ސަރުކާރުގެ ތިން ވުޒާރާއެއް ހިންގަމުން އައި ދެ އިމާރާތެއްގައި ޑިސެމްބަރު 12، 2024، ގައި އަލިފާން ރޯވީ ކަރަންޓު ޝޯޓެއް ވެގެން ކަމަށާއި އެތަނުން އެއް އިމާރާތަކުގައި ކަރަންޓުގެ މައްސަލަ އުޅޭކަން ކުރިން ވެސް ސަރުކާރަށް އެނގޭ ކަމަށް ފުލުހުން މިއަދު ބުނެފި އެވެ.
ފުލުހުން ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް އަބްދުﷲ ރަޝީދު ވިދާޅުވީ އަލިފާން ރޯވީ ކަރަންޓު ޝޯޓެއްވެގެންކަން ތަހުގީގަށް ސާބިތުވެފައިވާ ކަމަށެވެ.
"ރިޕޯޓުގައި ބުނާ ގޮތުން ފާހަގަވަނީ، އަލިފާން ރޯވެފައި ވަނީ ކަރަންޓު ޝޯޓް ސާކިޓެއްގެ ސަބަބުން ކަމަށް ރޯވެފައިވާ ކަމަށް،" ރަޝީދު ވިދާޅުވި އެވެ.
އެ ދެ އިމާރާތުގެ އަލިފާން ރޯވެފައި ހުރީ ސީލިންގުގެ އެކި ތަންތަނުގައި ކަމަށް ރަޝީދު ވިދާޅުވި އެވެ. އެހެންވެ އެ ހުރިހާ ތަނެއް ހޯދައި ނިއްވަން ސިފައިންގެ ފަޔާ ފައިޓަރުންނަށް އުނދަގޫވި ކަމަށް އޭނާ ބުންޏެވެ.
"ރޯވެފައިވާ ކަރަންޓު ނަރުތަކަކީ އިމާރާތުގެ ދަތި ދޭތެރެތަކުގައި، ސީލިންގުތަކުގައި، އެކި ޑަކްޓުތަކުގެ ތެރޭގައި ހުރި ނަރުތައް ކަމުން އެ އަލިފާންތައް ހޯދައި ނިއްވާލުމަށް ދަތިތަކެއް ހުރުމުގެ ސަބަބުން ކޮންޓްރޯލް ނުވެގެން ގޮސް ހުޅުގަނޑު ހިފައިގެން ގޮސް ފެތުރިގެންކަން ފާހަގަކޮށްފައިވޭ،" އޭނާ ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި ރަޝީދު ވިދާޅުވީ، ހައުސިން މިނިސްޓްރީގެ ޖިއޮމެޓްރިކްސް ޑިޕާޓްމަންޓުގައި ކަރަންޓުގެ މައްސަލަ ކުރިން ވެސް އުޅޭކަން ތަހުގީގަށް ފާހަގަ ކުރެވިފައިވާ ކަމަށެވެ.
"އަލިފާން އެންމެ ފުރަތަމަ ރޯވެފައި ހުއްޓާ ފެނުނު ޖިއޮމެޓްރިކްސް ޑިޕާޓްމަންޓުގައި މި ހާދިސާ ހިނގުމުގެ ކުރިން ވެސް ކަރަންޓުގެ މައްސަލަ އުޅޭކަން ތަހުގީގަށް ވަނީ ފާހަގަ ކުރެވިފަ. އަދި ފުލުހުންނާއި ސިފައިން އަލިފާން ރޯވެފައި ހުރި ތަން ހޯދުމުގެ މަސައްކަތް ކުރަމުންދިޔައިރުވެސް އިމާރާތުގެ ބައެއް ތަންތަނުގައި ކަރަންޓު ހުރިކަން ވެސް ވަނީ ފާހަގަ ކުރެވިފަ،" ރަޝީދު ވިދާޅުވި އެވެ.
އޭގެ އިތުރުން ރަޝީދު ވިދާޅުވީ، އަލިފާން ރޯވީ ކަރަންޓު ޝޯޓެއްވެގެންކަން ސާބިތުވާ ހެކިތައް ތަހުގީގަށް ލިބިފައިވާ ކަމަށެވެ.
"އަނދައިގެން ގޮސްފައިވާ އިމާރާތުގެ ތެރެއިން ނެގުނު ކަރަންޓު ނަރުތަކުގެ ފޮރެންސިކް ތަހުލީލުތައް ވަނީ ކުރެވިފަ. އެގޮތުން ތަހުލީލު ކުރެވުނު ނަރުތަކުގެ ތެރެއިން ކަރަންޓު ނަރުގައި ހޫނުވެގެން އުފެދޭ އާކު ފެންނަން ހުރުމާއި އޯވާ ހީޓުވުމުން އެއްނަރު އަނެއް ނަރާ އެއްވެފައި ހުރުމާއި ކަރަންޓު ނަރުތައް އޯވާހީޓުވެފައި ހުރުމުން ބައެއް ނަރުތައް ވިރި އަދި ކަރަންޓު ނަރުތައް ވިރިފައިވާ ހިސާބު ފުފި އެތަނުގައި ބަލްބު އުފެދިފައިވާކަން ފާހަގަ ކުރެވޭ،" އޭނާ ވިދާޅުވި އެވެ.
"އަދި ތަހުލީލު ކުރެވުނު ނަރުތަކުގެ ތެރެއިން ދެ ކަރަންޓު ނަރެއް ޝޯޓުވެފައި ހުރިކަމުގެ ނިޝާންތައް ވެސް ވަނީ ފާހަގަ ކުރެވިފައި."
