ނާސާގެ އެސްޓްރޮނޯޓުން ހަނދަށް ދިޔުމަށް ކުރި މުހިންމު ދިރާސާތަކުގައި އިސްކޮށް އުޅުނު ކޮމްޕިއުޓަރު ސައިންޓިސްޓު، އުމުރުން 90 އަހަރުގައި މަރުވެއްޖެ އެވެ.
މާގްރެޓް ހެމިލްޓަން އަކީ އެ ދާއިރާގެ އެންމެ ކުރީ ސަފުގައި ހިމެނޭ މީހެކެވެ. އޭނާ ވަނީ ނާސާގެ އެޕޯލޯ މިޝަންތަކަށް ބޭނުންވާ ސޮފްޓްވެއާ ތައްޔާރުކުރި ޓީމު އިސްވެ ބަލަހައްޓާފަ އެވެ. "ސޮފްޓްވެއާ އިންޖިނިއަރިން" މި ލަފުޒު އުފެދިގެން އައީ ވެސް އޭނާގެ އެ މަސައްކަތުގެ ތެރެއިންނެވެ.
ހެމިލްޓަން އެމްއައިޓީގައި މަސައްކަތް ކުރީ 1959 އިން ފެށިގެން 1970 ގެ މެދުތެރެއާ ހަމައަށެވެ. އެ މުއްދަތުގައި އޭނާ ވަނީ އެ ތަނުގެ ސޮފްޓްވެއާ އިންޖިނިއަރިން ޑިވިޝަން ހިންގާފަ އެވެ.
އެމެރިކާގެ އެސްޓްރޮނޯޓުން ކަމަށްވާ ނީލް އާމްސްޓްރޯންގް އާއި ބަޒް އެލްޑްރިން ރައްކާތެރިކަމާއެކު ހަނދަށް ތިރިކުރުމަށް ބޭނުންކުރި ނާސާގެ އެޕޯލޯ 11 މަޝްރޫއުގެ ހުރިހާ ސޮފްޓްވެއާއެއް ލިޔެ، ޓެސްޓުކުރި އިންޖިނިއަރުންގެ ޓީމަށް އިރުޝާދު ދިނީ އޭނާ އެވެ.
ތާރީޚީ އެޕޯލޯ 11 މިޝަން ހަނދަށް ތިރިކުރުމުގެ ކުޑަވަގުތުކޮޅެއް ކުރިން، 1969 ވަނަ އަހަރު، އުޅަނދުގައި ހުރި ކޮމްޕިއުޓަރުން މައްސަލައެއް އުޅޭކަމުގެ އިންޒާރު ދިނެވެ.
އެ އިންޒާރުން ދެއްކި ގޮތުގައި ކޮމްޕިއުޓަރަށް ވަނީ ނުކަތާ ވަރަށް ބާރުބޮޑުވެފަ އެވެ. އެ ވަގުތު ހީވީ އެ އުނދަގޫ މިޝަން ކާމިޔާބު ނުވެދާނެހެންނެވެ.
ނަމަވެސް، އެމްއައިޓީން ބުނި ގޮތުގައި ހެމިލްޓަން އާއި އޭނާގެ ޓީމުން ވަނީ އެފަދަ މައްސަލައަކަށް ކުރިއާލާ ތައްޔާރުވެ، "ޕްރިއޮރިޓީ ޑްރިވަން ސޮފްޓްވެއާ" އެއް ތައްޔާރުކޮށްފަ އެވެ. އެ ސޮފްޓްވެއާގެ ސަބަބުން، މުހިންމު ނޫން މަސައްކަތްތައް ކޮމްޕިއުޓަރުން ހުއްޓާލައި، އެންމެ މުހިންމު ކަންތައް ކަމަށްވާ ހަނދަށް ތިރިކުރުމުގެ މަސައްކަތަށް އިސްކަންދިނެވެ.
ހެމިލްޓަންގެ ޚިދުމަތުގެ އަގުވަޒަންކުރުމުގެ ގޮތުން، 2016 ވަނަ އަހަރު އޭރުގެ ރައީސް ބަރަކް އޮބާމާ ވަނީ އޭނާއަށް އެމެރިކާގެ އެންމެ މަތީ މަދަނީ ޝަރަފު ކަމަށްވާ "ޕްރެޒިޑެންޝަލް މެޑަލް އޮފް ފްރީޑަމް" އަރުވާފަ އެވެ.
އިންޑިއާނާގައި 1936 ވަނަ އަހަރު އުފަންވި ހެމިލްޓަން، 1955 ވަނަ އަހަރު ޔުނިވާސިޓީ އޮފް މިޗިގަންގައި ހިސާބު އިލްމު ފުރަތަމަ ކިޔެވުމަށް ފަހު، އާލްހަމް ކޮލެޖަށް ބަދަލުވެ 1958 ވަނަ އަހަރު ހިސާބު އިލްމުން ބެޗްލާސް ޑިގްރީ ހާސިލްކުރި އެވެ.
އޭގެ އެއް އަހަރު ފަހުން އޭނާގެ ފިރިމީހާއާއެކު މެސެޗުސެޓްސްގެ ބޮސްޓަންއަށް ބަދަލުވި އެވެ. އެމްއައިޓީން އޭނާ ފުރަތަމަ ވަޒީފާ ހޯދީ ފިރިމީހާގެ ގާނޫނީ ދާއިރާއިން ކިޔަވަމުން ދިޔަ ދުވަސްވަރު އާއިލާއަށް އެހީތެރިވުމަށެވެ.
އަދި 1970 ގެ އަހަރުތަކުން ފެށިގެން ހެމިލްޓަން ވަނީ އޭނާގެ ތަޖުރިބާގެ ބޭނުންކޮށްގެން އަމިއްލަ ސޮފްޓްވެއާ ކުންފުނިތައް އުފައްދައިފަ އެވެ. އޭގެ ތެރޭގައި މިހާރު ވެސް މެސެޗުސެޓްސްގައި ހިންގަމުންދާ "ހެމިލްޓަން ޓެކްނޮލޮޖީސް" ހިމެނެ އެވެ.
އެމްއައިޓީން ބުނި ގޮތުގައި ހެމިލްޓަން މަރުވި އިރު، އޭނާގެ އަންހެން ދަރިއަކާއި، ދެ މާމަ ދަރިންގެ އިތުރުން ހަތަރު މުނިމާމަ ދަރިން ދުނިޔޭގައި އެބަ ތިއްބެވެ.
