މަހުޖަނުން ދިރިއުޅުމަށް ބޮޑު ސިޓީއެއް ތަރައްގީކުރުމަށް ރަސްމާލެއިން 500 ހެކްޓަރުގެ ބިން ޔޫއޭއީގެ އީގަލް ހިލްސްއަށް ދޭއިރު އެންމެ ބޮޑު އެއް މައްސަލައަކީ އެޑްވާންސަށް ދިވެހި ދައުލަތަށް އެއްވެސް ފައިސާއެއް ނުލިބުން ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޔޫއޭއީގެ އީގަލް ހިލްސް އަށް ރަސްމާލެ ދޫކޮށްލަން ސަރުކާރުން އެއްބަސްވީ 99 އަހަރަށެވެ. ރަސްމާލެއިން އެޕާޓްމަންޓެއް ގަންނަ ބިދޭސީ މީހާއަށް ލިބޭ 99 އަހަރުގެ ލީސް މުއްދަތުގައި އެތަން ވިއްކާލައިފި ނަމަ ނުވަތަ ހިބައިން ދީފި ނަމަ 99 އާ ލީސް މުއްދަތެއް ފެށޭނެ އެވެ.
މިއަދު އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވި ގޮތުގައި ރެޒިޑެންސީ ޕްރޮގްރާމަކަށް ހުޅުވާލުމަކީ އުސޫލީ ގޮތުން ރަނގަޅު ކަމެކެވެ. އެހެން ނަމަވެސް، އީގަލް ހިލްސްގެ ކޮންޓްރެކްޓް ހާމަކޮށްފައި ނެތުމުން މިހާތަނަށް އޭގައި އޮތް އެއްޗެއް އެނގިވަޑައިނުގަންނަވާ ކަމަށް ނަޝީދު ވިދާޅުވި އެވެ.
"މިހާތަނަށް އިވުނު ވާހަކަތަކުން އަޅުގަނޑަށް އޮތީ ދެ މައްސަލައެއް، އެޑްވާންސަށް ފައިސާ ނުލިބުން، މާލެ ސަރަހައްދުގައި އެ ތަން ހަދާކަން،" ނަޝީދު ލިޔުއްވި އެވެ.
ސަރުކާރަށް އެންމެ ރަނގަޅު ގޮތަކަށް ވާނީ މަޝްރޫއުގެ ކޮންޓްރެކްޓް ރައްޔިތުންގެ މަޖިލީހަށް ފޮނުވުން ކަމަށް ނަޝީދު ވިދާޅުވި އެވެ. އަދި ސަރުކާރުގެ މެޖޯރިޓީ ބޭނުންކޮށްގެން މަޝްރޫއުއަށް ބޭނުންވާ ގާނޫނީ އޮނިގަނޑު ފާސްކުރުވިދާނެ ކަމަށް ނަޝީދު ވިދާޅުވި އެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ވަޒީރު މުއްތަލިބު ވިދާޅުވީ ރަސްމާލޭގައި އަޅާ އިމާރާތްތައް ވިއްކައިގެން ދައުލަތަށް ތިން ބިލިއަން ޑޮލަރު ނުވަތަ 46 ބިލިއަން ރުފިޔާ 10 އަހަރު ތެރޭގައި ލިބޭނެ ކަމަށެވެ. އެއީ މިދިޔަ އަހަރު ބަޖެޓަށްވުރެ ވެސް ކުޑަ އަދަދެކެވެ.
