މިދިޔަ ހަ މަސް ދުވަހުގެ ތެރޭގައި އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާ 15،000 އަށްވުރެ ގިނަ މީހުން ގުޅިފައިވާ ކަމަށް އެ ޕާޓީގެ ޗެއާޕާސަންގެ ނައިބު އިބްރާހިމް ވަހީދު (އިބުރޭ) މިއަދު ވިދާޅުވެއްޖެ އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އިބުރޭ ވިދާޅުވީ ސަރުކާރު ހިއްސާވާ ކުންފުނި (އެސްއޯއީ) ތަކުގައި ތިބި މުވައްޒަފުންނަށް ބިރުދައްކައިގެން އެ މުވައްޒަފުން ތިބި ޕާޓީން ވަކިވެ ޕީއެންސީއަށް ވަންނަން މަޖުބޫރުކުރަމުންދަނީ އެމްޑީޕީއަށް 15،000 އަށްވުރެ ގިނަ މެންބަރުން ހަ މަސް ދުވަހުގެ ތެރޭގައި ވަނުމާ ގުޅިގެން އެކަމާ ބިރުން ކަމަށެވެ.
"އެބޭފުޅުން މި ކޮންގްރެސްއާމެދު ޖެހިލުންވާވަރު އަޅުގަނޑުމެންނަށް ފާހަނގަވާ ބައިވަރު ކަންތައްތަކެއް މީގެތެރެއިން ދިމާވެއްޖެ. އެހެން މިދެންނެވި ގޮތަކީ އިދިކޮޅު ޕާޓީއެއްގެ ގޮތުގައި އޮވެގެން މިދިޔަ ހަ މަސް ދުވަސް ތެރޭގައި އެމްޑީޕީއަށް އަލަށް ގުޅިއްޖެ 15،000 އަށްވުރެ ގިނަ މީހުން," އިބްރާހިމް ވަހީދު ވިދާޅުވި އެވެ.
"ގުޅުމާ އެއްކޮށް އެސްއޯއީތަކުގައި ތިބި ހުރިހާ މީހުންނަށް ބިރު ދައްކައިގެން ޕާޓީތަކުން ކެނޑެން އަންގާ މިކަންތައްތައް ހިންގައިގެން މިއުޅެނީކީ ކޮންމެހެން ވަޒީފާގެ ބިރަކަށް ނޫން އެނގޭތޯ."
މީގެއިތުރުން އެމްޑީޕީން ކޮންގްރެސް ބާއްވާނެ ތަނެއްވެސް ސަރުކާރުން ނުދީގެން އުޅެނީވެސް ގިނަ ބަޔަކު އެތަނަށް ޖަމާވާނެތީ ކަމަށް އިބުރޭ ވިދާޅުވި އެވެ. އޭނާ ވިދާޅުވީ ކޮންގްރެސް ބާއްވަނީ ވެރިކަން ވައްޓާލަން ނޫން ކަމަށެވެ.
އެސްއޯއީތައް މެދުވެރިކޮށް ޕީއެންސީއަށް މުވައްޒަފުން ވެއްދުމުގެ މަސައްކަތް ޕީއެންސީން ދަނީ ކުރަމުންނެވެ. އެގޮތުން މިދިޔަ ހަފްތާގައި ލައިވް ޓީވީގައި ސްޓެލްކޯ މެދުވެރިކޮށް ޕީއެންސީއަށް މުވައްޒަފުން ވައްދާކަން ވަނީ ހާމަވެފަ އެވެ.
އިލެކްޝަންސް ކޮމިޝަނުގެ ސިޔާސީ ޕާޓީތަކުގެ ދަފްތަރުގައިވާ ގޮތުން ޖޫން 30، ގެ ނިޔަލަށް އެމްޑީޕީގައި 55،399 މެނެބަރުން އެބަ ތިއްބެވެ. އެ މުއްދަތަށް ސަރުކާރު ހިންގާ ޕީއެންސީގައި ތިބީ 67،579 މެންބަރުންނެވެ.
ޕީއެންސީން މި މަހު ބުނި ގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 77،000 އަށް އަރައިފަ އެވެ. ނަމަވެސް އިލެކްޝަންސް ކޮމިޝަނުން އެ އަދަދު މިހާތަނަށް ކަށަވަރުކޮށްދީފައެއް ނުވެ އެވެ.
