މިސްކިތްތައް ބެލެހެއްޓުން ކައުންސިލްތައް އަތުން ނަގައި އެ މަސައްކަތް ކުރަން މޯލްޑިވްސް އައުގާފް އިންވެސްޓްމަންޓް ލިމިޓެޑް ނަމުގައި ސަރުކާރުން ކުންފުންޏެއް އުފެއްދީ ރައްޔިތުންނަށް ޖެއްސުންކުރަން ކަމަށް މާލެ ސިޓީގެ މޭޔަރު އާދަމް އާޒިމް މިއަދު ވިދާޅުވެއްޖެ އެވެ.
އާޒިމް އަދަދު އަށް ވިދާޅުވީ މިސްކިތްތައް ބެލެހެއްޓުން ކައުންސިލްތައް އަތުން އަތުލަން ސަރުުކާރުން ކުންފުންޏެއް އުފައްދާފައި މިވަނީ ދިވެހިންނާ ހަވާލުކޮށްގެން މިސްކިތްތަކުގެ އާބާތުރަ ފިލުވައި ހުރިހާ މަސައްކަތެއް ނިމުނުތަނާ ކަމަށެވެ.
"ސީދާ ރައްޔިތުންނަށް ޖެއްސުންކުރަން [ކުންފުނި އުފެއްދީ]. އެއް ކަމަކީ މިސްކިތްތައް ނުލާހިކު ރަނގަޅަށް މަރާމާތުކޮށް އާބާތުރަ ފިލުވައި ނިންމާފައި އެހުރީ. ދިވެހިން ވެސް ލައިގެން މަސައްކަތް މިކުރަނީ. އަޅުގަނޑުމެން ހަވާލުވިއިރުގައި ކޮންޓްރެކްޓް ދީގެން މަގުމަތިން މީހުން ނަގައިގެން މަސައްކަތް ކުރަމުންދިޔަ ތަނެއް މިތަނަކީ. އެ ކޮންޓްރެކްޓްތައް ކެންސަލްކޮށްފައި އަޅުގަނޑުމެން އަމިއްލައަށް ކުރިއަށް މިގެންދަނީ. ރީތިކޮށް މިސްކިތްތައް މިހާރު ހުންނާނީ،" އާޒިމް ވިދާޅުވި އެވެ.
"މިސްކިތްތަކުގެ އެއްވެސް މައްސަލައެއްވެސް ނާދޭ މިހާރު. އެކަން ހަޖަމުނުވެގެން އުޅޭހެން އަޅުގަނޑަށް ހީވަނީ. އަސްލުގައި ރަނގަޅަށް ކޮށްކޮށް އޮތް ކަމެއް އެހެން ބަޔަކާ ދިމާލަށް ދާންޖެހޭ ސަބަބެއްވެސް ނެތް. ދެން އަޅުގަނޑު ގަބޫލުކުރެވެނީ ރައްޔިތުންނަށް ޖެއްސުންކުރަން ކުރާ ކަމެއްހެން."
އާޒިމް ވިދާޅުވީ މިސްކިތްތަކުގެ ކަންކަން ކައުންސިލްތައް އަތުން އަތުލަން ސަރުކާރުން ކުންފުންޏެއް އުފެއްދިއިރު، ކައުންސިލުން މުވައްޒަފުން ނަގައިގެން މިސްކިތްތަކުގައި ގުރުއާން ކްލާސްތައް ހިންގަން ވެސް ކައުންސިލުން އޮތީ ފާސްކޮށްފައި ކަމަށެވެ. ނަމަވެސް މޭޔަރު ވިދާޅުވީ ސަރުކާރުގެ ނިންމުމާއެކު ރައްޔިތުންގެ ލުއިފަސޭހައަށް ކުރި އެ މަސައްކަތަށް ވެސް ހުރަސް އެޅޭނެ ކަމަށެވެ.
"ދެން ދެވަނައަށް އަޅުގަނޑަށް ބޮޑަށް ފެންނަނީ މިސްކިތްތަކުގައި އަޅުގަނޑުމެން ގުރުއާން ކްލާސްތައް ހިންގަންވެގެން އިހަކަށްދުވަހު ކައުންސިލުން ފާސްކުރިން ކައުންސިލުން ސްޓާފުން ނަގައިގެން ހަމަ. ގުރުއާން ޓީޗަރުން ނަގައިގެން. އެހެންވީމަ އެކަން ރައްޔިތުންނަށް ވަރަށް ބޮޑު ލުޔެއްދޭން މަސައްކަތްކުރީ. ގުރުއާން ކްލާސްތައް ހުއްޓުވަންވެގެން އުޅޭތަން މި ފެންނަނީ،" އޭނާ ވިދާޅުވި އެވެ.
