މެލޭޝިއާގައި އެންމެ ގިނަ ދުވަހު ބޮޑުވަޒީރުކަން ކުރެއްވި މަހާތީރު މުހައްމަދުގެ އަނބިކަނބަލުން އަދި އާންމު ސިއްހަތަށް ވަކާލާތު ކުރެއްވި ސިޓީ ހަސްމާ މުހައްމަދު އަލީ، އުމުރުފުޅުން 100 އަހަރުގައި މިއަދު އަވަހާރަވެއްޖެ އެވެ.
މަހާތީރުގެ އޮފީހުން މައުލޫމާތު ދިން ގޮތުގައި، ސިޓީ ހަސްމާގެ ޖަނާޒާ މިއަދު ހަވީރު ބޭއްވުމަށް ވަނީ ހަމަޖެހިފަ އެވެ. އަދި އެކަމަނާ ފަސްދާނުލުމަށް ހަމަޖެހިފައިވަނީ މެލޭޝިއާގެ އިދާރީ ވެރިރަށް ޕުތުރަޖާޔާގައި ހުންނަ މުސްލިމުންގެ ގަބުރުސްތާނެއްގަ އެވެ. ނަމަވެސް މިކަމާ ގުޅޭ އިތުރު ތަފްސީލެއް އެ އޮފީހުން ހާމައެއް ނުކުރެ އެވެ.
ބޮޑުވަޒީރު އަންވަރު އިބްރާހީމް ވަނީ ސިޓީ ހަސްމާ އަވަހާރަވުމާ ގުޅިގެން ތައުޒިޔާ ވިދާޅުވެފަ އެވެ. އަދި އެކަމަނާގެ ޖަނާޒާގެ ކަންކަން ދައުލަތުގެ ފުރިހަމަ އިއްޒަތުގައި ކުރިއަށް ގެންދިއުމަށް ހަމަޖެހިފައިވާ ކަމަށް ވެސް އަންވަރު ވިދާޅުވި އެވެ.
އަންވަރު ނެރުއްވި ބަޔާނެއްގައި ވިދާޅުވީ، ސިޓީ ހަސްމާގެ ފަރާތްޕުޅުން ފެނިގެންދިޔަ މައިވަންތަ ސިފަތަކާއި، އެކަމަނާ ގައުމަށް ކޮށްދެއްވި އަގުހުރި ޚިދުމަތްތަކާއި ގުރުބާނީތައް މެލޭޝިއާގެ ރައްޔިތުން އަބަދުވެސް ހަނދާން ކުރާނެ ކަމަށެވެ.
ސިޓީ ހަސްމާގެ ފިރިކަލުން، އުމުރުފުޅުން 101 އަހަރުގެ މަހާތީރު މުހައްމަދަކީ މެލޭޝިއާ ޒަމާނީ ގައުމަކަށް ހެއްދެވުމުގެ މޭސްތިރިޔާގެ ގޮތުގައި ބެލެވޭ ބޭފުޅެކެވެ. އެމަނިކުފާނު ވަނީ ދެ ފަހަރެއްގެ މަތިން، ޖުމްލަ 20 އަހަރަށް ވުރެ ގިނަ ދުވަހު ބޮޑުވަޒީރުކަން ކުރައްވާފަ އެވެ.
މަހާތީރުގެ ފުރަތަމަ ދައުރު ކަމަށްވާ 1981 އިން 2003 އަށް، މެލޭޝިއާގެ ސިނާއީ ދާއިރާއަށް ބޮޑެތި ކުރިއެރުންތަކެއް ގެންނަވައި، އެ ގައުމަކީ ދެކުނު އިރުމަތީ އޭޝިއާގެ އިގްތިސާދީ ގޮތުން އެންމެ ވަރުގަދަ އެއް ގައުމަށް ހެއްދެވި އެވެ.
