ކޯޕެންހާގެން، ޑެންމާކް (އޮކްޓޫބަރު 1) - ޕޯޗުގަލްގެ ތަރި ކްރިސްޓިއާނޯ ރޮނާލްޑޯ، އެ ޓީމުގެ ކޭމްޕް ދޫކޮށް ދާން ނިންމާފައިވާ އިއުލާނުކޮށްފި އެވެ.
އުމުރުން 41 އަހަރުގެ ރޮނާލްޑޯ އަށް ޕޯޗުގަލް އިން އެންމެ ފަހުން ނޭޝަންސް ލީގުގައި މިދިޔަ އާދިއްތަ ދުވަހު ކުޅުނު މެޗުގައި ފުރުސަތު ނުދެ އެވެ. މުޅި މެޗުގައި ރޮނާލްޑޯ ބެންޗުގައި އިންއިރު، މެޗަށް ފަހު، އޭނާ ވަނީ މާ ބޮޑަށް ޓީމުގެ ކަންކަމާ ނޫޅެ، ޗޭންޖިން ރޫމަށް ގޮސްފަ އެވެ. މިއީ، 18 އަހަރު ދުވަހުގެތެރޭގައި ރޮނާލްޑޯ ފިޓްކޮށް ހުއްޓައި މެޗެއްގައި ބޭނުންނުކޮށް ޕޯޗުގަލް އިން އޭނާ ބެންޗުގައި ބައިންދައިގެން ނިންމި ފުރަތަމަ މެޗެވެ.
ނޭޝަންސް ލީގުގައި ޑެންމާކާ ދެކޮޅަށް މާދަމާރޭ ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޯޗުގަލްގެ ކޯޗު، ޖޯޖް ޖީސޫސް ވަނީ ރޮނާލްޑޯއާ އެއްވެސް މައްސަލައެއް ނެތް ކަމަށާއި ޓީމުގެ ޓްރެއިނިންގައި ބައިވެރިވުމުގައި ވެސް ދެބަސްވުމެއް ނެތް ކަމަށް ބުނެފަ އެވެ.
"އެއްވެސް ކުޅުންތެރިއަކު، 20 ނޫނީ 30 މިނިޓް ވޯމަޕްކޮށްފައި ކުޅެން ނާރާނަމަ ހިތްހަމަނުޖެހުންތަކެއް ހުންނާނެ،" ރޮނާލްޑޯ އަށް އަލް ނަސްރުގައި މިދިޔަ ސީޒަނުގައި ކޯޗުކޮށްދިން ޖީސޫސް ބުންޏެވެ.
އޭނާ ބުނީ، ޕޯޗުގަލް ގައުމީ ޓީމާ ހަވާލުވީ ރޮނާލްޑޯ ހުރެގެން ނޫން ކަމަށެވެ. އަދި، ޕޯޗުގަލްއާ ހަވާލުވެ، މި ވަގުތު މައިގަނޑު އަމާޒަކީ ނޭޝަންސް ލީގު ކާމިޔާބުކުރުން ކަމަށާއި އެކަން ކުރަން ބަލަން ޖެހެނީ މުޅި ޓީމަށް ކަމަށް ވެސް ޖީސޫސް ވަނީ ބުނެފަ އެވެ.
ޖީސޫސް ބުނީ، ނޯވޭ މެޗުގެ ކުރިން ރޮނާލްޑޯ ގާތުގައި އެ މެޗުގެ ފުރަތަމަ އެގާރައިގައި އޭނާ ނެތްކަން އަންގާފައިވާނެ ކަމަށެވެ. އެކަމަކު، މެޗުގެ ވަކި ހިސާބަކުން ކުޅެން އަރުވަން ޖެހިދާނެކަން އެންގި ކަމަށް ވެސް އޭނާ ބުނެފައިވެ އެވެ.
