މިދިޔަ ސެޕްޓެމްބަރު މަހުގެ 26 ވަނަ ދުވަހު ޕްރިމިއާ ކުރި ސުޕަނެޗުރަލް ބިރުވެރި ފިލްމު "ދެވި" ގެ ވަދާއީ ޝޯ ތަކުގެ ޓިކެޓް ވިއްކަން ފަށައިފިއެވެ
ފާޑުކިޔުންތައް އަމާޒުވަމުންދިޔަ ނަމަވެސް، ފިލްމު ބަލަން ވަތް ބެލުންތެރިންގެ އަދަދު އިތުރުވެ ފިލްމުގެ ފޯރިވަނީ ގަދަވެފައެވެ.
ފިލްމުގެ އެންމެ ފަހު ޝޯ އޮންނާނީ މި ހިނގާ އޮކްޓޯބަރު މަހުގެ 25 ވަނަ ދުވަހުގެ ރެެއެވެ.
ފިލްމުގައި ދައްކުވައިދެނީ އައްޒަގެ އާއިލާއަށް ދިމާވާ ރޫހާނީ ނުރައްކާތެރި ކަންތައްތަކަކުން ސަލާމަތްވުމަށް ކުރާ ބިރުވެރި މަސައްކަތްތަކެކެވެ. މި ފިލްމުގައި އެންމެ ބޮޑަށް ފާހަގަކުރެވެނީ "މާޝީ" އަދި "މާހީ" ގެ ގޮތުގައި އައްޒަ ދައްކައިދިން މުޅިން ތަފާތު ދެ ސިފައެވެ.
އެކަކު އަނެކަކާ މުޅިން ތަފާތު ދެ ކެރެކްޓަރެއްގެ ގޮތުގައި އައްޒަ ދެއްކި ހުނަރަކީ ބެލުންތެރިންގެ އެންމެ ބޮޑު އެއް ވާހަކަ އެވެ.
ދިވެހިންގެ މެދުގައި ބޮޑު މަގުބޫލުކަމެއް ހޯދާފައިވާ ކުޅަދާނަ އެކްޓްރެސް މަރްޔަމް އައްޒަ ޕްރޮޑިއުސަރެއްގެ ގޮތުގައި ނުކުންނަ ފުރަތަމަ ފިލްމަށް ވުމާއެކު، މިއީ އޭނާގެ ކާމިޔާބު ކެރިއަރުގެ ފާހަގަކޮށްލެވޭ އުފެއްދުމެކެވެ.
މި ފިލްމުގެ ޑައިރެކްޓަރުންނަކީ މަޝްހޫރު ފެޝަން ޑިޒައިނަރު ހުސެން ހާޒިމް (ސޭންޑީ) އެވެ،
ވީއެފްއެކްސް، ޕްރޮސްތެޓިކް މޭކަޕް، ސައުންޑް ޑިޒައިން އަދި ޕޯސްޓް-ޕްރޮޑަކްޝަންގައި ފަންނީ ބޮޑެތި ގޮންޖެހުންތަކަކާ ކުރިމަތިލައިގެން އުފެއްދި މި ފިލްމުން ސޭންޑީގެ ބިރުވެރި ތަސައްވުރު ވަރަށް ފުރިހަމައަށް ބޮޑު ސްކްރީނަށް ވަނީ ގެނެސްދީފަ އެވެ.
އެކި ސަރަހައްދުތަކުގައި ފިލްމުގެ ޓީމުން ކުރި ބުރަ މަސައްކަތް ފިލްމުގެ ކޮންމެ މަންޒަރަކުންވެސް ފެނިގެންދެ އެވެ.
"ދެވި" އާ ގުޅޭގޮތުން ބެލުންތެރިންގެ ޝުއޫރުތަކުން ފެންނަނީ މުޅިން ތަފާތު މަންޒަރެކެވެ. ފިލްމުގެ ރަސްމީ ޕޭޖުގައި އާންމުކޮށްފައިވާ ހަގީގީ ވީޑިއޯ ޓެސްޓިމޯނިއަލްތަކުން ފެންނަނީ ފިލްމަށް އޮތް ބޮޑު ތަރުހީބެވެ.
