ގދ. ތިނަދޫ ސިޓީގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގައި ކުރިއަށްގެންދިޔަ ކެޓަރެކްޓް ސާޖަރީ އައި ކޭމްޕް ކާމިޔާބުކަމާއެކު ނިންމާލައިފި އެވެ.
މި ސެޕްޓެމްބަރު މަހުގެ 26 އިން 28 އަށް ތިން ދުވަހުގެ މުއްދަތަށް ކުރިއަށްގެންދިޔަ މި އައި ކޭމްޕަކީ އުމުރުން ދުވަސްވީ މީހުންނަށް ހާއްސަކޮށްގެން، ލޮލުގެ ފަރުވާ އާއި ކެޓަރެކްޓް ސާޖަރީގެ ހިދުމަތް ރަށުގައި ތިބެގެން ފަސޭހަކަމާއެކު ލިބޭނެ މަގު ފަހިކޮށްދިނުމުގެ މަގުސަދުގައި ބޭއްވުނު ކޭމްޕެކެވެ.
އޭޖްޑް ކެއާ މޯލްޑިވްސް އިސްނަގައިގެން، އެޓްމޮސްފިއާ ފައުންޑޭޝަންގެ މާލީ އެހީތެރިކަމާއެކު ކުރިއަށްގެންދިޔަ މި ހަރަކާތުގައި އައިކެއާ ހޮސްޕިޓަލާއި ޑރ. އަބްދުއްސަމަދު މެމޯރިއަލް ހޮސްޕިޓަލުން ވަނީ އަމަލީ ގޮތުން ބައިވެރިވެފަ އެވެ.
މި ކޭމްޕުގައި އޮޕަރޭޝަންތައް ކުރިއަށް ގެންގޮސްދެއްވީ އައިކެއާ ހޮސްޕިޓަލުގެ ޕީޑިއަޓްރިކް އޮފްތަލްމޮލޮޖީ އަދި ކެޓަރެކްޓް ސާޖަރީގެ ހާއްސަ ޑޮކްޓަރު، ޑރ. އަރްޖުން މައްލާ އެވެ. އަދި މި މަސައްކަތުގައި ޑރ. އަބްދުއްސަމަދު މެމޯރިއަލް ހޮސްޕިޓަލުގެ ކްލިނިކަލް ޓީމުން ބައިވެރިވެ، ފެސިލިޓީތަކާއި އެހެނިހެން އެހީތެރިކަން ފޯރުކޮށްދީފައި ވެ އެވެ.
މި ކޭމްޕުގެ ތެރެއިން އުމުރުން ދުވަސްވީ ނުވަ މީހެއްގެ ކެޓަރެކްޓް ސާޖަރީ ކާމިޔާބުކަމާއެކު ވަނީ ފުރިހަމަކޮށްފަ އެވެ. މީގެ އިތުރުން، ކުރިން ރަޖިސްޓްރީވި ފަރާތްތަކާއި އާންމުން ހިމެނޭހެން ޑޮކްޓަރުގެ ކޮންސަލްޓޭޝަން އަދި ލޮލުގެ ނަންބަރު ޗެކްކުރުމުގެ (ރިފްރެކްޝަން) ހިދުމަތް ވަނީ ފޯރުކޮށްދީފަ އެވެ. އަދި އޮޕަރޭޝަން ކުރެވުނު ފަރާތްތަކަށް އޮޕަރޭޝަނަށް ފަހު ބޭނުންވާ އިރުޝާދުތަކާއި ބޭސް ވަނީ ހިލޭ ފޯރުކޮށްދީފަ އެވެ.
މި ކޭމްޕާއި އެކު ސާޖަރީ ހެދި އުމުރުން ދުވަސްވީ ފަރާތްތަކަށް ފަރުވާ ހޯދުމަށް ރަށުން ބޭރަށް ކުރަން ޖެހޭ ދަތުރުތައް ހުއްޓުމަކަށް އައިސް، އާއިލާގެ ގާތުގައި ތިބެގެން ލުއިފަސޭހަކަމާއެކު ފަރުވާ ލިބިގެން ދިޔަ އެވެ.
އައިކެއާ ހޮސްޕިޓަލުން ހާމަކުރި ގޮތުގައި، ރާއްޖޭގެ އެކި ކަންކޮޅުތަކަށް ފެންވަރު ރަނގަޅު ލޮލުގެ ފަރުވާ ފޯރުކޮށްދިނުމަށް އެހެން ފަރާތްތަކާ ގުޅިގެން މަސައްކަތް ކުރުމުގައި އެ ހޮސްޕިޓަލުން އަބަދުވެސް ދެމިއޮންނާނެ އެވެ. އަދި ތިނަދޫގައި މި ކޭމްޕް ކާމިޔާބުކަމާއެކު ކުރިއަށް ގެންދިއުމަށް މަގުފަހި ކޮށްދެއްވި އޭޖްޑް ކެއާ މޯލްޑިވްސް، އެޓްމޮސްފިއަރ ފައުންޑޭޝަން އަދި ޑރ. އަބްދުއްސަމަދު މެމޯރިއަލް ހޮސްޕިޓަލް ގެ ޓީމަށް އައިކެއާއިން ވަނީ ޝުކުރު އަދާކޮށްފަ އެވެ.
