އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސް އޮކްޓޫބަރު 1، އިން 3، އަށް ބާއްވަން ނިންމައި، ކޮންގްރެސްގެ ތެރެއިން އިންވެސްޓްމެންޓް ފޯރަމެއް ބާއްވަން އެ ޕާޓީން ނިންމައިފި އެވެ.
އޮކްޓޫބަރު 1، އިން 3، އަށް މާލެ ސިޓީ ހޯލްގައި ކޮންގްރެސް ބާއްވަން ނިންމާފައިވާކަން އިއުލާނުކުރީ އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޕާޓީގެ ޗެއާޕާސަންގެ ނައިބު، މުހައްމަދު ޝިފާޒް އެވެ. އޭނާ ވިދާޅުވީ ކުރިއަށް އޮތް ދެތިން ދުވަހެއްގެ ތެރޭގައި ކޮންގްރެސްގެ މަންދޫބުން ކަނޑައެޅުމާއި ކޮންގްރެސްގެ ޑެލިގޭޓުން އިއުލާނުކުރާނެ ކަމަށެވެ.
"މި ކޮންގްރެސްގެ އެއް ސެޝަން އަޅުގަނޑުމެން އެބަ ހާއްސަކުރަން އިންވެސްޓްމެންޓް ފޯރަމަކަށް، އިންވެސްޓްމެންޓް ފޯރަމެއްގެ ނަމުގައި ކުރަން ބޭނުންވެގެން މިއުޅޭ ކަމަކީ ކައުންސިލްތަކުން އެ ރަށެއްގައި ހިންގާނޭ މަޝްރޫއުތަކެއް ކަނޑައަޅާފައި އެ މަޝްރޫއުތަކަށް އިންވެސްޓަރުން ހޯދާފައި އެ މަޝްރޫއުތައް ކުރިއަށް ގެންދެވޭނެ ގޮތެއް އަޅުގަނޑުމެން ހޯދައިދިނުން މި ޕާޓީން،" ޝިފާޒް ވިދާޅުވި އެވެ.
އޭނާ ވިދާޅުވީ ކޮންގްރެސްގެ ތެރެއިން އިންވެސްޓްމެންޓް ފޯރަމެއް ބާއްވަން ނިންމީ ރާއްޖޭގެ ކައުންސިލްތަކާ މަޝްވަރާ ކުރުމަށްފަހު ކަމަށެވެ. އެގޮތުން، އިންވެސްޓްމެންޓް ފޯރަމަށް ހުށަހެޅުމަށްޓަކައި މިހާރު ވެސް 74 ޕްރޮޖެކްޓު އެމްޑީޕީގެ ސެކްރެޓޭރިއެޓްއާ ހިއްސާކޮށްފައިވާ ކަމަށް އޭނާ ވިދާޅުވި އެވެ.
އުއްމީދަކީ ކޮންގްރެސް ފެށުމުގެ ކުރިން އެ އަދަދު 100 އަށްވުރެ މަތިވުން ކަމަށް އޭނާ ވިދާޅުވި އެވެ.
"މި އިންވެސްޓްމެންޓް ފޯރަމުގައި އަޅުގަނޑުމެން މި ބަލަނީ ރާއްޖޭގެ ވިޔަފާރިވެރިންނާއި އަދި، ރާއްޖެއިން ބޭރުގެ ވިޔަފާރިވެރިންގެ މެދުގައި ރާއްޖޭގެ ކައުންސިލްތަކުން ހިންގަން މި ގަސްދުކުރާ ޕްރޮޖެކްޓުތަކަށް އެ ބޭފުޅުންގެ ޝައުގުވެރިކަން ހުރި މިންވަރަކާއި އެ ބޭފުޅުންގެ ބައިވެރިވުމެއް ލިބޭނެ ގޮތަށް އެކަންކަން ކުރިއަށް ގެންދިޔުމަށް،" ޝިފާޒް ވިދާޅުވި އެވެ.
ކޮންމެ ފަސް އަހަރަކުން އެއްފަހަރު ބާއްވަން އެމްޑީޕީގެ އަސާސީ ގަވާއިދު ލާޒިމުކުރާ ކޮންގްރެސްއަށް މި ފަހަރު އެ ޕާޓީން ދީފައިވާ ނަމަކީ ރަށްވެހި އުފެއްދުމެވެ.
