ލަންޑަން (ސެޕްޓެމްބަރު 26) - ޗެލްސީގެ މިޑްފީލްޑަރު، ކޯލް ޕާމާ އަށް އިންގްލެންޑަށް ގިނަ މެޗުތަކެއް ނުކުޅެވެނީ، ލިބޭ ގިނަ ފުރުސަތުތަކެއް ގެއްލޭތީ ކަމަށް އެ ޓީމުގެ ކޯޗު، ތޯމަސް ޓުޗެލް ބުނެފި އެވެ.
އެމެރިކާ، މެކްސިކޯ އަދި ކެނަޑާގައި މި އަހަރުގެ ޖޫން/ޖުލައި މަހު ބޭއްވި ފީފާ ވޯލްްޑް ކަޕަށް ގެންދިޔަ ސްކޮޑުގައި ޕާމާ ނުހިމެނެ އެވެ. އޭގެ ފަހުން، މި ފަހަރުގެ ސީޒަން ފަށައި، ޗެލްސީން އިނގިރޭސި ޕްރިމިއަ ލީގުގައި ކުޅުނު ފަސް މެޗުގައި ވެސް ޕާމާ ވަނީ ފުރަތަމަ އެގާރައިގައި ހިމެނި މޮޅު ކުޅުމެއް ދައްކައިފަ އެވެ. އެހެންވެ، މި ފަހަރުގެ ނޭޝަންސް ލީގުގެ މެޗުތަކަށް ޓުޗެލް ނެގި ސްކޮޑުގައި ވަނީ ޕާމާ ހިމަނައިފަ އެވެ.
އެކަމަކު، ކުއްލި ގޮތަކަށް ފިޓްނަސް މައްސަލައެއްގައި، އުމުރުން 24 އަހަރުގެ ޕާމާ މި ވަނީ އިންގްލެންޑު ސްކޮޑުން ވަކިވެފަ އެވެ.
"އަހަންނަށް ވިސްނިފައި އޮތްގޮތުގައި އޭނާ ކުޅެމުން އެ އަންނަނީ އެއްކޮށް ފިޓްކޮށް ހުރެއެއް ނޫން، ތަދުވެގެން، އުނދަގޫތަކެއް ވެފައި ހުރެ އެ ކުޅެނީ. އެހެންވެ، އޭނަ ގައުމީ ޓީމުން ވަކިވީ، އެހެންވެ، ޗެލްސީން ވެސް އެކަން އަންގައިފި،" ޓުޗެލް ބުންޏެވެ.
"ހަގީގަތަކީ، މި ކަހަލަ އެކި ސަބަބުތަކާ ހުރެ ޕާމާ އަށް އިންގްލެންޑަށް ކުޅުމުގެ ވަރަށް ގިނަ ފުރުސަތުތަކެއް ގެއްލޭ. ހަމަ ގިނަ ފުރުސަތުތަކެއް ގެއްލިފައި ހުރީ ވެސް މިހެންވެ،"
ރިޕޯޓްތައް ބުނާގޮތުގައި، ޗެލްސީގެ މެޑިކަލް ޓީމުގެ ލަފާގެ މަތިން ޕާމާ މިހާރު އަންނަނީ އޭނާގެ ފިޒިކަލް ފިޓްނަސް ރަނގަޅުކުރުމަށްޓަކައި، ހާއްސަ ޕްލޭނެއްގެ ދަށުން ސްޕެޝަލިސްޓަކާ އެކު، އެހެން ގައުމެއްގައި ތަމްރީންތަކެއް ކުރިއަށްގެންދަމުންނެވެ. އަދި، ޕާމާގެ މި ފިޓްނަސް ޕްލޭންގެ ދަތުރުތަކުގައި ޗެލްސީގެ ފިޓްނަސް ކޯޗެއް ވެސް ބައިވެިރވެ އެވެ.
ޕާމާ، އިންގްލެންޑުން ވަކިވީ ކްލަބަށް އިސްކަން ދިނުމުގެ ގޮތުންތޯ ކުރި ސުވާލަށް ޓުޗެލް ބުނެފައިވަނީ، މި ކަހަލަ ކަމެއްގައި ވަކި ގޮތަކަށް އެއްވެސް ކުޅުންތެރިއަކާ ގުޅޭގޮތުން ވާހަކަ ނުދައްކާނެ ކަމަށެވެ. އެކަމަކު، ކުޅުންތެރިން ބައެއް ފަހަރު ޝެޑިއުލްގެ ގޮތުން، ގައުމީ ޓީމުގެ ކަންކަމުން ބްރޭކެއް ނަގައި، ކްލަބަށް އަހައްމިއްޔަތުކަން ދިނުމަކީ ހިނގާފައި ހުރި ކަންކަން ކަމަށާއި މީގެ އެންމެ މުހިންމު ކަމަކީ ހުރިހާ ކަމަކާ ގުޅޭގޮތުން، ވާހަކަދެކެވިފައި ހުރުން ކަމަށް ޓުޗެލް ވަނީ ބުނެފަ އެވެ.
"އަހަރެން ވެސް ކްލަބްތަކުގައި މަސައްކަތް ކުރިން. އެހެންވީމަ، ދެ ފަރާތުގައި ހުރެ ވެސް މި ކަންކަން އޮންނަގޮތް އަހަންނަށް ވަރަށް ސާފު،" ޓުޗެލް ބުންޏެވެ.
އިންގްލެންޑުން ވޯލްޑް ކަޕަށް ފަހު ކުޅޭ ފުރަތަމަ މެޗަކީ މިރޭ ޔުއެފާ ނޭޝަންސް ލީގުގައި އަމިއްލަ ދަނޑުގައި ސްޕެއިނާ ދެކޮޅަށް ކުޅޭ މެޗެވެ. ސްޕެއިނަކީ މި ފަަހަރުގެ ވޯލްޑް ކަޕްގެ ޗެމްޕިއަނުންނެވެ.
