ޓިއުރިން (ސެޕްޓެމްބަރު 7) - އިޓާލިއަން ލީގުގައި ރޭ ޔުވެންޓަސް އިން ފަހު ވަގުތު ގޯލު ޖަހައި 1-1 އިން އޭސީ މިލާންއާ އެއްވަރުކޮށްފި އެވެ.
މި މެޗުގެ ކުރިން ޔުވެންޓަސް އާއި މިލާނުން މި ފަހަރު ލީގުގައި ކުޅުނު ފުރަތަމަ ދެ މެޗުން ވެސް ވަނީ މޮޅުވެފަ އެވެ. އެއް ވަނައިގައި އޮތް ރޯމާ އާއި ދެ ވަނައިގައި އޮތް އިންޓަ އަށް ތިން މެޗުން ނުވަ ޕޮއިންޓް ލިބިފައިވާއިރު، ތިން ވަނައިގައި އޮތް ކޯމޯ، ހަތަރެއްގައި އޮތް މިލާން އަދި ފަސް ވަނައިގައި އޮތް ޔުވެންޓަސް އަށް ތިން މެޗުން ލިބިފައިވަނީ ހަތް ޕޮއިންޓެވެ.
ޔުވެންޓަސްގެ އަލިއާންޒް ސްޓޭޑިއަމްގައި ރޭ ކުޅުނު މެޗުގައި އެ ޓީމުން 11 ވަނަ މިނިޓްގައި ހަމަލާއެއް ފޮނުވާލި އެވެ. އެ ގޮތުން، އޭރިއާބޭރުން ނިކޯ ގޮންޒާލޭޒް ޖެހި ޝޮޓް މިލާން ކީޕަރު، މައިކް މައިނިއޯން ވަނީ މަތަކޮށްފަ އެވެ. އަދި، 24 ވަނަ މިނިޓްގައި ޔުވެންޓަސްގެ ފްރާންސެސްކޯ ކޮންސެސާއޯގެ ހަމަލާ ވެސް ކީޕަަރު މައިނިއޯން ވަނީ މަތަކޮށްފަ އެެވެ.
ފުރަތަމަ ހާފުގައި ލަނޑެއް ނުޖެހި ދިޔައިރު، ދެ ވަނަ ހާފު ފެށިގެން ނުވަ ވަނަ މިނިޓްގައި ޔުވެންޓަސް އަށް ލީޑުނަގައިދޭން ކޮންސެސާއޯ ޖެހި ޝޮޓް އަމާޒުވީ ގޯލުގެ ދަނޑިއަށެވެ.
މިލާނުން މެޗުގައި ފޮނުވާލި ފުރަތަމަ ރަނގަޅު ހަމަލާއާ އެކު، 68 ވަނަ މިނިޓްގައި ލީޑުނެގި އެވެ. އެ ގޮތުން، ކައުންޓަ އެޓޭކެއްގައި ސެމުއެލް ޗުކުވޭޒީ މަތިމަތިން އޭރިއާތެރެއަށް ނަގައިދިން ބޯޅަ މެއިން ކޮންްޓްރޯލް ކުރުމަށް ފަހު، ރަނގަޅު ވަގުތު ބަލާފައި، އަލްފަޑްޖޯ ސީސޭ ވަނީ ގޯޯލުގެ ތިރީ ކަނަށް ބޯޅަ އަމާޒުކޮށްލައިފަ އެވެ. އޭނާ މި ލަނޑު ޖެހީ ކުޅެން އެރިތާ މަދު ވަގުތުކޮޅެއްގެ ތެރޭގަ އެވެ.
އެޓޭކަށް ގިނަ ކުޅުންތެރިން ފޮނުވައިގެން ޔުވެންޓަސް އިން ލަނޑެއް ޖެހޭތޯ މަސައްކަތްކުރަމުންދިޔައިރު، 85 ވަނަ މިނިޓްގައި އެ ޓީމުގެ ފޯވާޑް، ނިކް ވޯލްޓަމާޑާ ޖެހި ޝޮޓް ގޯލާ ސީދާނުވި އެވެ. އެކަމަކު، މެޗުގެ އިތުރު ވަގުތުގެ ފަސް މިނިޓްގެ ތެރެއިން ދެ ވަނަ މިނިޓްގައި، ޓެއުމް ކޫޕްމައިނާސް ނަގައިދިން ބޯޅައަކުން އޭރިއާތެރެއިން، ފެޑެރީކޯ ގައްޓީ ބޮލުން ގޯލު ޖަހައި ނަތީޖާ އެއްވަރުކޮށްދިނެވެ. ގައްޓީ އަކީ ވެސް ބަދަލަކަށް ކުޅެން އެރި ކުޅުންތެރިއެކެވެ.
