އިންޑިއާގެ ޕަންޖާބު ސްޓޭޓްގެ ޔުނިވާސިޓީއެއްގައި މިދިޔަ ހަފުތާގައި އަންހެން ދަރިވަރަކު ރޭޕްކުރި ކަމަށް ބުނާ މައްސަލައަކާ ގުޅިގެން ހިނގަމުންދާ މުޒާހަރާތަކާ ހުރެ، އެ ޔުނިވާސިޓީގެ ކިޔެވުން 10 ދުވަހަށް މެދުކަނޑާލައިފި އެވެ. ނަމަވެސް، ޔުނިވާސިޓީގެ އިސްވެރިން ވަނީ ރޭޕްގެ އެ ތުހުމަތުތައް ދޮގުކޮށްފަ އެވެ.
ފަގްވާރާގައި ހުންނަ ލަވްލީ ޕްރޮފެޝަނަލް ޔުނިވާސިޓީން ހޯމަ ދުވަހު ނެރުނު އިއުލާނެއްގައި ބުނެފައިވަނީ، ހަމަނުޖެހުންތަކަކަށް ބަދަލުވި މި މުޒާހަރާތަކާ ގުޅިގެން މިހާރު ކުރިއަށްދާ މިޑްޓާމް އިމްތިހާނުތައް ވެސް ފަސްކޮށްފައިވާ ކަމަށެވެ.
އެ ޔުނިވާސިޓީން ނެރުނު ބަޔާނުގައި ބުނެފައިވަނީ، ކިޔެވުން މެދުކަނޑާލާފައިވާ 10 ދުވަހުގެ މުއްދަތުގައި، ދަރިވަރުން ބޭނުންނަމަ އެކުދިންގެ މައިންބަފައިން ނުވަތަ ބެލެނިވެރިންނާ މަޝްވަރާކުރުމަށްފަހު އަމިއްލަ ރަށަށް ދެވިދާނެ ކަމަށެވެ.
މީގެ އިތުރުން، ޔުނިވާސިޓީގައި މަޑުކުރާ ދަރިވަރުންގެ ސަލާމަތާއި ރައްކާތެރިކަމަށްޓަކައި، ހޮސްޓެލްތަކުން ނުވަތަ ދިރިއުޅޭ ތަންތަނުން ބޭރަށް ނުނިކުތުމަށާއި، އެއްވެސް ކަހަލަ ހަމަނުޖެހުމެއްގައި ބައިވެރިނުވުމަށް ވެސް އެ ބަޔާނުގައި ވަނީ އިރުޝާދު ދީފަ އެވެ.
ސޯޝަލް މީޑިއާގައި ދައުރުވަމުންދާ ޕޯސްޓުތަކުގައި ބުނެފައިވަނީ، ޔުނިވާސިޓީ ކެމްޕަސް ތެރޭގައި އަންހެން ދަރިވަރަކު ރޭޕްކޮށްފައިވާ ކަމަށެވެ. އަދި ބައެއް ފަރާތްތަކުން ބުނާ ގޮތުގައި އެ ދަރިވަރު ވަނީ އަމިއްލައަށް މަރުވެފަ އެވެ. އިންޑިއާ ޓުޑޭ ނިއުސް މެގަޒިންއިން ރިޕޯޓްކޮށްފައިވާ ގޮތުގައި، ފުލުހުން މިހާރު ދަނީ އެ ހާދިސާ ތަހުގީގު ކުރަމުންނެވެ. ނަމަވެސް، އެއީ ކޮން ދަރިވަރެއްކަން އަދި މިހާތަނަށް ދެނެގަނެވިފައި ނުވާ ކަމަށް ފުލުހުން ބުނެ އެވެ.
އާދީއްތަ ދުވަހު މުޒާހަރާގެ ބައިވެރިންނާއި ފުލުހުންނާ ދެމެދު ކުރިމަތިލުންތަކެއް ހިނގައި، މުޒާހަރާ ވަނީ ވަރަށް ބޮޑަށް ހޫނުވެފަ އެވެ. އަދި ޔުނިވާސިޓީގެ އެތެރޭގެ ތަންތަނަށް ގެއްލުންދީފައިވާ ކަމަށް އެ ގައުމުގެ މީޑިއާތަކުން ރިޕޯޓްކޮށްފައިވެ އެވެ.
ޚަބަރުތައް ބުނާ ގޮތުން، މުޒާހަރާގެ ބައިވެރިން ވަނީ ޔުނިވާސިޓީ ތެރޭގައި ހުރި އުޅަނދުތަކުގައި ރޯކޮށް، ކުޑަދޮރުތައް ތަޅާލައި، ފުލުހުންގެ އުޅަނދުތަކަށް ވެސް ގެއްލުން ދީފަ އެވެ. މީގެ އިތުރުން، ދަރިވަރުން ވަނީ ޔުނިވާސިޓީ ކައިރީގައި އޮންނަ ހައިވޭއެއް ބަންދުކޮށް މުޒާހަރާކޮށްފަ އެވެ.
ޔުނިވާސިޓީގެ ރެޖިސްޓްރާ މޮނިކާ ގުލާޓީ ވަނީ ރޭޕްގެ ހާދިސާއެއް ހިނގިކަމަށް ބުނާ ވާހަކަތައް ދޮގުކުރައްވާފަ އެވެ. އޭނާ އާދީއްތަ ދުވަހު ވިދާޅުވީ އެ ތުހުމަތުތަކުގައި އެއްވެސް ހަގީގަތެއް ނެތް ކަމަށެވެ.
