ރާއްޖޭގެ ގައުމީ ފުޓްބޯޅަ ޓީމު ރަނގަޅަށް ކުރިއަށް ގެންދިއުމަށްޓަކައި ވަރުގަދަ ގިނަ މެޗުތަކެއް ކުޅުން މުހިންމު ކަމަށް ގައުމީ ފުޓްބޯޅަ ޓީމުގެ ކޯޗު، އަދި އެފްއޭއެމްގެ ޓެކްނިކަލް ޑިރެކްޓަރު، ހަންގޭރީގެ އިސްތަވާން އުރްބާނީ ބުނެފި އެވެ.
ބާރަ އަހަރަށް ފަހު، ރާއްޖޭގެ ކޯޗުކަމާ މި އަހަރުގެ ކުރީކޮޅުގައި އަލުން ހަވާލުވެ އުރްބާނީ މި ވަނީ މިހާތަނަށް ގައުމީ ސީނިއާ ޓީމާއި 20 އަހަރުން ދަށުގެ ޓީމާ އެކު، ޖުމްލަ ނުވަ މެޗު ރާއްޖެ އަށް ކޯޗުކޮށްދީފަ އެވެ. މޮޅުވީ، މިދިޔަ މާޗް މަހު މާލޭގައި ޓިމޯ ލެސްޓޭ އަތުންނެވެ. ފަސް މެޗުން ބަލިވިއިރު، ތިން މެޗުން ވަނީ އެއްވަރުވެފަ އެވެ.
މި ފަހަރުގެ އިންޓަނޭޝަނަލް ބްރޭކުގައި، އެންމެ ފުރަތަމަ ރާއްޖޭން ޗައިނާއާ ދެކޮޅަށް އެ ގައުމުގަައި ކުޅުނު މެޗުން މި މަހުގެ 24 ވަނަ ދުވަހު ވަނީ 3-0 އިން ބަލިވެފަ އެވެ. އަދި، ދެ ވަނަ މެޗުގައި މިދިޔަ ހޯމަ ދުވަހުގެރޭ ކިރްގިސްތާންގައި ކުޅެ، އެ ޓީމު އަތުން ވަނީ 5-0 އިން ބަލިވެފަ އެވެ.
"ޒުވާން ކުޅުންތެރިން ޓެސްޓްކުރުމަކީ ރަނގަޅު ކަމެއް، (ކިރްގިސްތާން މެޗުގައި) ފުރަތަމަ ހާފުގައި އެ ކުރި ގޮތަށް. އަދި އެއް މެޗު އެބައޮތް ކުޅެން. އަހަރެން އުންމީދުކުރަނީ މި ގޮތަށް ގިނަ މެޗުތަކެއް ކުޅުން،" ކިރްގިސްތާނުން ފުރަތަމަ ހާފުގައި ފަސް ގޯލު ޖަހައިގެން މޮޅުވި މެޗަށް ފަހު މީޑިއާ އަށް ދިން އިންޓަވިއުއެއްގައި އުރްބާނީ ބުންޏެވެ.
"މި މެޗުތައް ކުޅޭ އެންމެ ބޮޑު ސަބަބަކީ، ޗައިނާއާ ދެކޮޅަށް، ކިރްގިސްތާނާ ދެކޮޅަށް، ދެން އަހަރެމެން ލެބަނަންއާ މި ކުޅެނީ. މިއީ ވަރަށް ވަރުގަދަ ޓީމުތައް. މި ވަގުތަށް ބަލާކަމަށްވާނަމަ، މީގެއިން އަހަންނަށް ލިބޭ އެންމެ ބޮޑު ފުރުސަތަކީ، ކުޅުންތެރިން ބަލާލުން، އެ މީހުންގެ ކޮލިޓީ،"
މި މަަހު ނެރުނު ފީފާ ރޭންކިންގައި ޗައިނާ އޮތީ ދުނިޔޭގެ 93 ވަނައިގަ އެވެ. ކިރްގިސްތާން 106 ވަނައިގައި އޮތްއިރު، ލެބަނަން އޮތީ 114 ވަނައިގަ އެވެ. ރާއްޖެ އޮތީ، 172 ވަނައިގަ އެވެ.
