މި ސަރުކާރުން އަލަށް ތަރައްގީކުރަން އިއުލާނުކުރި 15 އެއާޕޯޓުގެ ތެރެއިން މި ވަގުތު އަމަލީ މަސައްކަތް ކުރަމުން ދަނީ އެންމެ ފަސް އެއާޕޯޓުގެ ކަމަށް ހައުސިން މިނިސްޓަރު އަބްދުﷲ މުއްތަލިބު މިއަދު ވިދާޅުވެއްޖެ އެވެ.
މުއްތަލިބު އެހެން ވިދާޅުވީ ހުޅުމާލެ ދެކުނު ދާއިރާގެ މަޖިލިސް މެންބަރު، އަހުމަދު ޝަމްހީދު ލިޔުމުން ޖަވާބު ހޯއްދެވުމަށް އެދި ކުރެއްވި ސުވާލަށް ފޮނުއްވި ޖަވާބުގަ އެވެ.
މުއްތަލިބު ފޮނުއްވި ޖަވާބުގައި ބުނީ އެ މިނިސްޓްރީގެ ދަށުން ކުރިއަށް ގެންދާ އެއާޕޯޓު މަޝްރޫއުތަކަށް ކަނޑައަޅާފައިވާ ބަޖެޓަށްވުރެ އިތުރަށް ފައިސާ ހަރަދުވާނެ ކަމަށް ނުބެލެވޭ ކަމަށެވެ.
"މި މިނިސްޓްރީގެ ބެލުމުގެ ދަށުން ކޮންޓްރެކްޓު ކުރެވިގެން މިހާރު ކުރިއަށް ދަނީ ފަސް އެއާޕޯޓެއް ތަރައްގީ ކުރުމުގެ މަޝްރޫއުގެ މަސައްކަތެވެ، މި މަސައްކަތްތައް ކުރިއަށް ދަނީ އެކި މަރުހަލާތަކުގަ އެވެ، އަދި މި މަޝްރޫއުތައް ނިންމުމަށްޓަކައި ކަނޑައެޅިފައިވާ ބަޖެޓަށްވުރެ އިތުރަށް ފައިސާ ބޭނުންވާނެކަމަކަށް ނުބެލެވެ އެވެ،" އެ ސިޓީގައި ބުންޏެވެ.
ނަމަވެސް، ލ. އިސްދޫ ކަލައިދޫ އެއާޕޯޓުގެ މަޝްރޫއު އަދި، ކޮންޓްރެކްޓު ކުރެވިފައި ނުވާތީ އެ މަޝްރޫއުއަށް ބޭނުންވާ 600 މިލިއަން ރުފިޔާ މިހާރު ވަނީ ބަޖެޓުގައި ހިމަނައި ހަމަޖައްސައިފަ އެވެ.
މުއްތަލިބު މިހެން ވިދާޅުވިއިރު، ރާއްޖޭގެ އެކި ސަރަހައްދުތަކުގައި 11 އެއާޕޯޓެއް ތަރައްގީކުރުމަށް މި ސަރުކާރުގައި ވަނީ ކޮންޓްރެކްޓު ހަވާލުކޮށްފަ އެވެ. އޭގެ ތެރޭގައި ހިމެނެނީ:
- ށ. ކޮމަންޑޫ އެއާޕޯޓު
- ތ. ގުރައިދޫ އެއާޕޯޓު
- ތ. ވިލުފުށި އެއާޕޯޓު
- ށ. މިލަންދޫ އެއާޕޯޓު
- ށ. ބިލެތްފަހި އެއާޕޯޓު
- ހއ. ދިއްދޫ އެއާޕޯޓު
- ރ. ފައިނު އެއާޕޯޓު
- ށ. ދިގުވެލި އެއާޕޯޓު
- ނ. ވިހަފަރު އެއާޕޯޓު
- އއ. މަތިވެރި އެއާޕޯޓު
- ފ. ނިލަންދޫ އެއާޕޯޓު
އޭގެ އިތުރުން، މިދިޔަ ސަރުކާރުން ވެސް ވަނީ ފަސް އެއާޕޯޓެއް ތަރައްގީ ކުރުމުގެ މަސައްކަތް ފަށައިފަ އެވެ. އެއީ:
- ފ. މަގޫދޫ އެއާޕޯޓު
- ހދ. މަކުނުދޫ އެއާޕޯޓު
- ރ. އަލިފުށި އެއާޕޯޓު
- މ. މުލި އެއާޕޯޓު
- ބ. ތުޅާދޫ އެއާޕޯޓު
މި ސަރުކާރުން ވެރިކަމަށް އައުމަށްފަހު އަލަށް އެއާޕޯޓެއް އަދި ހުޅުވެ އެެވެ. އަލަށް ތަރައްގީކުރަން އެއާޕޯޓުތަކެއް އިއުލާނުކޮށްފައިވާއިރު، ގިނަ އަދަދެއްގެ އެއާޕޯޓު އަޕްގްރޭޑު ކުރުމަށާއި ތަރައްގީ ކުރުމަށް މުއިއްޒު ވައުދުވެވަޑައިގެންނެވި އެވެ.
