މިދިޔަ ހޮނިހިރު ދުވަހު ސަރުކާރު ހިންގާ ޕީއެންސީން ބޭއްވި ޖަލްސާގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި މަޖިލީހުގެ ޕާލަމަންޓްރީ ގްރޫޕްގެ ލީޑަރު އިބްރާހިމް ފަލާހް އަދި ބާރަށު ދާއިރާގެ މެންބަރު އިބްރާހިމް ޝުޖާއު ވަނީ ކުރީގެ ރައީސް އަބްދުﷲ ޔާމީނަށް ވަރަށް ބޮޑަށް ފާޑުވިދާޅުވެފަ އެވެ. އެއާއެކު ޕީއެންއެފްއިން ރޭ ބޭއްވި ޖަލްސާގައި ޔާމީނު ވަނީ އެ ތިން ބޭފުޅުންނަށް ރައްދު ދެއްވައި، އިންޒާރުތައް ވެސް ދެއްވާފަ އެވެ.
ޔާމީނު ވިދާޅުވީ އެ ތިން ބޭފުޅުންނަކީ އެމަނިކުފާނާ ގާތް ބޭފުޅުން ނޫން ކަމަށާއި އެއީ ތަގައްޔަރުވެފައި ތިއްބެވި "ތިން ކެނާ" ކަމަށެވެ. އެ ބޭފުޅުން ޖަލްސާގައި ދެއްކެވި ވާހަކައިން ރައީސް މުހައްމަދު މުއިއްޒު ފަލީހަތްވުން ނޫން ކަމެއް ނުވާ ކަމަށް ވެސް ޔާމީނު ވިދާޅުވި އެވެ. އެމަނިކުފާނު ވިދާޅުވީ އެ ތިން ބޭފުޅުން ތެރޭގައި އިލްމީ ބަހުސެއް ކޮށްލަން ވެސް އެނގޭ ބޭފުޅަކު ނެތް ކަމަށެވެ.
ޔާމީންގެ ބަހުން "ތިން ކެނާ" އަށް ރައްދުގައި ތުހުމަތުތައް ކުރައްވަމުން ޔާމީނު ވިދާޅުވީ އެ ބޭފުޅުންގެ މައްސަލަތައް ބެލޭނެ ކަަމަށެވެ. އޭގެ އިތުރުން އެ ބޭފުޅުން ދެއްކި ވާހަކަތައް އެބޭފުޅުންނާ އަރާ ހަމަނުކުރާނެ ކަމަށް ވެސް ޔާމީނު ވިދާޅުވި އެވެ.
"ތި ޕާޓީގެ މޫނުމައްޗަށް ތި ދައްކަނީ ތަގައްޔަރުވެފައި ތިބި މީހުން ބަލައިނުގަންނަ ތިން ކެނާ ތިދައްކަނީ. ޓިނު އަދުރޭ އާއި ބާރަށު މައިކާއި، ތެޔޮ ފަލާހާ. ތިއީ ތިދައްކާ ބަޔަކީ. މިއަދުގެ ޒުވާނުންގެ ވޯޓު ހޯދަން ނުކުމެބަލަ. މިއަދުގެ އިލްމީ މީހުންނާ ބަހުސެއް ކޮށްލަން ނުކުމެބަލަ. އަދި ތިމީހުން މަޖިލީހުގައި ތިބޭއިރު ރާއްޖެއިން ބޭރުން އަންނަ ވަފުދަކާ ބައްދަލުކޮށްލަބަލަ،" ޔާމީން ވިދާޅުވި އެވެ.
"ތިތާކު ނެތޭ ތިކަން ކުރެވޭވަރުގެ މީހުންނެއް. އެހެންވީމަ ރަނގަޅުވާނީ މުއިއްޒުވެސް ފަލީހަތް ނުވާނީ މި މީހުން ނެރުވައިގެން ތިކަން ނުކޮށް، މުއިއްޒުވެސް ތަންކޮޅެއް ތަންދޮރު ދަންނަ އިލްމީ މީހުން ނެރެފިކަމަށްވަންޏާ ތިކަންވާނެ."
