ކަނޑުދަތުރުފަތުރުގެ ދާއިރާގެ ޒަމާނީ ޓެކްނޮލޮޖީ އާއި ތަމްރީނުތަކަށް ހާއްސަކޮށްގެން ރާއްޖޭގައި އަލަށް ބާއްވާ، "މެރިން ޓެކް ޓްރެއިނިންގް" ޕްރޮގްރާމް މިއަދު އއ. އުކުޅަހުގައި ފަށައިފި އެވެ.
މި ކޮންފަރެންސަކީ އުޅަނދުފަހަރުގެ ވެރިންނާއި، ދާއިރާގެ ފަންނީ މާހިރުންނާއި، ޓެކްނޮލޮޖީ ފޯރުކޮށްދޭ ފަރާތްތަކުގެ އިތުރުން ކަނޑުދަތުރުފަތުރުގެ ދާއިރާގެ މަޝްހޫރު ބްރޭންޑްތައް އެއް ފުރާޅެއްގެ ދަށަށް ގެނެސްދޭ މުހިންމު މަންސައެކެވެ.
ކެޕްޓަން އަންވަރު އިސްނަންގައިގެން، އޯޝަންއެކްސް މެރިން، މެރިންވައިބް އަދި އުކުޅަސް ކައުންސިލް ގުޅިގެން އިންތިޒާމުކުރާ މި ތިން ދުވަހުގެ ހަރަކާތުގައި، އަމަލީ ތަމްރީނުތަކުގެ އިތުރުން ކަނޑުދަތުރުފަތުރުގެ ދާއިރާއަށް އަލަށް ތައާރަފުވެފައިވާ އެންމެ ފަހުގެ ޓެކްނޮލޮ ޖީއާއި އާލާތްތަކުގެ ލައިވް ޑެމޮންސްޓްރޭޝަންތައް ކުރިއަށްދާނެ އެވެ.
މި ތަމްރީނު ޕްރޮގްރާމްގެ މައިގަނޑު އަމާޒަކީ ކަނޑުމަތީގެ މަސައްކަތްތަކަކީ ރައްކާތެރި، ޒަމާނީ އަދި ހަރުދަނާ މަސައްކަތްތަކަކަށް ހެދުމަށް ބޭނުންވާ ހުނަރުތައް ފޯރުކޮށްދިނުމެވެ. އެގޮތުން އެކޯ ސައުންޑާ، ބާޑް ރާޑަރު، ބޭރު އިންޖީނު، ނެވިގޭޝަން ސިސްޓަމްތައް އަދި ކަނޑުދަތުރުފަތުރާ ގުޅުންހުރި އެހެނިހެން އިލެކްޓްރޯނިކް ވަސީލަތްތަކާ ގުޅޭ މަޢުލޫމާތު މި ޕްރޮގްރާމްގެ ތެރެއިން ބައިވެރިންނަށް ލިބިގެންދާނެ އެވެ.
މި ތަމްރީނުތައް ކުރިއަށް ގެންދަވަނީ ސިމްރަޑްގެ ސީނިއާ ޕްރޮޑަކްޓް މެނޭޖަރު އެޑަމް ކިންގްގެ އިތުރުން، ރާއްޖޭގެ މަސްވެރިކަމާއި ކަނޑުދަތުރުފަތުރުގެ ދާއިރާގައި ދިގު މުއްދަތެއްގެ ތަޖުރިބާ ހޯއްދަވާފައިވާ ސިމްރަޑްގެ ލައިސަންސްޑް ޓެކްނީޝަނެއް ކަމަށްވާ ކެޕްޓަން އަންވަރެވެ.
މި އިވެންޓުގައި އުޅަނދުފަހަރުގެ ވެރިންނާއި އޮޕަރޭޓަރުންގެ އިތުރުން، ވިޔަފާރި އުސޫލުން މަސްވެރިކަން ކުރާ ފަރާތްތަކާއި، ޗާޓަރ އަދި ޑައިވް އޮޕަރޭޓަރުންނާއި، މެރިން ސާމާނު ވިއްކާ ފަރާތްތަކުން ބައިވެރިވެފައިވެ އެވެ. މިއީ ދޯނިފަހަރާއި މަސްވެރިކަމުގެ ސިނާއަތުގައި ހަރަކާތްތެރިވާ ގިނަ ފަރާތްތަކަކަށް އަމާޒުކޮށްގެން ކުރިއަށްގެންދާ ހަރަކާތެކެވެ.
