އަމްސްޓެޑަމް، ނެދަލެންޑްސް (ސެޕްޓެމްބަރު 24) - ޔާގަން ކްލޮޕްގެ ކޯޗުކަމުގައި ކުޅޭ ޖަރުމަނާ ދެކޮޅަށް ކުޅޭ މެޗަކުން އޭނާގެ ނެދަލެންޑްސް ކެރިއަރު ފެށުމަކީ އުފަލެއްގެ ގޮތުގައި ދެކޭ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
އެމެރިކާ، މެކްސިކޯ އަދި ކެނަޑާގައި މި ފަހަރު ކުރިއަށްދިޔަ ވޯލްޑް ކަޕްގެ ގަދަ 32 ޓީމުގެ ބުރުން ނެދަލެންޑްސް ކެޓުމުން އެ ޓީމުގެ ކޯޗަކަށް ހުރި ރޮނާލްޑް ކޫމަން ވަނީ މަގާމުން ވަކިވެފަ އެވެ. އޭގެ ފަހުން، ނެދަލެންޑްސް ފުޓްބޯޅަ ފެޑެރޭޝަނުން ޒަވީ އަށް ކޮންޓްރެކްޓް ދިނީ 2030 ވަނަ އަހަރުގެ ވޯލްޑް ކަޕްގެ ނިޔަލަށެވެ.
ބާސެލޯނާގެ ކުރީގެ ކޯޗު ޒަވީ އަކީ، 1978 ވަނަ އަހަރުގެ ފަހުން ނެދަލެންޑްސް އަށް ކޯޗުކޮށްދޭ އެ ގައުމުން ބޭރުގެ ފުރަތަމަ ކޯޗެވެ. އެ ފަހަރު ނެދަލެންޑްސްގެ ކޯޗަކަށް ހުރީ އޮސްޓްރިއާގެ އާންސްޓް ހަޕެލް އެވެ.
ޒަވީއާ އެކު، ނެދަލެންޑްސް އިން ކުޅޭ ފުރަތަމަ މެޗުގައި މިރޭ، ޔުއެފާ ނޭޝަންސް ލީގުގައި ޖަރުމަނާ ދެކޮޅަށް ކުޅޭނެ އެވެ. މިއީ، ވޯލްޑް ކަޕަށް ފަހު، ޖަރުމަނު ކޯޗުކަމުން ވަކިކުރި ހޫލިއަން ނާގަލްސްމަންގެ ބަދަލުގައި އެ ޓީމަށް ގެނައި ލިވަޕޫލާއި ބޮރޫޝިއާ ޑޯޓްމަންޑްގެ ކުރީގެ ކޯޗު ކްލޮޕް، ޖަރުމަނާ އެކު ނުކުންނަ ފުރަތަމަ މެޗެެވެ.
"އަހަރެެމެން އެންމެ މޮޅު ފުޓްބޯޅަ ފުރަތަަމަ މެޗުގައި ވެސް ކުޅެން ޖެހިފައި މި އޮތީ. އެއީ، ޖަރުމަނަކީ ވަރަށް ވަރުގަދަ ޓީމެއް،" ޒަވީ ބުންޏެވެ.
"ވާދަވެރިކަން މިހާރު ވެސް އިހުސާސް އެބަވޭ. އަހަރެމެން ޓީމުގައި ތިބި އެންމެން ވެސް މި މެޗަށް މިހާރު މި ތައްޔާރުވަނީ. އަހަރެމެން ގައުމީ ޓީމުގެ ދަތުރު އެކުގައި ފަށަން މިއީ ވަރަށް ރަނގަޅު މެޗެއް،"
ޒަވީ ވަނީ ޖަރުމަނު ކޯޗުކަމާ ހަވާލުވި ކްލޮޕަށް ތައުރީފުކޮށް ވާހަކަ ދައްކައިފަ އެވެ.
"ކްލޮޕަކީ މި ވޭތުވެދިޔަ އަހަރުތަކުގައި ފެނިގެންދިޔަ އެންމެ މޮޅު އެއް ކޯޗު. އަހަންނަށް ވަރަށް ރަނގަޅު ޗެލެންޖެއް މިއީ. އަދި، މުޅި ޓީމަށް ވެސް ކަންކަން ދަސްވާނެ މެޗުތަކެއް މިއީ،" ޒަވީ ބުންޏެވެ.
އޭނާ ބުނީ، މެޗުން މޮޅުވުމަކީ ހުރިހާ ވެސް އަމާޒު ކަމަށާއި އެކަމާ އެއްވަރަށް ޕްލޭނެއް އޮވެގެން މަަސައްކަތް ފަށާ ކަމުގެ ޔަގީންކަން ކުޅުންތެރިންނާއި ސަޕޯޓަރުންނަށް ލިބޭ ގޮތަށް މި މެޗު ގެންދިއުުމަކީ ވެސް ބޮޑު ޓާގެޓެއް ކަމަށެވެ. އަދި، ފުރަތަމަ ދުވަހުން ފެށިގެން އޭނާގެ ފިލޯސަފީއާ އެއްގޮތަށް ޓީމުގައި މަސައްކަތް ފަށަން ބޭނުންވާ ކަމަށް ޒަވީ ވަނީ ބުނެފަ އެވެ.
ޖަރުމަނާއި ނެދަލެންޑްސް ފަށާނީ ކުޅޭ މެޗު ފަށާނީ ރާއްޖެ ގަނޑިން 23:45 ގަ އެވެ.