އަސްލު އަނބިދަށުވީ އަބްދުއްރަހީމް: ޔާމީން
ޕީއެންސީގެ ޖަލްސާގައި އަބްދުއްރަހީމް ވަނީ ޔާމީނަށް ވެރިކަން ގެއްލުނު ސަބަބުތައް ލިސްޓު ކުރައްވަމުން، އަނބިދަށުވުން ހިމެނޭ ކަމަށް ވިދާޅުވެފަ އެވެ. އަަބްދުއްރަހީމްގެ މި ވާހަކަތަކަށް ރައްދު ދެއްވަމުން ޔާމީނު ވިދާޅުވީ އަނބިމީހާއާ އޮންނަ ގާތް ގުޅުމެއް އޮތުމަކީ ލަދު ގަންނަންވާ ވަރުގެ ކަމެއް ނޫން ކަމަށާއި ދަރިން ތަރުބިއްޔަތު ކުރަން ބޭނުންވަނީ އަނބިންދެކެ ލޯބިވާ ބައެއް ގޮތުގައި ކަމަށެވެ.
"ދެން އަނބިމީހާއާ އޮންނަ ގާތް ގުޅުމެއް އޮތުމަކީ އަޅުގަނޑު ލަދު ގަންނަ ކަމެއް ނޫން އެނގޭތޯ. އެއީ ދެއްތޯ އަޅުގަނޑުމެންގެ އާއިލާގެ ފެށުމަކީ ދެއްތޯ. އަޅުގަނޑު އަންހެނުންނަކީ އަޅުގަނޑުގެ ކުދިންގެ މަންމަ،" ޔާމީނު ވިދާޅުވި އެވެ.
"އަޅުގަނޑުގެ ކުދިން އިރާދަކުރެއްވިއްޔާ އަޅުގަނޑުމެން ތަރިބިއްޔަތު ކުރަން ބޭނުންވަނީ މިގޮތަށް. އެހެންވީމަ އަބްދުއްރަހީމަށް އެނގިލައްވާނެ ތިހެން އަނބިދަށުވާ ވާހަކަ ދެއްކެވިޔަސް އަސްލު ކޮންމެ މީހަކު ވެސް އެ މީހަކު އަމިއްލައަށް އޭނަގެ ހަން ކަހާލާފައި އަޑީގައި ހުރީ ކޯއްޗެއްތޯ ބަލައިލަން ރަނގަޅުވާނެ."
ޔާމީން ވިދާޅުވީ އަބްދުއްރަހީމްގެ "ދުއްޕާން" ބޮޑުވެގެން އޭނާ ޕާޓީއާ ކުރިން ދުރުކޮށްލި ކަމަށެވެ. މިހެން ހެދުމުން، ޔާމީން ވިދާޅުވީ، އަބްދުއްރަހީމް އޭނާގެ އަނބިކަނބަލުން ފާތުމަތު އިބްރާހިމް އަރިހަށް ވަޑައިގެން އާދޭސް ދެންނެވި ކަމަށެވެ. އަބްދުއްރަހީމަށް ޕާޓީން އަލުން ފުރުސަތު ލިބުނީ މި އާދޭސްތަކާ ހެދި ކަމަށް ޔާމީން ވިދާޅުވި އެވެ.
"އަބްދުއްރަހީމްގެ ދުއްޕާން ބޮޑުވެގެން އަޅުގަނޑު އެއްފަހަރު އަބްދުއްރަހީމް ހަތަރު ކޮއިލުން ބޭރަށްލިން. ހަމަ ކައިރި ނުކުރިން ޕާޓީއާ. ދެން އެއްކަލަ އަނބިދަށުވެފައި ހުރި މެޑަމް ކައިރިއަށޭ އޭނަ އައިސް އާދޭސްކުރީ. ހަމަ މެޑަމް ކައިރިއަށް އައިސް އޭނަ އެތައް ވަރަކަށް އާދޭސްކޮށްގެން އަނެއްކާ ފުރުސަތެއް ދިނީ. މި މީސްމީހުންގެ ވާހަކަ އަޅުގަނޑުމެން ނުދައްކަނީ މި މީސްމީހުންނަކީ މި މީހުންނާ ބެހޭ މިކަހަލަ ވާހަކަ ދައްކަން އެވަރުގެ ބައެއް ނޫނޭ މިއީކީ،" ޔާމީން ވިދާޅުވި އެވެ.
ޔާމީން ދެން ތުހުމަތުކުރެއްވި ގޮތުގައި މި ސަރުކާރު އައި ފަހުން އަބްދުއްރަހީމް އޭނާގެ އަނބިކަނބަލުންނަށް 100 އެތައް މިލިއަން ރުފިޔާގެ ލޯނެއް ހަމަޖައްސާފަ އެވެ. އެއާ ހިލާފަށް އެމަނިކުފާނު ރައީސް ކަމުގައި ހުންނެވިއިރު، އަނބިކަނބަލުންނަށް އެއްވެސް ލޯނެއް ނުދޭ ކަމަށް ޔާމީން ވިދާޅުވި އެވެ.
