ދެކުނު ކޮރެއާގެ ކުރީގެ ރައީސް ޔޫން ސުކް ޔޯލްގެ އަނބިކަނބަލުން އަދި އެ ގައުމުގެ ކުރީގެ ފަސްޓް ލޭޑީ ކިމް ކިއޮން ހީ، ރިޝްވަތު ހިފި މައްސަލައިގައި އިއްވާފައިވާ ހަތް އަހަރުގެ ޖަލު ހުކުމް، ފަސް އަހަރަށް ކުޑަކުރުމަށް އެ ގައުމުގެ އިސްތިއުނާފީ ކޯޓުން އަންގާރަ ދުވަހު ނިންމައިފި ކަމަށް ޔޮންހަޕް ނިއުސް އެޖެންސީން ރިޕޯޓްކޮށްފި އެވެ.
ކުރީގެ ރައީސް ޔޫންގެ ވެރިކަމުގައި ސިޔާސީ ގޮތުން ފައިދާތަކެއް ހޯދައިދިނުމުގެ ބަދަލުގައި އަގުބޮޑު މުދަލާއި ހަދިޔާ ރިޝްވަތުގެ ގޮތުގައި ގަބޫލުކުރި ކަމަށް ސާބިތުވެ، ދަށު ކޯޓުން ކިމްގެ މައްޗަށް ކުށް ސާބިތުވާ ކަމަށް ކަނޑައަޅާފައިވަނީ މިދިޔަ ޖޫން މަހުގެ ތެރޭގަ އެވެ.
ކިމްގެ މައްޗަށް އުފުލާފައިވާ މި ތުހުމަތުތަކަށް އޭނާ އިންކާރު ކުރައްވާއިރު، އަންގާރަ ދުވަހުގެ ހުކުމަށް ފަހު އޭނާގެ ވަކީލުން ވިދާޅުވީ ކޯޓުން ދަމަހައްޓާފައިވާ ކުށްތަކަށް އެއްބަސްނުވާ ކަމަށާއި، އެ މައްސަލަ ސުޕްރީމް ކޯޓުގައި އިސްތިއުނާފު ކުރާނެ ކަމަށެވެ.
ދެކުނު ކޮރެއާގައި 2024 ވަނަ އަހަރުގެ ޑިސެމްބަރު މަހު އިއުލާންކުރި މާޝަލް ލޯ ނުވަތަ އަސްކަރީ ގާނޫނާ ގުޅިގެން ކިމްގެ ފިރިކަލުން ޔޫން ސުކް ޔޯލްގެ މައްޗަށް އިތުބާރު ނެތްކަމުގެ ވޯޓެއް ނަގައި މަގާމުން ވަނީ ދުރުކޮށްފަ އެވެ. އަދި ބަޣާވާތެއް ރޭއްވެވި ކަމުގެ ކުށް ސާބިތުވެ، އޭނާ މިހާރު ގެންދަވަނީ އުމުރު ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ.
