކުރާ މާއްދާގައި އޮންނަނީ އެ މަގާމަށް އައްޔަންކުރާ މީހެއްގެ ދައުރަކީ ފަސް އަހަރު ދުވަސް ކަމަށެވެ. އަދި، ދައުރު 10 އަހަރަށް އިތުރުކުރެވެނީ އެ މަގާމުގައި ހުރި މީހެއްގެ މަގާމުގައި އިތުރު ދައުރެއް ބަހައްޓަން ރައްޔިތުންގެ މަޖިލީހުން ފާސްކުރުމުން ކަމަށް ވެސް ގާނޫނުގައި އޮވެ އެވެ.
ގާނޫނުގައި މިހެން އޮތުމުން އަބްދުލްއަޒީޒަށް އިތުރު ދައުރަކަށް ނާދެވޭނެ ކަމަށް ގަބޫލުކުރާ މީހުން ބުނަނީ، އޭނާ ކުރިން އެ މަގާމުގައި އެއް ދައުރު ފުރިހަމަކުރައްވާފައިވާތީ އިތުރު ދައުރަކަށް ނާދެވޭނެ ކަމަށެވެ.
މި މައްސަލައިގައި އަދަދު ނޫހުން ވާހަކަ ދެއްކި ގާނޫނީ މާހިރުން ވެސް ބުނީ ގާނޫނުގެ އެ މާއްދާގެ އިބާރާތް އޮތް ގޮތުން މާނަކުރެވެނީ އިތުރު ދައުރެއް ނުދެވޭނެ ގޮތަށް ކަަމަށެވެ.
މި ސަރުކާރުގެ ސްޓޭޓް މިނިސްޓަރަކަށް ހުންނެވި ބޭފުޅަކު މިފަދަ މަގާމަކަށް އައްޔަނުކުރާއިރު ރައީސް އޮފީހާއި ބައެއް ވުޒާރާތަކާއި ބައެއް އިދާރާތަކުގެ އިތުރުން ދައުލަތުގެ ކުންފުނިތަކުން މައުލޫމާތު ހާމަަނުކުރާ މައްސަލަ ވަރަށް ބޮޑެވެ.