"މިސާލަކަށް މި ސަރުކާރުގައި ބެންކް އޮފް މޯލްޑިވްސް ތެރެއިން އަބްދުއްރަހީމްގެ އަންހެނުންނަށް 100 އެތައް މިލިއަން ރުފިޔާއެއްގެ ލޯނެއް ހަމަޖައްސައިގެން މިއުޅެނީ ކޮންމެވެސް ކަހަލަ މަޝްރޫތަކެއް ހިންގަން. އަޅުގަނޑު ވެރިކަންކުރިން. އަޅުގަނޑު އަންހެނުންނަކަށް ލޯނެއް ހަމަޖައްސައެއް ނުދެން. އެހެންވީމަ ކާކުބާ އަނބިދަށުވެފައި ހުރީ. ކާކުބާ އަނބިދަށުވެފައި ހުރީ،" ޔާމީނު ވިދާޅުވި އެވެ.
އަބްދުއްރަހީމުގެ ރެހެންދި ފްލެޓާއި މަސް މާރުކޭޓު ޑީލާ ގުޅޭ ބޮޑު ތުހުމަތެއް
އަބްދުއްރަހީމަކީ ޔާމީނުގެ ސަރުކާރުގައި އެންމެ ގިނައިން ނާޖާއިޒް ފައިދާ ނެންގެވި ބޭފުޅާ ކަމަށް ޔާމީނު ވިދާޅުވި އެވެ. ޔާމީނު ތުހުމަތުކުރައްވާ ގޮތުގައި އެމަނިކުފާނުގެ ސަރުކާރުގައި އަބްދުއްރަހީމް ރެހެންދި އެޕާޓްމަންޓުން ފްލެޓެއް ވެސް ހޯދީ ނާޖާއިޒް ގޮތުގަ އެވެ. އެގޮތުން ވިޔަފާރިވެރިއަކަށް ޔާމީނުގެ ނަން ގެންނަވައިގެން އަބްދުއްރަހީމް އެ ފްލެޓް ހޯއްދެވީ ހުޅުމާލެއިން އެ ވިޔަފާރިވެރިޔާއަށް ފްލެޓެއް ހަމަޖައްސައިދެއްވައިގެން ކަމަށް ޔާމީން ވިދާޅުވި އެވެ.
މި މައްސަލަތަކަކީ ކުރިއަށް އޮތްތަނުގައި ބަލާނެ މައްސަލަތައްކަން ފާހަގަކުރައްވާ ޔާމީން ވިދާޅުވީ އެ ކަންކަން ކުރެއްވިކަން އެމަނިކުފާނަށް މިހާރު އެނގޭ ކަމަށެވެ. އޭގެ އިތުރުން ވެސް އަބްދުއްރަހީމް ކުރައްވާފައިވާ ގިނަ ކަންކަން އެނގިލައްވާ ކަމަށް ޔާމީން ވިދާޅުވި އެވެ.
"އަބްދުއްރަހީމޭ. އަޅުގަނޑު ސަރުކާރުގައި ވެސް އެންމެ ނާޖާއިޒް ފައިދާތައް ނަގާފައި ހުރީ އަބްދުއްރަހީމޭ އެނގޭތޯ. އަބްދުއްރަހީމަށް އެނގިލައްވާނެ އަބްދުއްރަހީމް މިހާރު އެ އުޅުއްވަނީ ނޫންތޯ ރެހެންދި ފްލެޓުގެ އެޕާޓްމަންޓެއް ނަގައިގެން. އަބްދުއްރަހީމަށް އެނގިލައްވާނެ. ދެތަން ނަގާފައި ހުރީ. އަބްދުއްރަހީމަށް އެނގިލައްވާނެ އެތަނަށް އަބްދުއްރަހީމް ލާރި ހޯދި ގޮތް އަޅުގަނޑަށް އެނގޭކަން. އެނގޭތޯ. ޓިނު ވިއްކައިގެން ހޯދި ލާރިއެއް ނޫން އެއީ،" ޔާމީން ވިދާޅުވި އެވެ.
