އެމްއެޗްއޭ ހޯލްސޭލުން އެ ކުންފުނީގެ އީ-ކޮމާސް ވެބްސައިޓް، store.mha.mv އިފުތިތާހުކޮށްފި އެވެ. މި ވެބްސައިޓް މެދުވެރިކޮށް ރާއްޖޭގެ ވިޔަފާރިތަކަށް މުދާ ބަލައިލުމާއި ހޯލްސޭލްކޮށް އޯޑަރު ދިނުމުގެ ފުރުސަތު މިހާރު ވަނީ ހުޅުވާލައިފަ އެވެ.
މި ވެބްސައިޓަށް ޒިޔާރަތްކުރާ ފަރާތްތަކަށް މުދަލުގެ ކެޓަލޮގް ބަލައިލެވޭއިރު، ރަޖިސްޓްރީކޮށްފައިވާ ވިޔަފާރިތަކަށް ލޮގިންވުމުން މުދަލުގެ ހޯލްސޭލް އަގުތައް ފެންނާނެ އެވެ. އަދި މުދާ އިމްޕޯޓްކުރާ އެމްއެޗްއޭ އިން ސީދާ ކޭސް ގަނޑުކޮށް އޯޑަރު ދިނުމުގެ ފުރުސަތު ލިބިގެންދާއިރު، ގުދަނުގައި މުދާ ހުރި މިންވަރުގެ ތަފުސީލު (ލައިވް ސްޓޮކް އިންފޮމޭޝަން) ވެސް ވެބްސައިޓުން ވަގުތުން ބަލައިލެވޭނެ އެވެ.
އެމްއެޗްއޭގެ އީ-ކޮމާސް ޕްލެޓްފޯމުން ލިބެން ހުރި ތަކެތީގެ ތެރޭގައި ކާބޯތަކެއްޗާއި، ބުއިންތަކާއި، ކިރުގެ ބާވަތްތަކާއި، ފިނިކުރި މުދަލާއި، އައިސްކްރީމްގެ އިތުރުން ކުޑަކުދިންނަށް ބޭނުންވާ ސާމާނާއި، އަމިއްލަ ސާފުތާހިރުކަމަށް ބޭނުންވާ ތަކެއްޗާއި ގޭތެރޭގެ ބޭނުންތަކަށް ބޭނުންވާ މުދާ ހިމެނެ އެވެ. މީގެ އިތުރުން، ހާއްސަ އޮފާތަކާއި އަލަށް ތައާރަފުކުރާ މުދަލުގެ ތަފުސީލު ވެސް ވެބްސައިޓުން ފެންނަން ހުންނާނެ އެވެ.
ވެބްސައިޓް މެދުވެރިކޮށް އޯޑަރުކުރާ މުދާ އެމްއެޗްއޭގެ ގުދަނުން ނެގުމުގެ އިތުރުން، މާލެ އަދި ހުޅުމާލެއަށް ހިލޭ ޑެލިވަރީ ކޮށްދިނުމުގެ ހިދުމަތް ވެސް އެ ކުންފުނިން ފޯރުކޮށްދެ އެވެ. އަދި އަތޮޅުތެރޭގެ ރަށްރަށުން އޯޑަރުކުރާ ކަސްޓަމަރުންނަށް، އެ ފަރާތްތަކުން ބޭނުންވާ ބޯޓުފަހަރާ ހަމައަށް މުދާ ގެންގޮސްދިނުމުގެ އިންތިޒާމު ވެސް ވަނީ ހަމަޖައްސައިފަ އެވެ.
ވެބްސައިޓުގައި ހިމެނޭ "މައި އޯޑާސް" ސެކްޝަން މެދުވެރިކޮށް، ފައިސާ ދެއްކުމާއި މުދާ ޕެކްކުރުމުން ފެށިގެން ޑެލިވަރީއާ ހަމައަށް އޯޑަރު ކުރިއަށްދާ ގޮތް ކަސްޓަމަރުންނަށް ބަލައިލެވޭނެ އެވެ.
ކަސްޓަމަރުންނަށް store.mha.mv އަށް ޒިޔާރަތްކޮށްގެން މުދަލުގެ ކެޓަލޮގް ބަލައިލެވޭނެ އެވެ. ރަޖިސްޓްރީ ކުރުމުގައި ނުވަތަ އޯޑަރު ދިނުމުގައި އެހީތެރިކަމެއް ބޭނުންވާ ނަމަ 7693517 އަށް ގުޅުމަށް އެމްއެޗްއޭ އިން އެދެ އެވެ.
