ރަސްމާލެ މަޝްރޫއުގެ ދަށުން ހިއްކާ ބިން ބޭރުގެ ކުންފުންޏަކަށް ދިނުމާ ދެކޮޅަށް ދިވެހިންގެ ބިން ދިވެހިންނަށް ނަމުގައި ގައުމީ ހަރަކާތެއް ރަސްމީކޮށް ފަށައިފި އެވެ.
މި ހަރަކާތް އިފްތިތާހު ކޮށްދެއްވަމުން ކުރީގެ ހޯމް މިނިސްޓަރު އިމްރާނު އަބްދުﷲ ވިދާޅުވީ މިއީ ރަސްމާލެ ވިއްކާލުމާ ދެކޮޅަށް ރާއްޖޭގެ އެކި ސަރަހައްދުތަކުން އުފެދެމުން އައި ވަކިވަކި އަޑުތައް އެއްކޮށްލައިގެން ފެށި ވަރުގަދަ މަސައްކަތެއް ކަމަށެވެ. ސަރުކާރުން އީގަލް ހިލްސް ކުންފުންޏަށް ބިން ދޫކޮށްލަން ނިންމި ނިންމުން ބާތިލު ކުރަންދެން މި ހަރަކާތް ކުރިއަށް ގެންދާނެ ކަމަށް އޭނާ ވިދާޅުވި އެވެ.
މި ހަރަކާތް ފަށަން ޖެހުނު ސަބަބު ތަފުސީލުކޮށްދެއްވަމުން އިމްރާނު ވިދާޅުވީ ރައީސް މުއިއްޒު ވެރިކަމަށް ވަޑައިގަތުމަށް ވެވަޑައިގެންނެވި ވައުދުތަކުގެ މިސްރާބު ބަދަލުވެ މިއަދު ފެންނަނީ ރައްޔިތުންނަށް އޮޅުވާލައި ބޮޑު ސްކޭމެއް ހިންގަމުންދާ ތަން ކަމަށެވެ. ދިވެހި ރައްޔިތުންގެ ފައިސާއިން 500 މިލިއަނަށް ވުރެ ގިނަ ޑޮލަރު ހޭދަކޮށްގެން ހިއްކާ ބިމުގެ ތެރެއިން 500 ހެކްޓަރުގެ ބިން މާލެއާ ކައިރިން ބޭރު ބަޔަކަށް ދޫކޮށްލުމަކީ ގަބޫލުކުރެވޭނެ ކަމެއް ނޫން ކަމަށް އޭނާ ވިދާޅުވި އެވެ.
އިމްރާން ވިދާޅުވީ މިއީ ހަމައެކަނި ސިޔާސީ ކަމެއް ނޫން ކަމަށާއި މިއީ ދިވެހިންގެ ބާރުވެރިކަން ނަގާލައި ޒަޔަނިސްޓުންގެ އަތްމައްޗަށް ރާއްޖޭގެ ބިންތައް ދޫކޮށްލުމަށް ހިންގާ ނުރައްކާތެރި ޖަރީމާއެއް ކަމަށް އިމްރާނު ތުހުމަތު ކުރެއްވި އެވެ.
"މިއަދު ދިވެހިންގެ ބޮޑު އަގުލަބިއްޔަތެއް ގަބޫލުކުރަނީ މި މަޝްރޫއަކީ ދުރާލާ ރާލައިގެން ދިވެހިންގެ ބާރު ދިވެހިރާއްޖޭގެ ރަށްވެހިންގެ އަތުން ނަގާ ޒައިނިސްޓުންގެ އަތްމައްޗަށް ދޫކޮށްލުމަށްމ ރައީސް މުއިއްޒުގެ އަމިއްލަ މަސްލަހަތުތައް ފުރިހަމަކުރުމަށް، ހިންގާ ވަރަށް ނުރައްކާތެރި ބޮޑު ޖަރީމާއެއް ކަމަށް" އޭނާ ވިދާޅވި އެވެ.
