އަމްސްޓެޑަމް، ނެދަލެންޑްސް (ސެޕްޓެމްބަރު 29) - ޔުއެފާ ނޭޝަންސް ލީގުގައި އެންމެ ފަހުން، ނެދަލެންޑްސް އިން ކުޅުނު މެޗުގައި އަނިޔާވެގެން ބަދަލުކުރަން ޖެހުނު، ކޯޑީ ގަކްޕޯ އަށް ލިބުނު އަނިޔާ ސީރިއަސް ވުމުގެ ބިރު އެބައޮތް ކަމަށް މީޑިއާ ތަކުން ރިޕޯޓްކޮށްފި އެވެ.
ނެދަލެންޑްސް އިން ނޭޝަންސް ލީގުގައި ސާބިއާ އަތުން 2-1 އިން މޮޅުވި މެޗުގެ 17 ވަނަ މިނިޓްގައި ގަކްޕޯ ވަނީ ބަދަލުކުރަން ޖެހިފަ އެވެ. އެއީ، ސާބިއާގެ ސާސާ ލުކިޗް ބޯޅަ ހޯދަން ކުރި ޓެކަލް އަކުން ގަކްޕޯގެ ފައިގެ ކުޑަ ހުޅަށް ލިބުނު އަނިޔާކެވެ. އޭގެ ސަބަބުން ގަކްޕޯ ބަދަލުކުރަން ޖެހުނުއިރު، އިންޓަނޭޝަނަލް ބްރޭކުގައި ބާކީ ނެދަލެންޑްސް އަށް އެއް މެޗު އޮއްވައި، ގަކްޕޯ ވަނީ އެނބުރި އޭނާ ކުޅެމުން އަންނަ ކްލަބް ލިވަޕޫލަށް އައިސްފަ އެވެ.
ސާބިއާ މެޗަށް ފަހު، ނެދަލެންޑްސްގެ ކޯޗު، ޒަވީ ހެނާންޑޭޒް ވަނީ ގަކްޕޯގެ އަނިޔާއާ ގުޅޭ ގޮތުން އަމާޒުވި ސުވާލުތަކަށް ޖަވާބުދީފަ އެެވެ. ޒަވީ ބުނީ، ލިބުނު އަނިޔާ އަކީ ކުޑަ ހުޅަށް ދިމާވި ކަމެއް ކަމަށްވާތީވެ، ކުޅުމާ ދުރަށް ދާން ޖެހޭނީ ކިހާ މުއްދަތަކަށް ކަމެއް އެނގޭނީ ޓެސްޓްތަކެއް ހަދައި، ފުރިހަމަ އަށް ކަންކަން ބަލައިގެން ކަމަށެވެ.
އެ ގޮތުން، ފުރަތަމަ ހެދި ޓެސްޓްތަކުން ގަކްޕޯގެ ކުޑަ ހުޅަށް ލިބުނު އަނިޔާ ސީރިއަސް ކަމަށް ބެލެވޭތީވެ، އޭނާ ގައުމީ ޓީމުގެ ކޭމްޕް ދޫކޮށްލުމަށް ނެދަލެންޑްސްގެ ޑޮކްޓަރުންނާއި ލިވަޕޫލްގެ މެޑިކަލް ޑިޕާޓްމަންޓުން ނިންމީ އެވެ.
މި ފަހަރުގެ ޓްރާންސްފާގައި، 100 މިލިއަން ޑޮލަރަށް މެންޗެސްޓާ ސިޓީ އަށް ބަދަލުވުމާ ގާތަށް ދިޔަ ގަކްޕޯ، ލިވަޕޫލްގައި މަޑުކޮށް، އެ ޓީމުގެ ކޯޗު އަންޑޯނީ އިރައޯލާގެ ޕްލޭނުގެ މުހިންމު ކުޅުންތެރިއަކަށް ވަނީ ވެފަ އެވެ. ނެދަލެންޑްސްގެ މީޑިއާ ރިޕޯޓްތައް ބުނާގޮތުން، ގަކްޕޯ އަށް މަހެއްހާ ދުވަސް ކުޅުމާ ދުރުގައި ހުންނަން ޖެހުމުގެ ފުރުސަތު އެބައޮތެވެ.
އިންޓަނޭޝަނަލް ބްރޭކަށް ފަހު ލިވަޕޫލުން އެންމެ ފުރަތަމަ ކުޅެން ޖެހޭ މެޗަކީ، އިނގިރޭސި ޕްރިމިއާ ލީގުަގަައި މެންޗެސްޓާ ސިޓީއާ ދެކޮޅަށް އަމިއްލަ ދަނޑުގައި ކުޅޭ މެޗެވެ.
މީގެ ތިން އަހަރު ކުރިން، ހަ އަހަރުގެ ކޮންޓްރެކްޓެއްގައި، ޕީއެސްވީ އައިންދޯވަން ދޫކޮށް، ލިވަޕޫލަށް ގަކްޕޯ ސޮއިކުރީ 50 މިލިއަން ޑޮލަރުގެ ޑީލެއްގަ އެވެ. ގަކްޕޯ، އެންމެ ފަހުން، ލިވަޕޫލާ އެކު ސޮއިކުރި ކޮންޓްރެކްޓް އޮތީ 2030 ވަނަ އަހަރުގެ ޖޫން މަހުގެ ނިޔަލަށެވެ. ގަކްޕޯ ވަނީ ލިވަޕޫލަށް 51 ގޯލު ޖަހައިދީފަ އެވެ.