ޕޯޗުގަލްގެ ނޫސްވެރިންގެ ބައްދަލުވުން ނިމުނުތާ ދެގަނޑިރެއްހާއިރު ފަހުން، ސޯޝަލް މީޑިއާގައި ރޮނާލްޑޯ ކުރި ޕޯސްޓެއްގައި ބުނެފައިވަނީ، ނޫސްވެރިންގެ ބައްދަލުވުމަށް ފަހު، ޖީސޫސް އާއި ޕޯޗުގަލްގެ ފުޓްބޯޅަ ފެޑެރޭޝަން ރައީސް، ޕެެޑްރޯ ޕްރޮއެންކާއާ އެކު ބޭއްވި ބައްދަލުވުމަށް ފަހު، ގައުމީ ޓީމުގެ ކޭމްޕް ދޫކޮށްލަން ނިންމާފައިވާ ކަމަށެވެ.
"ވަގުތު ޖެހުނީމަ އަހަރެން ޕޯޗުގަލްގެ ރައްޔިތުންނަށް ހިއްސާކުރާނަން އަހަރެން މި ނިންމުން ނިންމަން މެދުވެރިވި ސަބަބު. އަަބަދުވެސް އަހަރެން ގައުމީ ޓީމާ އެކު ހުރެފައި މި ގޮތަށް މިކަން ކުރަންޖެހުނީ ކީއްވެކަން،" ރޮނާލްޑޯ ލިޔެފައިވެ އެވެ.
"މި ވަގުުތަކީ ޕޯޗުގަލް އާއި ޓީމުގެ ހުރިހާ ކުޅުންތެރިންނަށް އިތުރު ކަމެއްގެ ވާހަކަ ދެއްކުމެއް ނެތި ކާމިޔާބަށް އެދެންޖެހޭނެ ވަގުތެއް،"
މީގެ 22 އަހަރު ކުރިން ޕޯޗުގަލް އަށް ކުޅެން ފެށި ރޮނާލްޑޯ އަކީ ބައިނަލްއަގުވާމީ ފުޓްބޯޅައިގައި ގައުމީ ޓީމަށް އެންމެ ގިނަ ގޯލު ޖެހުމުގެ ރެކޯޑް އޮތް ކުޅުންތެރިޔާ އެވެ. ހަ ވޯލްޑް ކަޕެއްގައި ޕޯޗުގަލް އަށް ކުޅެދިން ރޮނާލްޑޯ ވަނީ، ގައުމީ ޓީމަށް ކުޅެދިން، 234 މެޗުން 146 ލަނޑު ޖަހައިފަ އެވެ.
އެމެރިކާ، މެކްސިކޯ އަދި ކެނަޑާގައި މިދިޔަ ޖޫން/ޖުލައި މަހު ކުރިއަށްދިޔަ ފީފާ ވޯލްޑް ކަޕަށް ފަހު ޕޯޗުގަލްގެ ގައުމީ ފުޓްބޯޅަ ޓީމުން ރިޓަޔާކުރަން ވިސްނި ކަމަށް ރޮނާލްޑޯ ވަނީ މި ފަހަރުގެ ނޭޝަންސް ލީގާ ދިމާކޮށް ގައުމީ ޓީމާ ގުޅުމަށް ފަހު ދިން އިންޓަވިއުއެއްގައި ބުނެފަ އެވެ. ޕޯޗުގަލް، ވޯލްޑް ކަޕުން ކެޓީ ގަދަ 16 ބުރުގައި ސްޕެއިން އަތުން ބަލިވެގެންނެވެ. މުބާރާތުގެ ޗެމްޕިއަންކަން ހޯދީ ވެސް ސްޕެއިނުންނެވެ.
އެ އިންޓަވިއުގައި ރޮނާލްޑޯ ވަނީ ޕޯޗުގަލްގެ ގައުމީ ޓީމުުން އޭނާގެ ބޭނުންހިފަން ބޭނުންވި މުއްދަތަކަށް ޓީމާ އެކު ކުރިއަށްދާނެ ކަމަށް ބުނެފަ އެވެ. އަދި، މިހާރު ވެސް އޭނާގެ މުހިންމުކަން ޓީމަށް ބޮޑު ކަމަށް ވެސް ރޮނާލްޑޯ ބުނެފައިވެ އެވެ.
