ދެކުނު އެފްރިކާގެ ޖޯހަނަސްބާގްގެ އިރުމަތީގައި އޮންނަ އެކުރުލޭނީން އިތުރު އަންހެނެއްގެ ހަށިގަނޑު ފެނިފައިވާ ކަމަށް އެ ގައުމުގެ ފުލުހުން ބުނެފި އެވެ. މިއާއެކު ފާއިތުވި މަދު މަސްތަކުގެ ތެރޭގައި އެ ސަރަހައްދުން މަރާލާފައި އޮއްވާ ފެނުނު އަންހެނުންގެ އަދަދު މިވަނީ 10 އަށް އަރާފަ އެވެ.
މި ހަށިގަނޑު ފެނިފައިވަނީ ހޮނިހިރު ދުވަހުގެ ހެނދުނުގެ ވަގުތެއްގަ އެވެ. އެ އަންހެން މީހާ ދެނެގަނެފައިވަނީ، އޭގެ ކުރީ ރޭ އޭނާއާއެކު ބާއެއްގައި ވަގުތު ހޭދަކުރި އޭނާގެ ރަހުމަތްތެރިއެކެވެ.
އެ ސަރަހައްދުގެ ޕޮލިސް ކޮމިޝަނަރު ވިދާޅުވީ، އެކުރުލޭނީން ފެނުނު 10 މީހުންގެ މަރާއި ސޮވެޓޯއިން ފެނުނު މަރަކާ ދެމެދު އެއްގޮތް ކަންތައްތަކެއް ހުރިކަން ފާހަގަކުރެވޭ ކަމަށެވެ. އެހެންކަމުން، މިއީ ސިލްސިލާކޮށް މީހުން މަރާ "ސީރިއަލް ކިލާ" އެއްގެ އަމަލަކަށް ވުމުގެ ފުރުސަތު އޮތް ކަމަށް އޭނާ ވިދާޅުވި އެވެ.
މި މަރުތަކާ ގުޅިގެން މުޅި ދެކުނު އެފްރިކާގައި ވަނީ ބޮޑު ކަންބޮޑުވުމެއް އުފެދިފަ އެވެ. އެ ގައުމަކީ ދުނިޔޭގައި ޖިންސީ ތަފާތުކުރުންތަކުގެ މައްޗަށް ބިނާކޮށް އަންހެނުންނަށް ކުރާ އަނިޔާ އެންމެ ގިނަ އެއް ގައުމެވެ.
އެންމެ ފަހުން ފެނުނު ހަށިގަނޑު ފެނިފައިވަނީ ޖޯހަނަސްބާގްގެ މެދުތެރޭގެ އިރުއުތުރުގައި އޮންނަ ޓެމްބީސާ އަވަށުގެ ގަބުރުސްތާނަކުންނެވެ.
މަރުވި އަންހެން މީހާގެ ރަހުމަތްތެރިޔާ އެ ގައުމުގެ ގައުމީ ބްރޯޑްކާސްޓަރު އެސް.އޭ.ބީ.ސީ އަށް މައުލޫމާތު ދެމުން ބުނީ، ފުލުހުން ދެއްކި ފޮޓޯއިން އޭނާގެ ރަހުމަތްތެރިޔާ ދެނެގަނެވުނީ އޭގެ ކުރީ ރޭ އޭނާ ލައިގެން ހުރި ހެދުމުން ކަމަށެވެ.
ދެކުނު އެފްރިކާއަކީ މީހުން މެރުމުގެ މައްސަލަތައް އިންތިހާއަށް ގިނަ ގައުމެކެވެ. އެގޮތުން މި އަހަރުގެ އޭޕްރީލް މަހުން ފެށިގެން ޖޫން މަހުގެ ނިޔަލަށް އެކަނިވެސް އެ ގައުމުގައި 5،427 މީހުން މަރާލާފައިވެ އެވެ.
ނަމަވެސް، ޖޯހަނަސްބާގް ސަރަހައްދުގައި ފަހަކަށް އައިސް ހިންގަމުންދާ މި މަރުތަކުގެ ނުރައްކާތެރިކަމުގެ ސަބަބުން އެ ސަރަހައްދުގެ އަންހެނުންގެ މެދުގައި ވަނީ ބޮޑު ބިރުވެރިކަމެއް އުފެދިފަ އެވެ.
ޖުލައި މަހުން ފެށިގެން މިހާތަނަށް ފެނުނު 10 ހަށިގަނޑުވެސް ފެނިފައިވަނީ ދާދި އެއްގޮތް ހާލަތްތަކެއްގަ އެވެ. މީގެ ތެރެއިން ގިނަ ހަށިގަނޑުތައް ފެނިފައިވަނީ ޓެމްބީސާ ކައިރީގައި އޮންނަ ކެމްޕްޓަން ޕާކް ސަރަހައްދުންނެވެ.
މަރާލާފައިވާ މީހުންގެ ތެރޭގައި ގިނައީ ޒުވާން އަންހެނުންނެވެ. އަދި މަރުވި ހުރިހާ އެންމެންނަކީ ވެސް މަރުވުމުގެ ކުރިން ރަހުމްކުޑަ އަނިޔާތަކެއް ތަހައްމަލުކޮށްފައިވާ ބައެއްކަން ފާހަގަކުރެވެ އެވެ.
އަންހެނުންނަށް ކުރާ އަނިޔާތަކަކީ ގައުމީ ފެންވަރުގެ ބޮޑު ކާރިސާއެއްގެ ގޮތުގައި އެ ގައުމުގެ ވަޒީރުން ކަނޑައެޅިތާ އަހަރެއްވެސް ނުވަނީސް ހިނގަމުންދާ މި މަރުތަކާ ގުޅިގެން، ސަރުކާރަށް ކުރިމަތިވަމުންދާ ފިއްތުންތައް ވަނީ އިތުރުވެފަ އެވެ.
