ރައީސް މުހައްމަދު މުއިއްޒުގެ ނަން ގެނައުމުން އެމަނިކުފާނުގެ ސަޕޯޓަރުން އަތް ޖަހަނީ ނޯތު ކޮރެއާގައި އަތްޖަހާ ގޮތަށް ކަމަށް ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމަންޓްރީ ގްރޫޕްގެ ލީޑަރު އިބްރާހިމް ފަލާހު މިރޭ ވިދާޅުވެއްޖެ އެވެ.
ޕީއެންސީން ބޭއްވި ހަރުގެ ޖަލްސާގައި ފަލާހު ވިދާޅުވީ މުއިއްޒުގެ ނަން ގެނައުމުން އަތްޖަހާ ގޮތުން އެމަނިކުފާނު ދެކެ ލޯބިވާކަން އެނގޭ ކަމަށެވެ. އޭނާ ވިދާޅުވީ ކުރީގެ ރައީސް އަބްދުﷲ ޔާމީން ވާހަކަ ދެއްކެވުމުން ސަޕޯޓަރުން އަތްޖަހާ ގޮތާއި މުއިއްޒުގެ ނަން ގެނައުމުން ސަޕޯޓަރުން އަތްޖަހާގޮތް ވަރަށް ތަފާތު ކަމަށެވެ.
"ތި ޖައްސަވަނީ ހަގީގީ އަތްތިލަބަޑި. ތި އަތްތިލަބަޑި ޖައްސަވާ ގޮތުންވެސް އެބަ އެނގޭ ތި ބޭފުޅުން އަޅުގަނޑުމެންގެ ރައީސްދެކެ ވަރަށް ލޯބިފުޅުވާކަން. އެއީ ޔާމީނުގެ ވާހަކަ ދެއްކީމަ އަތްޖަހާ ގޮތާއި، އަޅުގަނޑުމެންގެ މިއަދުގެ ރައީސުލްޖުމްހޫރިއްޔާގެ ވާހަކަފުޅު ގެނައީމަ އަތްޖައްސަވާގޮތް ވަރަށް ތަފާތު،" ފަލާހު ވިދާޅުވި އެވެ.
"އަޅުގަނޑުމެންގެ މިއަދުގެ ރައީސުލްޖުމްހޫރިއްޔާގެ ނަން އަޅުގަނޑު ގެނައީމަ ތިބޭފުޅުން އަތްޖައްސަވާއިރު ވަރަށް ލޯބިން އެއްކަލަ ކޮންމެވެސް އުތުރު ކޮރެއާއެއްތޯ ކޮންމެވެސް ކޮރެއާއެއްގައި ޖަހާނެ އެގޮތަށް. ވަރަށް ރީތި އެނގޭތޯ އެ ގޮތް."
ފަލާހު ވިދާޅުވީ ޔާމީނުގެ ސަޕޯޓަރުން އަތްޖަހާގޮތުން އެމަނިކުފާނު ދެކެ ރައްޔިތުން ނުރުހޭކަން ސާފުވާ ކަމަށާއި އަތްޖަހާގޮތް ވަރަށް ގޯސްކަން ފާހަގަކުރެވޭ ކަމަށެވެ.
ނޯތު ކޮރެއާގެ ރައްޔިތުން އަތްޖައްސަވާގޮތް ވަރަށް ރީތިކަމަށް ފަލާހު ވިދާޅުވިއިރު، އެ ގައުމަކީ ކޮމިއުނިސްޓް ގައުމެކެވެ. މުޅި ދުނިޔޭގައިވެސް އޮތް އެންމެ ހުދުމުހުތާރު ތިން ގައުމު ތެރޭގައި ނޯތު ކޮރެއާ ހިމެނެ އެވެ.
މީގެއިތުރުން ފަލާހު ވިދާޅުވީ ޕީއެންސީގެ ސަޕޯޓަރުންގެ މޫނުމަތިން ފެންނަނީ އުފާވެރިކަމާއި ހިނިތުންވުން ކަމަށެވެ. އޭގެތެރޭގައި ލީޑާޝިޕްގެ ބޭފުޅުންނާއި އާންމު މެންބަރުންވެސް ހިމެނޭ ކަމަށް އޭނާ ވިދާޅުވި އެވެ.
