ދެކުނު އެފްރިކާގެ އެންމެ ބޮޑު ގަބީލާ ކަމަށްވާ ޒޫލޫންގެ ރަސްގެފާނު މިސުޒުލޫ ކާޒްވެލިތީނީ، އެމަނިކުފާނުގެ ހުއްދައަކާ ނުލައި ފައްޅީގެ މެންބަރަކާއެކު ސިއްރު ގުޅުމެއް ބޭއްވި ކަމަށް ތުހުމަތުކޮށް، އަނބިކަނބަލުންނަށް ވަރަށް ބޮޑަށް ކޯފާވެ ހެއްދެވި މަންޒަރު ފެންނަ ވީޑިއޯއެއް ލީކުވެއްޖެ އެވެ.
މި ވީޑިއޯ އާންމުވުމާ ގުޅިގެން ރަސްގެފާނަށް ވަނީ މައާފަށް އެދިވަޑައިގަންނަވަން މަޖުބޫރުވެފަ އެވެ.
ލީކުވި ވީޑިއޯއިން ފެންނަ ގޮތުގައި، ކޮޓަރިތެރޭގައި އަރާ ފައިވާނެއްގައި އަދި ބިޔަރު ފުޅިއެއް ހިއްޕަވައިގެން ހުންނަވައި ރަސްގެފާނު ވަނީ އެމަނިކުފާނުގެ ތިންވަނަ އަނބިކަނބަލުން ކުއީން ނޮމްޒާމޯ މްޔޭނީއަށް ދިމާއަށް ކޯފާ އިސްކުރައްވައި ވާހަކަ ދައްކަވާފަ އެވެ.
ރަސްގެފާނު ވަނީ އެކަމަނާ އެހެން ފިރިހެނަކާ ގުޅުން ބޭއްވި ކަމަށް ތުހުމަތުކުރައްވައި، ބޭރަށް ދާއިރު ފިރިމީހާގެ ހުއްދަ ހޯދަންޖެހޭނެ ކަމަށް ވިދާޅުވެފައެވެ.
"މީހެއްގެ އަނތްބަކަށް ވީމާ، ދާން ބޭނުންވާ ތަނަކަށް ދާން ހުއްދައަށް އެދެންޖެހޭނެ. އެންމެކުޑަމިނުން ފިރިމީހާއަށް އެނގިލަންޖެހޭނެ، ސޯޝަލް މީޑިއާއިން ފެނުމުގެ ބަދަލުގައި،" ލީކްވި ވީޑިއޯގައި ރަސްގެފާނު ވިދާޅުވެފައިވެ އެވެ.
އަނބިކަނބަލުން މައުސޫމު ބޭފުޅަކަށް ހެދެން އުޅުނަސް އެއީ ހަގީގަތެއް ނޫން ކަމަށާއި، ގަނޑުވަރުން ނުކުންނެވުމަށް ވެސް ވީޑިއޯގައި ރަސްގެފާނު ވިދާޅުވެ އެވެ.
ރަސްގެފާނު ތުހުމަތުކުރެއްވި ގޮތުގައި ކުއީން ނޮމްޒާމޯ ގުޅުން ބޭއްވީ އެކަމަނާ ވަޑައިގަންނަވާ ފައްޅީގެ މެންބަރަކާއެވެ. އަދި އެ ފައްޅީގެ ފާދިރީއަށް ނިސްބަތްކުރައްވައި އޭނާއަކީ ގަމާރެއް ކަމަށް ވިދާޅުވެ ރަސްގެފާނު ވަނީ ހަޑިހުތުރު ބަހުން މުހާތަބުކުރައްވާފަ އެވެ.