"އަބްދުއްރަހީމް ޓިނު ވިއްކައިގެން ހޯދި ލާރިއެއް ނޫން. އަބްދުއްރަހީމަށްވެސް އެނގިލައްވާނެ އަޅުގަނޑު މިދައްކަނީ ކޮން ވާހަކައެއްކަން. އެއީ އަޅުގަނޑުގެ ނަން ބޭނުންކޮށްގެން އެނގޭތޯ މާލޭގައި ވިޔަފާރިކުރާ ބޮޑު ވިޔަފާރިވެރިޔަކަށް ހުޅުމާލެއިން ބޮޑު ބިމެއް ހޯދައިދީގެން އޭގެ ބަދަލުގައި އެމީހާ ދިން ތަނެއް ނަގައިގެން އެ އުޅެނީ. މިވަރުގެ މީހުން މިއުޅެނީ. އެ މީހުންނަށް ހީވަނީތޯ އަޅުގަނޑަށް މިކަންކަން ނޭނގޭނެތޯ. ދެން އައްސަވާ އަޅުގަނޑު މި މައްސަލަ ތަހުގީގު، ޝައްކެއް ވެސް ނެތް މިއީ ދޫކޮށްލާނެ މައްސަލައެއް ނޫން."
މީގެއިތުރުން މުއިއްޒު މޭޔަރަކަށް ހުންނެވި ދުވަސްވަރު އަބްދުއްރަހީމްގެ އެދިވަޑައިގަތުމަށް މާލޭ މަސް މާރުކޭޓު ބިޑަކަށް ނުލައި، ކުރިމަތިލާފައި ތިބި މީހުންނަށް ވުރެ މާ އަގުހެޔޮކޮށް އޭނާއަށް ދޭން ނިންމަވާފައިވާ ކަމަށްވެސް ޔާމީން ވިދާޅުވި އެވެ.
"ދެން ހަމަ މުއިއްޒު މޭޔަރުކަމުގައި ހުރިއިރު އަބްދުއްރަހީމާ މުއިއްޒާ ގުޅިގެން ބިޑަކާ ނުލައި އަދި ކުރިމަތިލާފައި ތިބި މީހުންނަށްވުރެ މާ އަގުހެޔޮކޮށް އަބްދުއްރަހީމް އެދުނީމަ، މުއިއްޒު އަބްދުއްރަހީމަށް ކަމެއް ކޮށްދޭންވެގެން. އެއީ މުއިއްޒަށް އެނގޭ އަބްދުއްރަހީމް މިއީ ކިހާ ވަރެއްގެ މީހެއްކަން އަބްދުއްރަހީމް މިއީ. އެއީ ޕާޓީގެ ތެރޭގައި ސިޔާސީ އޮއެވަރު އަނބުރާގޮތް މުއިއްޒަށް ފެނޭ އެނގޭތޯ. މުއިއްޒަކީ އޭނަގެ ޒާތުގައި މިކަހަލަ އުރަތްޕެއް ހުރި މީހަކަށް ނުވާތީ މާލޭގައި މަސް ކަނޑާތަން ވެސް އަބްދުއްރަހީމަށް އެހެރީ ދިފައި ނުއަގުގައި. މިކަހަލަ ބައިވަރު ކަންކަން ހުންނާނެ އެނގޭތޯ،" ޔާމީން ވިދާޅުވި އެވެ.
މާލޭގެ މަސް މާރުކޭޓް ތަރައްގީ ކުރުމަށް ސިޓީ ކައުންސިލުން ގޮތް ނޭނގޭ ދެ އެއްބަސްވުން ހަދާފައިވާއިރު އެ ދެ އެއްބަސްވުމުގެ ފަރަގު 53 މިލިއަން ރުފިޔާއަށް ވުރެ ބޮޑުކަން މިދިޔަ އަހަރު ވަނީ ހާމަވެފަ އެވެ. މޭޔަރު އާދަމް އާޒިމް އޭރު ވިދާޅުވީ މިލިއަން ޑޮލަރުގެ ދެ ކޮންޓްރެކްޓެއް އެ މަޝްރޫއުއަށް އޮތްއިރު އޭގެ ތެރެއިން ރަނގަޅީ ކޮން އެއްބަސްވުމެއް ކަމެއްވެސް ނޭނގޭ ކަމަށެވެ.