ރާއްޖޭން މިހާރު ތައްޔާރުވަމުން އަންނަނީ، ނޮވެމްބަރު މަހު، ބަންގްލަދޭޝްގެ ވެރި ރަށް، ޑާކާގައި ބާއްވާ ސާފް ޗެމްޕިއަންޝިޕަށެވެ. އުރްބާނީ ބުނީ، ސާފް ޗެމްޕިއަންޝިޕް އަންނަނީ ވަރުގަދަވަމުން ކަމަށެވެ.
"(ސާފް ޗެމްޕިއަންޝިޕްގައި) އަހަރެމެން ކުޅެން ޖެހެނީ ޕާކިސްތާނާއި އިންޑިއާއާ ގްރޫޕް ސްޓޭޖުގައި ނޮވެމްބަރުގައި. މި މެޗުން (ކިރްގިސްތާން މެޗު) ވެސް އަހަންނަށް ވަރަށް ފީޑްބެކް ލިބިއްޖެ ކުޅުންތެރިންގެ، ކޮން މިސްރާބަކުންތޯ އަހަރެމެން ދާންވީ،" އުރްބާނީ ބުންޏެވެ.
މި ފަހަރުގެ މެޗުތަކަށް ދިއުމުގެ ކުރިން މާލޭގައި ބޭއްވި ނޫސްވެރިންގެ ބައްދަލުވުމުގައި އުރްބާނީ ވަނީ، ސާފް ޗެމްޕިއަންޝިޕްގެ ކުރިން ދެ މެޗު ކުޅެން ބޭނުންވާ ކަމަށް ބުނެފަ އެވެ.
އުރްބާނީގެ ކޯޗުކަމުގައި ރާއްޖޭން ކުޅުނު މެޗުތަކުގެ ތަފްސީލަށް ބަލާއިރު، ސީނިއާ ޓީމުން ޓިމޯ ލެސްޓޭ އަތުން 2-1 އިން ވަނީ މޮޅުވެފަ އެވެ. ސީނިއާ ބަލިވީ އަފްގާނިސްތާން (1-0)، ޕާކިސްތާން (3-0)، ޗައިނާ (3-0) އަދި ކިރްގިސްތާން (5-0) އަތުންނެވެ. ސީނިއާ ޓީމު ވަނީ ބަންގްލަދޭޝްގެ 23 އަހަރުން ދަށުގެ ޓީމާ 1-1 އިން އެއްވަަރުވެފަ އެވެ.
ރާއްޖޭގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕްގައި، އުރްބާނީގެ ކޯޗުކަމުގައި ރާއްޖެ ވަނީ ސްރީ ލަންކާ އަތުން 3-2 އިން ބަލިވެފަ އެވެ. އަދި، ބޫޓާނާ 0-0 އިން އެއްވަރުވިއިރު، ނޭޕާލާ އެއްވަރުވީ 1-1 އިންނެވެ.
ރާއްޖޭން ދެން އެންމެ އަވަހަށް ކުޅޭ މެޗަކީ، މި ފަަހަރުގެ އިންޓަނޭޝަނަލް ބްރޭކުގައި ކުޅޭ ފަހު މެެޗެވެ. އެއީ، މާދަމާ ލެބަނަންއާ ދެކޮޅަށް ކުޅޭ މެޗެވެ. ލެބަނަން އިން ވަނީ މިހާތަނަށް ރާއްޖެއާ ކުޅުނު ފަސް މެޗުން ވެސް މޮޅުވެފަ އެވެ. އެންމެ ފަހުން، ލެބަނަން އިން ރާއްޖެއާ ކުޅުނީ 2023 ވަނަ އަހަރު އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕްގެ ގްރޫޕް ސްޓޭޖުގަ އެވެ. ލެބަނަން އިން ވަނީ އެ މެޗުގައި ރާއްޖެ އަތުން 1-0 އިން މޮޅުވެފަ އެވެ. މާދަމާ ކުޅޭ މެޗު ފަށާނީ ރާއްޖެ ގަޑިން، 17:00 ގަ އެވެ.
