ލައިސަންސް ނެތް މީހަކު ދުއްވި ސައިކަލެއް ރޭ ދަންވަރު އެކްސިޑެންޓުވެ މާލޭގައި ބޮޑު އެކްސިޑެންޓެއް ހިނގައިފި އެވެ.
ދަންވަރު 1:15 ހާއިރު ސޯސަން މަގުގައި ހިނގި އެ އެކްސިޑެންޓުގައި ޖެހުނީ ދެ ސައިކަލެވެ. އެކްސިޑެންޓުގައި 21 އަހަރާއި 22 އަހަރުގެ ދެ ފިރިހެނުންނަށް އަދި 26 އަހަރުގެ އަންހެނަކަށް އަނިޔާވި އެވެ.
އޭގެ ތެރެއިން އުމުރުން 21 އަހަރުގެ މީހާއަކީ އެކްސިޑެންޓުވި އެއް ސައިކަލު ދުއްވަން އިން މީހާ އެވެ. ނަމަވެސް އޭނާގެ އަތުގައި ލައިސަންސެއް ނޯންނަ ކަމަށް ފުލުހުން ބުންޏެވެ.
އެ އެކްސިޑެންޓުވެ ވީޑިއޯ ސޯޝަލް މީޑިއާގައި މިވަގުތު ދަނީ ދައުރުވަމުންނެވެ. އެއިން ފެންނަނީ އެކްސިޑެންޓުވި ތިން މީހުން ވެސް ބިންމައްޗަށް ދެމިފައި އޮތް ތަނެވެ. އަންހެން މީހާގެ ބޯ ކައިރިން ވަރަށް ބައިވަރު ލޭ އަންނަ މަންޒަރު ވެސް އެ ވީޑިއޯއިން ފެނެ އެވެ.
މިފަހުން ހުޅުމާލޭގައި ހިނގި އެކްސިޑެންޓެއްގައި އުމުރުން އެންމެ ނުވަ އަހަރުގެ އަންހެން ކުއްޖަކު ވަނީ ނިޔާވެފަ އެވެ. އެކްސިޑެންޓުވި އިރު ކުއްޖާ އިނީ ސައިކަލެއްގެ ފަހަތުގަ އެވެ.
ހިސާބުތަކުން ދައްކާ ގޮތުގައި އުމުރުން 15 އަހަރާއި 24 އަހަރާ ދެމެދުގެ ދިވެހި ޒުވާނުން އެންމެ ގިނައިން މަރުވަނީ މަގުމަތީގެ އެކްސިޑެންޓުތަކުގެ ސަބަބުންނެވެ. ދެހާސްއަށަކުން ފެށިގެން ސެޕްޓެމްބަރު، 2024، އާ ހަމައަށް މަގުމަތީ އެކްސިޑެންޓުތަކުގައި 115 މީހަކު ރާއްޖޭގައި ވަނީ މަރުވެފަ އެވެ.