ފަލާހާއި ޝުޖާއަކީ ވާހަކަ ދައްކަން މާ ރަނގަޅު ބައެއް ނޫން: ޔާމީން
ފަލާހު އާއި ޝުޖާއަކީ މީގެ ކުރިން ޔާމީނަށް ވަރަށް ބޮޑަށް ސަނާ ކިޔުއްވައި އުޅުއްވި ދެ ބޭފުޅުންނެވެ. ނަމަވެސް އެ ދެބޭފުޅުން ޔާމީނަށް މިހާރު ނިސްބަތްކުރައްވާ ވާހަކަދައްކަވާއިރު ކުރީގެ ރާގު ވަނީ ވަރަށް ބޮޑަށް ބަދަލުވެފަ އެވެ. އެކަން އެގޮތަށް ހިނގި ސަބަބެއް ނުވިސްނޭ ކަމަށް ޔާމީން ވިދާޅުވި އެވެ.
ޔާމީން ވިދާޅުވީ ފަލާހު އަމިއްލައަށް ކުރިން އެމަނިކުފާނުގެ ވެރިކަމުގައި މުލީއާގޭގައި ވަޅުދިޔަ ހިއްކަން އުޅުއްވި ކަމަށްވެސް ފާހަގަކުރައްވާފައިވާ ކަމަށެވެ. އޭގެއިތުރުން އެމަނިކުފާނަށް ދެވަނަ ދައުރެއް ހޯދައި ދެއްވުމަށްފަހު ނޫނީ ގެއަށް ނުވަންނާނެ ކަމަށްވެސް ފަލާހު ކުރިން ވިދާޅުވި ކަމަށް ޔާމީން ވިދާޅުވި އެވެ.
"ބޮޓޭކޯ [ފަލާހް] އަމިއްލައަކަށް ނޫންތޯ ބުނީ ތިމަންނައަކީ މުލިއާގޭގައި ރައީސް ޔަމީނުމެން މި މަސައްކަތްކުރާއިރުގައި އެތާ ވަޅުދިޔަ ހިއްކަން އުޅުނު މީހެކޭ. އަޅުގަނޑެއް ނޫން ދެއްތޯ މި ވާހަކަ ބުނީކީ،" ޔާމީން ވިދާޅުވި އެވެ.
ޔާމީން ވިދާޅުވީ ފަލާހްމެން ހުރިހާ ބޭފުޅުން ވިދާޅުވާ ހުރިހާ ކަންކަން އެބޭފުޅުންނާ އަރާ ހަމަކުރާނެ ކަމަށާއި މިގޮތަށް އެ ބޭފުޅުންގެ ބަސްމަގު ކުއްލިއަކަށް ބަދަލުވި ސަބަބު ނުވިސްނޭ ކަމަށެވެ.
"ފަލާހު ދެއްތޯ ބުނީ ރައީސް ޔާމީން ދެވަނަ ދައުރަކަށް ހޮވާފައި ނޫނިއްޔާ ތިމަންނަ ގެއަކަށް ވެސް ނުވަންނާނަމޭ. އެހެންވީމަ މި ވަރުގެ އިހުލާސްތެރި މީހުން ދެއްތޯ. އެހެންވީމަ އަޅުގަނޑު ހިތަށް މި އަރަނީ މިއަދު މި މީހުންނަށް ކިހިނެއް ވެގެންބާއޭ މިއުޅެނީ. މި މީހުންނަށް ހާދަ ފަސޭހައޭ. މި މީހުން ހިތަށް މި އަރަނީ މި މީހުން އަނގައިން ދޫކޮށްލާ ބަސްބަސް މި މީހުންނާ އަނބުރާ ބައްދަލުކުރާނެ ކަމަށް މި މީހުން ހިތަށް ނާރަނީބާއޭ،" ޔާމީން ވިދާޅުވި އެވެ.
އެމްއެމްޕީއާރްސީގެ މައްސަލަތައް ބަލާ ވާހަކަ ޝުޖާއު ވިދާޅުވާއިރު، ޝުޖާއުގެ ނަން ވެސް އެމްއެމްޕީއާރްސީން ހިޔާނާތްތެރިވި މީހުންގެ ލިސްޓުގައި އޮތް ކަމަށް ޔާމީން ވިދާޅުވި އެވެ. އެގޮތުން ޝުޖާއުގެ މައްސަލަ ވެސް ބެލޭނެކަން އެނގެންވާނެ ކަމަށް ޔާމީން ވިދާޅުވި އެވެ.
"ބާރަށު މައިކު [ޝުޖާއު] އަށް އެނގެންވާނެ ދެއްތޯ މިހާރު އެ އުޅެނީ ދެއްތޯ ޓިކްޓޮކްގައި އެމްއެމްޕީއާރްސީގެ ލާރިގަނޑު ވަގަށް ނެގި މީހުންގެ ލިސްޓު އެ އުޅެނީ. މައިކުގެ ނަން އެބަ އޮތެއް ނޫންތޯ އޭގައި. މައިކަށް އެނގޭނެ މިކަންތައްތަކަކީ ބެލޭނެ ކަންތައްތަކެއްކަން،" ޔާމީން ވިދާޅުވި އެވެ.
