މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގަށް އެހީތެރިވުމަށް އުފައްދާފައިވާ "ސޮލިޑަރިޓީ ފަންޑު" އަށް މި ސެޕްޓެމްބަރު މަހުގެ 27 ވަނަ ދުވަހާ ހަމައަށް 9.25 މިލިއަން މެލޭޝިއަން ރިންގިޓް ލިބިފައިވާ ކަމަށާއި، ނަމަވެސް އަމާޒު ހިފާފައިވާ 50 މިލިއަން ރިންގިޓަށް އަދިވެސް ވާސިލްނުވެވޭ ކަމަށް އެ ގައުމުގެ ބޮޑުވަޒީރުގެ ނައިބު އަހުމަދު ޒާހިދު ހާމިދީ ވިދާޅުވެއްޖެ އެވެ.
ޔޫއެމްއެންއޯ (އުމްނޯ) ޕާޓީގެ ރައީސްކަން ވެސް ކުރައްވާ ޒާހިދު ވިދާޅުވީ، ނަޖީބު ރައްޒާގު ގޭބަންދަށް ބަދަލުކުރުމުގެ އިންތިޒާމުތައް ފުރިހަމައަށް ތަންފީޒު ކުރެވޭނީ، މަދުވާ ފައިސާ އެއްކޮށް ހަމަކުރުމުން ކަމަށެވެ.
"މިއަދު ހެނދުނު 10:00 އާ ހަމައަށް އަޅުގަނޑުމެންނަށް ޖުމްލަ އެއްކުރެވިފައިވަނީ 9.25 މިލިއަން ރިންގިޓް،" ޒާހިދު ވިދާޅުވި އެވެ.
އޭނާ އިތުރަށް ވިދާޅުވީ، "މިއީ އަމާޒު ހިފާފައިވާ 50 މިލިއަން ރިންގިޓާ އަޅާބަލާއިރު އަދިވެސް ވަރަށް މަދު އަދަދެއް. އާންމުންގެ އެހީތެރިކަމާއެކު ފައިސާ ހޯދުމުގެ މަސައްކަތް މެދުނުކެނޑި ކުރިއަށްދާއިރު، 'ޕާޑަންސް ބޯޑު' ނުވަތަ މާފުދޭ ބޯޑުން ކަނޑައަޅާފައިވާ އަދަދަށް ފައިސާ ހަމަކުރުމަށް ކުރިއަށް އޮތް ތަނުގައި އެކުވެރިންގެ އެހީތެރިކަން ލިބޭނެ ކަމަށް އުންމީދު ކުރަން."
މި ސެޕްޓެމްބަރު މަހުގެ 27 ވަނަ ދުވަހު ބޭއްވި "މެލޭޝިއަން މައްކަލް ސަކްތީ ޕާޓީ" ގެ 18 ވަނަ އާންމު މަޖިލިސް އިފްތިތާހު ކޮށްދެއްވުމަށްފަހު ނޫސްވެރިންނާ ވާހަކަދައްކަވަމުން ޒާހިދު ވިދާޅުވީ، ނަޖީބު ރައްޒާގު ގޭބަންދަށް ބަދަލުކުރުމުގެ ކަންކަން ފުރިހަމަ ކުރެވޭނީ އެ ފައިސާ އެއްކޮށް ދައްކައި ނިންމުމުން ކަމަށެވެ.
އުމްނޯ ޕާޓީން މި ފަންޑު ހުޅުވާފައިވަނީ، ޝަރުތުތަކަކާއެކު ނަޖީބަށް މާފުދީ، އޭނާގެ ޖަލު ހުކުމުގެ ބާކީ އޮތް ބައި 2028 އޮގަސްޓް 23 ގެ ނިޔަލަށް ގޭބަންދުގައި ހުރެ ފުރިހަމަކުރުމުގެ ފުރުސަތު ދިނުމަށް ނިންމުމާ ގުޅިގެންނެވެ. ނަމަވެސް މި ލުއި ލިބޭނީ ޖޫރިމަނާގެ ގޮތުގައި ކަނޑައަޅާފައިވާ 50 މިލިއަން ރިންގިޓް ދެއްކުމާއި، ކަނޑައަޅާފައިވާ އެހެނިހެން ޝަރުތުތަކަށް އަމަލުކުރުމުންނެވެ.