މަލްޓި-ބިލިއަން ޑޮލަރުގެ ވަގުފު ފަންޑު، 1އެމްޑީބީގެ ކޮރަޕްޝަންގެ މައްސަލައިގައި ބައިވެރިވި އޭރުގެ ލީޑަރު ނަޖީބު ރައްޒާގު ބަލިކުރެއްވުމަށް ފަހު، 2018 ވަނަ އަހަރު މަހާތީރު އަލުން ވެރިކަމަށް ވަޑައިގަތީ އެ ގައުމުގެ އެންމެ ދުވަސްވީ ބޮޑުވަޒީރުގެ ގޮތުގަ އެވެ. ނަމަވެސް، ސިޔާސީ ކޯޅުންތަކުގެ ތެރެއިން 2020 ވަނަ އަހަރު އެމަނިކުފާނުގެ ކޯލިޝަން ރޫޅުމާ ގުޅިގެން، ދެވަނަ ދައުރު ދެ އަހަރު ނުވަނީސް ވަނީ ނިމުމަކަށް އައިސްފަ އެވެ.
މަހާތީރާއި ސިޓީ ހަސްމާ ފުރަތަމަ ބައްދަލުވީ 1940 ގެ ފަހުކޮޅު ސިންގަޕޫރުގައި މެޑިކަލް ސްކޫލުން ކިޔަވަމުން ދިޔަ ދުވަސްވަރު އެވެ. މިދިޔަ އޯގަސްޓް މަހު ކައިވެންޏަށް 70 އަހަރު ފުރުން ފާހަގަކުރި މި ދެމަފިރިންގެ ހަތް ބޭފުޅުން ތިއްބަވަ އެވެ. އޭގެ ތެރޭގައި ވިޔަފާވެރިޔާ މުޚްޒާނީ އާއި، އިޖުތިމާއީ ހަރަކާތްތެރިޔާ މަރީނާ މަހާތީރުގެ އިތުރުން ސިޔާސީ ބޭފުޅެއް ކަމަށްވާ މުޚްރިޒް މަހާތީރު ހިމެނިވަޑައިގަންނަވަ އެވެ.
ސިޓީ ހަސްމާއަކީ އަމިއްލަ ގޮތުން ވެސް އާންމުންގެ މެދުގައި މަގުބޫލު ބޭފުޅެކެވެ. މަހާތީރުގެ ހަރުކަށި އަދި ސީދާ ބަސްމަގާ ޚިލާފަށް، ސިޓީ ހަސްމާ ފާހަގަކުރެވިފައިވަނީ މަޑުމައިތިރި މިޒާޖެއްގެ، މަޖާ ބޭފުޅެއްގެ ގޮތުގަ އެވެ.
އެކަމަނާއަކީ މަހާތީރުގެ އުފަން ސްޓޭޓް ކަމަށްވާ ކެޑާގެ މެޑިކަލް އޮފިސަރެއްގެ މަގާމަށް އައްޔަންކުރި ފުރަތަމަ އަންހެން ބޭފުޅާ އެވެ. އަދި ބޮޑުވަޒީރުގެ އަނބިކަނބަލުންގެ ހައިސިއްޔަތުން، މައިންގެ ސިއްހަތާއި އާއިލާ ރޭވުމުގެ އިތުރުން އިޖުތިމާއީ އެކި ދާއިރާތަކުން އެކަމަނާ ވަނީ ގިނަ މަސައްކަތްތަކެއް ކުރައްވާފަ އެވެ.
މަހާތީރު ކުރިން ސިފަކުރައްވާފައިވާ ގޮތުގައި، އެމަނިކުފާނުގެ ކާމިޔާބީގެ ފަހަތުގައި ހުރި އެންމެ ވަރުގަދަ ތަނބަކީ ސިޓީ ހަސްމާ އެވެ. އަދި އެ ދުވަސްވަރު މެލޭޝިއާގެ މެލޭ ދަރިކޮޅުގެ އަންހެނުންގެ މެދުގައި ޔުނިވަސިޓީ ތައުލީމަކީ ނާދިރު ކަމަކަށް ވީނަމަވެސް، ޑިގްރީއެއް ހާސިލުކުރެއްވުމަށް ސިޓީ ހަސްމާ ކުރެއްވި ހިތްވަރަށް މަހާތީރު ތައުރީފު ކުރެއްވި އެވެ.
"އެކަމުން ދޭހަކޮށްދެނީ އެކަމަނާގެ ޝަޚްސިއްޔަތުގެ ވަރުގަދަކަން،" 2018 ވަނަ އަހަރު ސީއެންއެންއަށް ދެއްވި އިންޓަވިއުއެއްގައި މަހާތީރު ވިދާޅުވެފައިވެ އެވެ.