ރަސްމާލެ މަޝްރޫއާ ގުޅޭގޮތުން ސަރުކާރުން އަމަލުކުރަމުންދާ ގޮތާ މެދު އިދިކޮޅު އެމްޑީޕީ އާއި ޕީއެންއެފްގެ އިތުރުން ދީނީ އިލްމުވެރިން ވެސް ވަނީ ކަންބޮޑުވުން ފާޅުކޮށްފަ އެވެ. "ދިވެހިިންގެ ބިން ދިވެހިންނަށް" ހަރަކާތުގެ ބޭނުމަކީ މި ހުރިހާ ފަރާތްތަކެއް އެއްގަލަކަށް އަރުވައި ގައުމީ ފެންވަރެއްގައި މި މަސައްކަތް ހުއްޓުވުން ކަމަށް އިމްރާން ވިދާޅުވި އެވެ.
އިމްރާން ވިދާޅުވި ގޮތުގައި ރާއްޖޭގެ ބިމާއި ކަނޑުފަޅުގެ ވަސީލަތްތައް ބޭރުގެ އިންވެސްޓަރުންނަށް ދޫކުރަންވާނީ ރައްޔިތުންގެ މަޝްވަރާއާ އެކު ދެފުށް ފެންނަ އުސޫލެއްގެ ތެރެއިންނެވެ. ނަމަވެސް މިހާރު ފެންނަނީ ރައީސްގެ އަމިއްލަ މަސްލަހަތު އިސްކޮށް ރާއްޖޭގެ މިނިވަންކަމަށް ބުރޫއަރާ ފަދަ ގޮތަކަށް ކަންކަން ކުރަމުންދާ ތަން ކަމަށް އޭނާ ވިދާޅުވި އެވެ.
މިދިޔަ ސެޕްޓެމްބަރު 21 ވަނަ ދުވަހު ސޮއިކުރި އެއްބަސްވުމާ ގުޅިގެން ރާއްޖޭގެ ނޫސްވެރިންނާއި ދިރާސާކުރާ ފަރާތްތަކުން ގިނަ މައުލޫމާތުތަކެއް ހާމަކޮށްފައިވާކަން އިމްރާނު ފާހަގަކުރެއްވި އެވެ. އޭނާ ވިދާޅުވީ ދިވެހި ތާރީހުގައި ގައުމަށް ހިޔާނާތްތެރިވާ ކޮންމެ ފަހަރަކު ދިވެހިން ނިކުމެ ގައުމު ސަލާމަތްކޮށްފައިވާ ކަމަށެވެ.
"މާތް ﷲ ގެ ރަހުމަތާ ވާގިފުޅާ އެކު އަޅުގަނޑުމެންނާ އެކު ރައްޔިތުންގެ ބޮޑު އަގުލަބިއްޔަތެއް އެބައޮތް. ރައްޔިތުން ތިބީ މި ގޮތަށް މިކަން ކުރިއަށް ދޭކަށް ނޫން. ދިވެހި ތާރީހުގެ ތެރެއިން ފެންނަން އޮތް މުހިންމު މަންޒަރުތަކަށް ބަލާއިރު، ގައުމަށް ހިޔާނާތްތެރިވެ ހައްދާރުވާ ކޮންމެ ފަހަރަކު ފަހަރަކު ދިވެހިން ތެދުވެ ވަނީ ދިވެހި ގައުމު ސަލާމަތްކޮށްފަ." އިމްރާން ވިދާޅުވި އެވެ.
އެހެންކަމުން ހުރިހާ ސިޔާސީ ޕާޓީތަކާއި ޖަމިއްޔާތަކާއި ވިޔަފާރިވެރިން އަދި ސަލާމަތީ ހިދުމަތްތަކުގައި ތިއްބެވި ގައުމުދެކެ ލޯބިވާ ފަރާތްތަކުން މި ހަރަކާތުގައި ބައިވެރިވުމަށް އިމްރާން ގޮވާލެއްވި އެވެ. އަދި ރަސްމާލޭން ބިން ދޫކޮށްލުމާ ދެކޮޅަށް ރައްޔިތުންގެ ބޮޑު އަގުލަބިއްޔަތެއް އެބައޮތް ކަމަށް އޭނާ ވިދާޅުވި އެވެ.
