ދެ ވަނަ ހިއްސާގެ ބާޒާރެއް ކުރިޔަށް ގެންދިޔުމަށް ކަމަށް ބުނެ ސަރުކާރުން ނޭޝަނަލް އެކްސްޗޭންޖް ލިމިޓެޑުގެ ނަމުގައި މިއަދު ކުންފުންޏެއް އުފައްދައިފި އެވެ.
ރައީސް އޮފީހުން ބުނީ މި ކުންފުނި އުފެއްދީ ރައީސުލްޖުމްހޫރިއްޔާއަށް ލިބިދޭ ހާއްސާ ބާރާއި އިހުތިޔާރުގެ ދަށުން ރައީސް މުހައްމަދު މުއިއްޒުގެ ގަރާރަކުން އުފެއްދެވި ކުންފުންޏެއް ކަަމަށެވެ.
ސަރުކާރުގެ ސަތޭކަ ޕަސެންޓު ހިއްސާވާ ގޮތަށް ނޭޝަނަލް އެކްސްޗޭންޖު ކުންފު އުފެއްދީ، ރައީސް އޮފީހުން ބުނި ގޮތުގައި، ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާއިރު، ސަރުކާރުގެ އެހީތެރިކަމާއެކު ހިއްސާގެ ބާޒާރެއް ކުރިއަށް ގެންދަން ކަމަށެވެ.
ނޭޝަނަލް އެކްސްޗޭންޖު ލިމިޓެޑުގެ މަގުސަދުތައް
- ދިވެހި ސަރުކާރުގެ ފަރާތުން ދިވެހިރާއްޖޭގެ ކެޕިޓަލް މާކެޓް ކުރިއަރުވައި، މާކެޓުގެ އިތުބާރާއި ދެފުށް ފެންނަ މިންވަރު އިތުރުކުރުން
- ޒަމާނީ ސެކިއުރިޓީޒް އެކްސްޗޭންޖްތަކާއި ޓްރޭޑިން ފެސިލިޓީތައް ގާއިމުކޮށް ހިންގުން
- ދައުލަތުގެ ސެކިއުރިޓީޒް އާއި އިސްލާމީ ޝަރީއާގެ ހަމަތަކަށް ފެތޭ ސުކޫކާއި އެހެނިހެން މާލީ ވަސީލަތްތައް ނެރުމާއި ލިސްޓުކުރުމާއި މުއާމަލާތްކުރުމުގެ މަގުފަހިކޮށްދިނުން
- ސެންޓްރަލް ސެކިއުރިޓީޒް ޑިޕޮސިޓަރީ އާއި، ކްލިއަރިން އަދި ސެޓްލްމަންޓުގެ ޒަމާނީ ޕޯސްޓް-ޓްރޭޑް ހުދުމަތްތައް ފޯރުކޮށްދިނުން
- ރާއްޖެ އާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ދިވެހިރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރުން
ސަރުކާރުން މި ގެންނަ ބަދަލާއެކީ، ސަރުކާރު ކުންފުނިތަކުގެ އިކުއިޓީ އާއި ސަރުކާރުން ވިއްކާ ޓީބިލުތަކާއި ބޮންޑުތައް އަދި ސެކަންޑްރީ މާކެޓުގައި ވިއްކާ ސެކިއުރިޓީތައް ވިއްކާނީ މި އެކްސްޗޭންޖުންނެވެ.
ސަރުކާރު ފުރިހަމަ ބާރު ހިނގާ ގޮތަށް ހިއްސާގެ ބާޒާރުގައި ދެ ވަނަ ކުންފުންޏެއް އުފެއްދިއިރު، ސެކިއުރިޓީސްތަކާއި އިކުއިޓީތައް މިހާރު ލިސްޓު ކުރާ މޯލްޑިވްސް ސެކިއުރިޓީސް އެކްސްޗޭންޖް (އެމްއެސްއީ) އަކީ އަމިއްލަ ވިޔަފާރިތަކުން ހިންގާ ހިއްސާގެ ބާޒާރެކެވެ.
މި ހިއްސާގެ ބާޒާރުގެ ބެލެނިވެރި ފަރާތަކީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އެވެ.
