ހައުސިން އަދި އިންފްރާސްޓްރަކްޗާ މިނިސްޓްރީން ފަށާފައިވާ މަޝްރޫއުތައް އެއްކޮށް ނިންމުމަށްޓަކައި ޖުމުލަ 58 ބިލިއަން ރުފިޔާ ބޭނުންވާނެކަމަށް ލަފާ ކުރެވޭ ކަމަށް ހައުސިން މިނިސްޓަރު، އަބްދުﷲ މުއްތަލިބު ވިދާޅުވެއްޖެ އެވެ.
މުއްތަލިބު އެހެން ވިދާޅުވީ ހުޅުމާލެ ދެކުނު ދާއިރާގެ މެންބަރު، އަހުމަދު ޝަމްހީދު ލިޔުމުން ޖަވާބު ހޯއްދެވުމަށް އެދި ކުރެއްވި ސުވާލަކަށް ފޮނުއްވި ޖަވާބުގަ އެވެ.
ޝަމްހީދު ސުވާލު ކުރެއްވީ ހައުސިން މިނިސްޓްރީން ފަށާފައިވާ މަޝްރޫއުތައް ނިންމުމަށް ބޭނުންވާނެކަމަށް ލަފާކުރާ ޖުމުލަ ބަޖެޓަކީ ކޮބައިތޯ އާއި އެ މަޝްރޫއުތައް ކުރިއަށް ގެންދިޔުމަށްޓަކައި މި އަހަރުގެ ބަޖެޓުގައި ކަނޑައަޅާފައި ވަނީ ކިހައިވަރެއްގެ ފައިސާއެއްތޯ އެވެ.
އެ ސުވާލުގެ ޖަވާބުގައި މުއްތަލިބު މަޖިލީހަށް ފޮނުއްވި ސިޓީގައި ބުނީ އެ މިނިސްޓްރީން ފަށާފައިވާ މަޝްރޫއުތައް ނިންމުމަށް 58 ބިލިއަން ރުފިޔާ ބޭނުންވާނެކަމަށް ލަފާކުރެވޭ ކަމަށެވެ. ނަމަވެސް މި މަޝްރޫއުތައް ކުރިއަށް ގެންދިޔުމަށް މި އަހަރުގެ ބަޖެޓުގައި ކަނޑައަޅާފައިވާ މިންވަރެއް ނޭނގޭ ކަމަށް އެ ސިޓީަގައި ބުންޏެވެ.
"މަޝްރޫއުތައް ނިންމުމަށްޓަކައި ހޭދަވާނެކަމަށް ލަފާކުރެވޭ ބަޖެޓު 58،831،473،267ރ.، 2026 ވަނަ އަހަރުގެ މަޝްރޫއުތައް ހިންގަން ހަމަޖައްސާފައި ވަނީ ޕްރޮގްރާމް ބަޖެޓެކެވެ، މި ގޮތުން މަޝްރޫއުތައް ކުރިއަށް ގެންދިޔުމަށް ރާވާފައިވާ ޕްލޭނާ އެއްގޮތަށް މަޝްރޫއުތަކަށް ބަޖެޓު ހަމަޖައްސަވަނީ މިނިސްޓްރީ އޮފް ފިނޭންސް އެންޑް ޕަބްލިކް އެންޓަޕްރައިޒަސް އިން،" ހައުސިންއިން ބުންޏެވެ.
"ވުމާއެކު 2026 ވަނަ އަހަރުގެ ބަޖެޓުގައި ވަކި މަޝްރޫއުތަކަށް ވަކި މިންވަރެއް ކަނޑައެޅިފައެއް ނުވޭ."
މި އަހަރު ނިންމަން ކަނޑައަޅާފައިވާ މަޝްރޫއުތަކަށް ހަރަދުވާނެ މިންވަރު ނޭނގޭ ކަމަށް މުއްތަލިބު ވިދާޅުވިއިރު، މަޝްރޫއުތަކަށް ބޭނުންވާ ފައިސާ އެނގޭނެހެން ބަޖެޓުގައި ހިމަނާފައި ނެތުމުން މި އަހަރުގެ ބަޖެޓު ފާސްކުރިއިރު ވެސް އިދިކޮޅު ފަރާތްތަކުން ކަންބޮޑުވުން ފާޅުކުރި އެވެ.
ސަރުކާރުން ކުރިއަށް ގެންދާ މަޝްރޫއުތަކާ ގުޅޭ ގޮތުން ރޭ ބޭއްވި އަހާ ފޯރަމްގައި ފިނޭންސް މިނިސްޓަރު ވަނީ 1273 މަޝްރޫއެއްގެ މަސައްކަތް ކުރިއަށްދާ ކަމަށް ވިދާޅުވެފަ އެވެ. އަދި މި ޕްރޮޖެކްޓުތަކަށް ބޭނުންވާ ފައިސާ ވަގުތުން އަދާކުރެވޭނެ އިންތިޒާމުތައް ހަމަޖެހިފައިވާ ކަމަށް ވެސް އޭނާ ވިދާޅުވި އެވެ.
