ރައީސުލްޖުމްހޫރިއްޔާ މުހައްމަދު މުއިއްޒު އިއުލާނުކުރެއްވި އިހުތިރާމު އަދާކުރުމުގެ ގައުމީ މަޝްރޫއުއަށް ލޯގޯއެއް ފަރުމާކުރުމުގެ ފުރުސަތު މިއަދު ހުޅުވާލައިފި އެވެ.
އިހުތިރާމު އަދާކުރުމުގެ ގައުމީ މަޝްރޫއުއަށް ލޯގޯއެއް ފަރުމާކުރުމުގެ ފުރުސަތު ހުޅުވާލައިފައި ވަނީ އާންމު ހިދުމަތުގެ މީޑިއާ، ޕީއެސްއެމްގައި މިއަދު ބޭއްވި ރަސްމިއްޔާތެއްގަ އެވެ.
އެ މަޝްރޫއުއަށް އެންމެ މޮޅު ލޯގޯއެއް ފަރުމާކުރާ ފަރާތަކަށް 60،000ރ. ގެ އިނާމެއް ދިނުމަށް ހެރިޓޭޖު މިނިސްޓްރީން ވަނީ ނިންމައިފަ އެވެ.
އެ މަޝްރޫއުއަށް ލޯގޯއެއް ފަރުމާ ކުރުމަށްފަހު، ހުށަހަޅަންޖެހެނީ ކަލްޗާ އެންޑް ހެރިޓޭޖު މިނިސްޓްރީއަށެވެ. ލޯގޯ ހުށަހެޅުމުގެ ސުންގަޑިއަކީ ސެޕްޓެމްބަރު 24، ވާ ބުރާސްފަތި ދުވަހުގެ މެންދުރުފަހު 2:00 އެވެ.
އެ މިނިސްޓްރީއަށް ހުށަހަޅާ ލޯގޯތަކުގެ ތެރެއިން އެންމެ މޮޅު ލޯގޯއެއް ހޮވާނީ ފަނޑިޔާރުންގެ ޕެނަލަކުން ކަމަށް ވެސް ހެރިޓޭޖު މިނިސްޓްރީން ބުންޏެވެ.
ފަސް އަހަރުދުވަހަށް ކުރިއަށް ގެންދަން ނިންމާފައިވާ އެ މަޝްރޫއުގެ ޝިއާރަކީ އިހުތިރާމުގެ އުފާ، މުޖުތަމައުގެ ނަފާ އެވެ. އުމުރުން 16 އަހަރުން މަތީގެ ކޮންމެ މީހަކަށް އަދި، ރާއްޖޭގައި ރެޖިސްޓްރީކޮށްގެން ހިންގާ ޖަމިއްޔާ ޖަމާއަތްތަކާއި ކްލަބުތަކަށް އެ މަޝްރޫއުއަށް ލޯގޯ ހުށަހެޅޭނެ އެވެ.
ލޯގޯ ހުށަހެޅުމާބެހޭ އިތުރު މައުލޫމާތު ހެރިޓޭޖު މިނިސްޓްރީގެ ވެބްސައިޓުގައި ބަޔާންކޮށްފައިވެ އެވެ.