އިންޑިއާގެ އެންމެ ބޮޑު އިނގިރޭސި ނޫސް ކަމަށްވާ "ދަ ޓައިމްސް އޮފް އިންޑިއާ" އިން ރިޕޯޓްކޮށްފައިވާ ގޮތުގައި، ރެޖިސްޓްރާ ވިދާޅުވީ މިފަދަ ދޮގު މައުލޫމާތުތައް ފަތުރަނީ ޔުނިވާސިޓީގެ އަބުރު ކަތިލުމަށް ރޭވުންތެރިކަމާއެކު ކުރަމުންދާ މަސައްކަތެއްގެ ދަށުން ކަމަށެވެ.
މި މައްސަލައާ ގުޅިގެން، ރޭޕްގެ ހާދިސާ ހިނގި ކަމަށް ބުނާ އިމާރާތުގައި ދިރިއުޅޭ ތިން އަންހެން ދަރިވަރަކު، ރެޖިސްޓްރާ ގުލާޓީއާއެކު ވީޑިއޯއެއްގައި ފެނިފައިވެ އެވެ. އެ ވީޑިއޯގައި އެ ދަރިވަރުން ވެސް ވަނީ ރޭޕްގެ އެއްވެސް ހާދިސާއެއް ހިނގާފައި ނުވާ ކަމަށް ބުނެ ރެޖިސްޓްރާގެ ވާހަކަތަކަށް ތާއީދުކޮށްފަ އެވެ.
ނަމަވެސް، އެންޑީޓީވީން ރިޕޯޓްކޮށްފައިވާ ގޮތުގައި، ފަހުން އާންމުވި އެހެން ވީޑިއޯއެއްގައި އެ ތިން ދަރިވަރުން ވަނީ، ކުރީގެ ވީޑިއޯގައި އެމީހުން ވާހަކަދެއްކީ ވަކި ގޮތަކަށް ބުނަން އަންގައިގެން ކަމަށް ބުނެފަ އެވެ.
މި ހާދިސާ ހިނގާފައި މިވަނީ، އިންޑިއާގެ ވެރިރަށް ނިއުދިއްލީ އާއި ކައިރި ސަރަހައްދުތަކުގައި ރޭޕްގެ މައްސަލަތައް އިތުރުވަމުންދާތީ، އެކަމުގައި ޒިންމާވާ ފަރާތްތަކަށް ފިޔަވަޅު އެޅުމަށް ސުޕްރީމް ކޯޓުން ހޯމަ ދުވަހު ބާރުއަޅާފައިވާ ދަނޑިވަޅެއްގަ އެވެ. ސުޕްރީމް ކޯޓުން ބުނެފައިވަނީ މިފަދަ ހާދިސާތައް އިތުރުވުމަކީ ގާނޫނު ތަންފީޒުކުރާ އިދާރާތަކުގެ ނުކުޅެދުންތެރިކަން ހާމަވާ ކަމެއް ކަމަށެވެ.
މިދިޔަ ހަފުތާގައި ދިއްލީގެ ޕާކެއްގެ ތެރޭގައި ތިން ފިރިހެނަކު ވެގެން އަންހެން ކުއްޖަކު ރޭޕްކުރި މައްސަލައާ ގުޅިގެން، އަންހެނުންގެ ރައްކާތެރިކަން ކަށަވަރުކޮށްދިނުމަށް ގޮވާލައި އެތައް ސަތޭކަ ދަރިވަރުންނެއް ވަނީ ދިއްލީގައި މުޒާހަރާކޮށްފަ އެވެ.
މީގެ އިތުރުން، މިދިޔަ މަހު 17 އަހަރުގެ އަންހެން ކުއްޖަކު ދަތުރުކުރަމުންދިޔަ ބަހެއްގެ ތެރޭގައި، އެ ބަހުގެ ޑްރައިވަރާއި ކޮންޑަކްޓަރު ވެގެން ރޭޕްކުރި ކަމަށް ބުނާ މައްސަލައެއް ވެސް އިންޑިއާގެ މީޑިއާތަކުން ވަނީ ރިޕޯޓްކޮށްފަ އެވެ.
ނޭޝަނަލް ކްރައިމް ރެކޯޑްސް ބިއުރޯގެ ތަފާސްހިސާބުތަކުން ދައްކާ ގޮތުގައި، އިންޑިއާގައި ކޮންމެ ދުވަހަކު 80 އަށްވުރެ ގިނަ ރޭޕްގެ މައްސަލަ ފުލުހުންނަށް ރިޕޯޓްކުރެ އެވެ. ނަމަވެސް، އިންސާނީ ހައްގުތަކަށް މަސައްކަތްކުރާ ފަރާތްތަކުން ބުނާ ގޮތުގައި، މުޖުތަމައުގެ ފިއްތުންތަކާއި ބިރުދެއްކުންތަކާ ހުރެ ގިނަ މީހުން މައްސަލަ ރިޕޯޓް ނުކުރާތީ، ހަގީގީ އަދަދު މިއަށްވުރެ މާ ބޮޑަށް ވެސް އިތުރުވާނެ އެވެ.
