މިހާރު ކުރިއަށްދާ ޕީއެންސީގެ ކޮންގްރެސްގައި ޕާޓީގެ ނައިބު ރައީސުން ހޮވަން ބޭއްވި އިންތިހާބު މިނިސްޓަރު އަހުމަދު ޝިޔާމް އާއި މެންބަރު އިބްރާހިމް ސުޖާއި އާއި މެންބަރު ފާތުމަތު ސައުދާ އާއި މިނިސްޓަރު މުހައްމަދު ސައީދު އާއި މިނިސްޓަރު އަބްދުﷲ ރަފީއު އަދި ތަރުޖަމާނު މުހައްމަދު ހުސެއިން ޝަރީފް ކާމިޔާބު ކުރައްވައިފި އެވެ.
އެ އިންތިހާބުން ނާކާމިޔާބު ލިބިވަޑައިގަތީ މެންބަރު އަސްމާ ރަޝީދާއި އެލްޖީއޭގެ ސީއީއޯ މުހައްމަދު ނިމާލްއަށެވެ. އެ އިންތިހާބުގައި ވޯޓު ދިން 1095 މީހުންގެ ތެރެއިން އަސްމާއަށް ވޯޓު ދިނީ އެންމެ 288 އަށް މީހުންނެވެ. ނިމާލްއަށް ލިބިވަޑައިގަތީ 301 ވޯޓެވެ.
ޕީއެންސީ ނައިބު ރައީސުންގެ އިންތިހާބު
- އަބްދުﷲ ރާފިއު - 968 ވޯޓު
- އަހުމަދު ޝިޔާމު - 964 ވޯޓު
- ފާތިމަތު ސައުދާ - 923 ވޯޓު
- އިބްރާހިމް ސުޖާއު - 862 ވޯޓު
- މުހައްމަދު ހުސައިން ޝަރީފް - 780 ވޯޓު
- މުހައްމަދު ސައީދު - 833 ވޯޓު
- އަސްމާ ރަޝީދު - 288 ވޯޓު
- މުހައްމަދު ނިމާލް - 301 ވޯޓު
މި އިންތިހާބުގައި ވޯޓުލުން ކުރިއަށް ގެންގޮސްފައި މޯބައިލް އެޕްލިކޭޝަނެއް ބޭނުންކޮށްގެންނެވެ. މެންބަރުން ވޯޓުލާންޖެހެނީ ކިއުއާރް ކޯޑެއް ސްކޭންކޮށްގެންނެވެ. އަދި ވޯޓުލުމަށް ދީފައި ވަނީ ފަސް މިނެޓުގެ ވަގުތުކޮޅެކެވެ.
ވޯޓު ނިމުމުން ކުޑަ ވަގުތުކޮޅެއްގެ ތެރޭގައި ނަތީޖާ ވަނީ އިއުލާނުކޮށްފަ އެވެ. ނަތީޖާ އިއުލާންކޮށްދެއްވީ ޕީއެންސީގެ އިންތިހާބު ކޮމިޓީގެ ފަރާތުން ފުއާދު ތައުފީގެވެ.
މިއަދު ކުރިއަށްދާ އިންތިހާބުތަކަށްފަހު ޕާޓީ ބައިބައިނުވެ އެކަތިގަނޑެއްގެ ގޮތުގައި ކުރިއަށްދާން ރައީސް މުހައްމަދު މުއިއްޒު ވަނީ ރޭ އިލްތިމާސްކޮށްފަ އެވެ.
"އިންތިހާބެއްގައި ބަޔަކު ވާދަކުރަންޏާ މޮޅުވާ މީހުންނާއި ބަލިވާ މީހުން ތިބޭނެ. އަޅުގަނޑުމެންގެ އަޒުމަކަށް ވާންވާނީ ކުރިން މިދެންނެވި ކަންކަން އަބަދުވެސް ހަނދާން ބަހައްޓައިގެން އަޅުގަނޑުމެން ތެރޭގައި އެއްވެސް ކަހަލަ ބައިބައިވުމެއް އިންތިހާބު ނިމޭ ހިސާބުން އައިސްގެން ނުވާނެކަން،" މުއިއްޒު ވިދާޅުވި އެވެ.