ޔާމީން ވިދާޅުވީ ފަލާހުއަކީ ހިކި ބޮނބިގަނޑެއް ކަހަލަ މީހެއް ކަމަށާއި އޭނާ ޕީޕީއެމްގެ އިތުރުން ޖުމްހޫރީ ޕާޓީގައިވެސް އުޅުއްވި ކަމަށެވެ. އެމަނިކުފާނު ވިދާޅުވީ ފައިސާ ހުރުމުން ކޮންމެ މީހަކަށްވެސް އިންތިހާބުގައި ވާދަކުރައްވާ މަޖިލީހަށް ހޮވިދާނެ ކަމަށެވެ. ފަލާހުގެ އިލްމީ ގާބިލުކަން ހުރި މިންވަރު ރައްޔިތުންނަށް އެނގޭނެ ކަމަށް ޔާމީން ވިދާޅުވި އެވެ.
"ފަލާހަކީ ކޮންމެހެން މުއިއްޒަކާވެސް ގާތް މީހެއް ނޫން. ފަލާހަކީ ހަމަ ގަދަ ކަނޑަކަށް އެއްލާލާފައި އޮންނަ ހިކި ބޮނބިގަނޑެއް ކަހަލަ މީހެއް. ހަމަ އޮޔާ، ވަޔާ، ރާޅާ ތަޅާގޮތަކަށް ދާނީ. އޭނަ ޕީޕީއެމްގައި ހުރި. އޭނަ ގޮސް ޖުމްހޫރީ ޕާޓީއަށް ދިޔަ،"ޔާމީން ވިދާޅުވި އެވެ.
"މިހާރު ޕީއެންސީއަށް އައީ. އެކަހަލަ މީހެއް. މިއީ ރައްޔިތުންގެ ކިހާ އިތުބާރެއް އޮތް ބައެއްތޯ. އަތުގައި ލާރި ހުރީމަ އިންތިހާބަކުން ކާމިޔާބުކޮށް މަޖިލިސް ގޮނޑިއަށް އައިސްދާނެ. އެކަމަކު މަޖިލިސް ގޮނޑިއަށް އައިމަ މި ފެންނަނީ ފަލާހުގެ އިލްމީ ގާބިލުކަން ހުރިވަރު."
---
ޔާމީން ފާހަގަކުރައްވާ ގޮތުގައި އެކި ބޭފުޅުން ނެރެގެން އެކި ވާހަކަތައް ދެއްކެވިޔަސް ފަރުވާލެއް ނެތް ކަމަށް ޔާމީން ވިދާޅުވި އެވެ. އެމަނިކުފާނު ވިދާޅުވީ މުއިއްޒަށް ތާއީދެއް މިހާރު ނެތްކަން އެމަނިކުފާނަށްވެސް އެނގިވަޑައިގަންނަވާނެ ކަމަށެވެ. އޭގެއިތުރުން މުއިއްޒު ވަށައިގެން ތިއްބެވި ބޭފުޅުންނާ ބޭހޭގޮތުން ރައްޔިތުން ކުރައްވާ ތުހުމަތުތައްވެސް އެނގޭނެ ކަމަށް ޔާމީން ވިދާޅުވި އެވެ.
ޕީއެންސީން ބޭއްވި ޖަލްސާގައި ޔާމީނަށް ގިނަ ފާޑުކިޔުންތަކެއް އަމާޒުކުރުމަށްފަހު ޕީއެންއެފްއިން ޖަލްސާއެއް ބާއްވައި ޕީއެންސީން ބޭއްވި ޖަލްސާގައި ދެއްކެވި ވާހަކަތަކަށް މިވަނީ ރައްދު ދީފަ އެވެ. އެހެންކަމުން ދެން އަނެއްކާ ޕީއެންސީން ޖަލްސާއެއް ބާއްވާނީ ކޮންއިރަކުތޯ ގިނަ ބަޔަކު ދަނީ އިންތިޒާރުކުރަމުންނެެވ. ނަމަވެސް ދެން އަވަހަށް ޖަލްސާއެއް ބާއްވަން މުއިއްޒު ހުއްދަ ދެއްވާނެ ކަމެއް ނޭނގެ އެވެ.