ވަގުފްތަކާއި މިސްކިތްތައް ބިނާކޮށް މަރާމާތުކުރަން ކަމަށް ބުނެ ސަރުކާރުން އިތުރު ކުންފުންޏެއް އުފައްދައިފި
ރާއްޖޭގައި ވަގުފްތަކާއި މިސްކިތްތައް ބިނާކޮށް މަރާމާތުކުރުމަށާއި، ޝަރީއަތް ހުއްދަކުރާ ވިޔަފާރިތައް ހިންގުމަށް "މޯލްޑިވްސް އައުގާފް އިންވެސްޓްމަންޓް ލިމިޓެޑް" ގެ ނަމުގައި ސަރުކާރުން ކުންފުންޏެއް ވަނީ އުފައްދާފައި. ސަރުކާރުގެ ސައްތައިން ސައްތަ ހިއްސާ އޮންނަ މި ކުންފުނީގެ ރައުސްމާލަކީ 100 މިލިއަން ރުފިޔާ ކަމަށް ވަނީ ކަނޑައަޅާފައި.
އާޒިމް ވިދާޅުވީ އޭނާ މޭޔަރުކަމާ ހަވާލުވުމުގެ ކުރިން ރައީސް މުހައްމަދު މުއިއްޒުގެ މޭޔަރުކަމުގެ ދައުރުގައި މާލޭގެ މިސްކިތްތައް ވީރާނާކޮށް ހަޑިކޮށްލާފައިވާ ކަމަށެވެ. އެ ހުރިހާ ކަމެއް ރަނގަޅުކުރީ އާޒިމްގެ ދައުރުގައިކަން އޭނާ ފާހަގަކުރެއްވި އެވެ.
މީގެ އިތުރުން، ސަރުކާރުން މިފަދަ ބޮޑު ނިންމުމެއް ނިންމިއިރު ކައުންސިލާ މަޝްވަރާނުކުރާ ކަމަށް އާޒިމް ވިދާޅުވި އެވެ. އޭނާ ވިދާޅުވީ މިކަމާ ގުޅޭ ގޮތުން ދެން އޮންނަ ކައުންސިލް ޖަލްސާއެއްގައި މަޝްވަރާކޮށް ގޮތްތަކެއް ނިންމާނެ ކަމަށެވެ.
ނަމަވެސް ކައުންސިލްގެ ކަންކަމާ ސަރުކާރުން ހަވާލުވެގެން އެ މަސައްކަތް އެކަށީގެންވާ ގޮތެއްގައި ކުރިއަށް ނުދާނަމަ ކައުންސިލުން އެކަންކަން ހައްލު ކުރާނެ ކަމަށާއި މިސްކިތްތައް ހަޑިކޮށްލައި ވީރާނާވާން ދޫނުކުރާނެ ކަމަށް އާޒިމް ވިދާޅުވި އެވެ.
ސަރުކާރުން ބުނީ މި ކުންފުނި އުފެއްދީ ވަގުފްތަކާއި މިސްކިތްތައް ބިނާކޮށް މަރާމާތުކުރުމުގެ އިތުރުން އިސްލާމީ ޝަރީއަތް ހުއްދަކުރާ ވިޔަފާރީގެ ހަރަކާތްތައް ދެމެހެއްޓިނިވި ގޮތެއްގައި ހިންގުމަށް ކުރަންޖެހޭ އެންމެހާ މަސައްކަތް ކުރުމަށްޓަކައި ކަމަށެވެ.
މި ކުންފުނީގެ ދަށުން ވަގުފް އިމާރާތްތައް އެޅުމާއި މަރާމާތުކުރުން ހިމެނޭއިރު، އެ މަސައްކަތް މީގެ ކުރިން ކުރަމުންދިޔައީ އިސްލާމިކް މިނިސްޓްރީންނެވެ. އެގޮތުން ދުރު ރާސްތާ ޕްލޭންތަކެއް ހަދައިގެން އެކަމަށް މިނިސްޓްރީން ދިޔައީ މަސައްކަތް ކުރަމުންނެވެ. ނަމަވެސް ކުއްލިއަކަށް އިސްލާމިކް މިނިސްޓްރީއާ ވަކިން ސަރުކާރުން ކުންފުންޏެއް އުފައްދައިގެން އެ މަސައްކަތް ކުރަން ފަށާފައި މިވަނީ ކީއްވެގެން ކަމެއް ސާފެއް ނުވެ އެވެ.