މި ހާދިސާ ހިނގި ވަގުތު ވީޑިއޯ ރެކޯޑްކޮށްފައިވަނީ ކުއީން ނޮމްޒާމޯ އަމިއްލަފުޅަށް ކަމަށް ބެލެވެ އެވެ. ވީޑިއޯގެ ނިމޭކޮޅުގައި "މިއީ ރެޔާއިދުވާލު އަހަރެން އުޅެމުންދާ ހިތްދަތި ދިރިއުޅުން،" ކަމަށް އެކަމަނާ ވިދާޅުވާ އަޑުއިވެ އެވެ. ނަމަވެސް މި ވީޑިއޯ ސޯޝަލް މީޑިއާއަށް ލީކުކޮށްލީ ކާކު ކަމެއް އަދި ސާފެއް ނުވެ އެވެ.
މި މައްސަލައާ ގުޅިގެން ޝާހީ ގަނޑުވަރުން ނެރުނު ބަޔާނެއްގައި ރަސްގެފާނު ވިދާޅުވީ، އެމަނިކުފާނު ދެއްކެވި ވާހަކަތަކުގެ ސަބަބުން ލިބުނު ހިތްދަތިކަމަށްޓަކައި އިންތިހާއަށް ހިތާމަކުރައްވާ ކަމަށާއި، އަދި އަސަރުކުރި އެންމެހާ ފަރާތްތަކުން އެމަނިކުފާނުގެ އިހުލާސްތެރި މައާފު ގަބޫލުކުރުމަށް އެދިވަޑައިގަންނަވާ ކަމަށެވެ. ނަމަވެސް، ބަޔާނުގައި ފާހަގަކޮށްފައިވާ ގޮތުގައި މިއީ މާކުރީގެ ވީޑިއޯއެއް ކަމަށާއި، މިހާރު ޝާހީ އާއިލާގެ ތެރޭގައި އެފަދަ އެއްވެސް މައްސަލައެއް ނެތް ކަމަށެވެ.
ރަސްގެފާނު މިސުޒުލޫ ކުއީން ނޮމްޒާމޯ މްޔޭނީއާ ކައިވެނި ބައްލަވައިގަތީ މިދިޔަ އަހަރުގެ ނޮވެމްބަރު މަހުގަ އެވެ. މިއީ އެމަނިކުފާނުގެ ތިންވަނަ އަނބިކަނބަލުންނެވެ. މި ކައިވެންޏަކީވެސް ގާނޫނީ ގޮތުން ބޮޑު ހިޔާލުތަފާތުވުމެއް އުފެދުނު ކަމެކެވެ.
ރަސްގެފާނު މިސުޒުލޫ ތަހުތަށް އިސްވެވަޑައިގަތީ 2022 ވަނަ އަހަރު، އެމަނިކުފާނުގެ ބައްޕާފުޅު ރަސްގެފާނު ގުޑްވިލް ޒްވެލިތީނީ އަވަހާރަވުމާ ގުޅިގެން އާއިލާގެ ތެރޭގައި އުފެދުނު ބޮޑު ކޯޅުމަކަށް ފަހުގަ އެވެ. ބައިގަރުނު ވަންދެން ރަސްކަން ކުރެއްވި ޒްވެލިތީނީގެ ހަ އަނބިން ތިއްބެވި އެވެ.
ރަސްގެފާނު މިސުޒުލޫގެ އެއްބަނޑުއެއްބަފާ އަދި އެއްބަފާ ބައެއް ބޭފުޅުން ވަނީ އެމަނިކުފާނު ވެރިކަމަށް އިސްވުމާ ދެކޮޅަށް ކޯޓަށް ވަޑައިގެންފަ އެވެ. އެބޭފުޅުން ވިދާޅުވާ ގޮތުގައި މިސުޒުލޫގެ މަންމާފުޅަކީ ޒޫލޫންގެ އާދަކާދައިގެ މަތިން އެންމެ އިސް އަނބިކަނބަލުން ނޫން ކަމުން، އެއީ ވެރިކަން ވާރުތަވާނެ ބޭފުޅެއް ނޫން ކަމަށެވެ.
