އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެކްޓިވިސްޓް މުހައްމަދު ޝާމިންގެ ބަންދަށް 10 ދުވަސް މިއަދު ޖަހައިފި އެވެ.
ޝާމިންގެ އިއްޔެ ހައްޔަރުކުރީ އޮގަސްޓް 28، ގައި އެމްޑީޕީން ކުރިއަށް ގެންދިޔަ މުޒާހަރާގެ ތެރެއިން ޗާންދަނީ މަގާއި ދީދީ ގޯޅިއާ ގުޅޭ ކަންމަތީގައި މަގު ބަންދުކުރުމަށް ފުލުހުން ޖަހާފައި ހުރި ބެރިކޭޑު ހުރަސްކޮށް ބަންދުކޮށްފައިވާ ސަރަހައްދަށް ވަދެފައިވާ ކަމަށް ބުނެ އެވެ.
ޝާމިންގެ ވަކީލު އަދަދު އަށް ވިދާޅުވީ ޝާމިންގެ މައްޗަށް ފުލުހުން ކުރަނީ މުދަލަށް ގެއްލުންދިނުގެ ތުހުމަތާއި ފުލުހުންގެ ވާޖިބަށް ހުރަސްއެޅުމުގެ ތުހުމަތުގެ އިތުރުން އަމުރަށް ނުކިޔަމަންތެރިވުމުގެ ތުހުމަތު ކަމަށެވެ.
އޭނާ ވިދާޅުވީ ޝާމިންގެ ބަންދަށް 10 ދުވަސް ޖަހާފައިވަނީ ފުލުހުންގެ ވާޖިބަށް ހުރަސްއެޅުމަކީ ބޮޑު ކުށަކަށްވާތީ، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބުނެ ކަމަށެވެ.
އޭނާއާ ދެކޮޅަށް ހުރި ހެކީގެ ގޮތުގައި ބަޔާން ކޮށްފައި ވަނީ، ސީނަށް ދިޔަ ފުލުހުންގެ ބަޔާނާއި ސީސީޓީވީ ސްނެޕްޝޮޓުތަކުގެ އިތުރުން އިންޓެލިޖެންސް ރިޕޯޓެކެވެ.
ޝާމިންގެ ބަންދަށް 10 ދުވަސް ޖަހާފައިވާއިރު، މީގެ ކުރިން މެއި މަހުގެ ތެރޭގައި ވެސް ފުލުހުން އޭނާ ހައްޔަރުކޮށް ބަންދުގައި ބެހެއްޓި އެވެ. އެފަހަރު އޭނާ ހައްޔަރުުކުރީ ނޫސްވެރިންގެ ހައްގުގައި މާލޭގައި ކުރި މުޒާހަރާތަކުގެ ތެރެއިންނެވެ. އެ މައްސަލަ ވެސް ފުލުހުން ދަނީ ތަހުގީގު ކުރަމުންނެވެ.
