އެމެރިކާގެ ވިސްކޮންސިންގެ ކޮންގްރެސް މެންބަރު ޓޮމް ޓިފަނީ ދަތުރުކުރެއްވި ކުޑަ ބޯޓެއް ފެންގަނޑަކަށް ޖައްސަން ޖެހުމާ ގުޅިގެން، އޭނާ އާއި ބޯޓުގެ ޕައިލެޓް ފަތާފައި ސަލާމަތްވާން ޖެހުނު ކަމަށާއި، މި ހާދިސާގައި އޭނާއަށް ކުދި އަނިޔާތަކެއް ލިބިފައިވާ ކަމަށް ވިދާޅުވެއްޖެ އެވެ.
އެ ސްޓޭޓުގެ ގަވަރުނަރު ކަމަށް ރިޕަބްލިކަން ޕާޓީގެ ފަރާތުން ވާދަކުރައްވާ ޓިފަނީ ދަތުރުކުރެއްވި ކުޑަ ބޯޓަށް ދިމާވި މެކޭނިކަލް މައްސަލައަކާ ގުޅިގެން، ހޮނިހިރު ދުވަހުގެ ރޭ ލޭކް ވޯސޯއަށް ބޯޓު ކުއްލި ހާލަތުގައި ޖައްސަން މަޖުބޫރުވީ ކަމަށް ކައުންޓީ ޝެރިފްގެ އޮފީހުން ބުނެފައިވެ އެވެ.
ޓިފަނީ ވިދާޅުވި ގޮތުގައި ބޯޓު ފެންގަނޑަށް ޖެއްސުމާއެކު، އޭނާއާއި ޕައިލެޓް ވަނީ އެމަޖެންސީ ނަންބަރު 911 އަށް ގުޅައި އެހީއަށް އެދިފަ އެވެ.
ލަ ކްރޮސް ކައުންޓީގައި އޮތް ފަރިއްކޮޅަކަށް ފަހު ޓިފަނީ އެނބުރި ގެއަށް ވަޑައިގަންނަވަނިކޮށް، ވޯސޯ ޑައުންޓައުން އެއާޕޯޓާ ގާތްވަމުން ދަނިކޮށް ކުއްލިއަކަށް ބޯޓުގެ އިންޖީނުން ބާރު ކެނޑުނީ ކަމަށް އާދީއްތަ ދުވަހު އޭނާ ވިދާޅުވި އެވެ.
މެރަތަން ކައުންޓީ ޝެރިފްގެ އޮފީހުން ނެރުނު ނޫސްބަޔާނެއްގައި ބުނެފައިވަނީ، ފެންގަނޑަށް ބޯޓެއް ވެއްޓިގެން އުޅޭ ކަމުގެ ރިޕޯޓު ލިބުނު ކަމަށެވެ. ޝެރިފްގެ އޮފީހުން ބުނި ގޮތުގައި، ބޯޓުގައި ތިބި ދެ މީހުން ބޯޓުން ނުކުމެ ފުންނޫން ހިސާބަކަށް ދިޔަތާ ގާތްގަނޑަކަށް 15 މިނެޓު ފަހުން ފަޔާ ޑިޕާޓްމަންޓުގެ އެއާބޯޓަކުން ވަނީ އެމީހުން ސަލާމަތްކޮށްފަ އެވެ.
އެ އޮފީހުން ބުނި ގޮތުގައި، ފަސް މީހުންގެ ޖާގަ އޮންނަ، އެއް އިންޖީނުލީ "ބީޗްކްރާފްޓް K35" މަރުކާގެ އެ ބޯޓުގައި އެވަގުތު ތިބީ ހަމައެކަނި ޓިފަނީއާއި ޕައިލެޓެވެ.
ބޯޓަށް ދިމާވި މެކޭނިކަލް މައްސަލައިގެ އަސްލު ސަބަބު އަދި ސާފުވެފައި ނުވާއިރު، ފެޑަރަލް އޭވިއޭޝަން އެޑްމިނިސްޓްރޭޝަނާއި ނޭޝަނަލް ޓްރާންސްޕޯޓޭޝަން ސޭފްޓީ ބޯޑުން މި ހާދިސާ ތަހުގީގު ކުރާނެ ކަމަށް ޝެރިފްގެ އޮފީހުން ބުނެ އެވެ.
އެމަޖެންސީ ޓީމުތަކުން ބޯޓު ނެގުމުގެ މަސައްކަތް ކުރަމުންދާއިރު، ބޯޓު އަދިވެސް އޮތީ އެ ފެންގަނޑުގެ ތެރޭގައި ކަމަށް ޝެރިފްގެ އޮފީހުން އިތުރަށް ބުންޏެވެ.
