ދިވެހިރާއްޖެ އިސްލާމްވުމުގެ ކުރިން ދީނުގެ ނަމުގައި އިންސާނުން ގުރުބާންކޮށް އުޅުނު ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.
ރާއްޖެ އިސްލާމްވިތާ 900 އަހަރު ފުރުން ފާހަގަ ކުރަން ބޭއްވި ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، ދީނުގެ ނަމުގައި އިންސާނުން ގުރުބާން ކުރިކަން ރާއްޖެއިން ފެނުނު އާސާރުތަކުން ފެންނަން އެބަހުރި ކަމަށެވެ.
"އިސްލާމްދީން އައުމުގެ ކުރިން މިކަން ދިވެހި ބިމުގައި އޮތީ ކިހިނެއްތޯ؟ އަޅުގަނޑު ފުލޯކުވާހަކަތަކާ ދިމާޔަށް ދަތުރުކުރާކަށް ނެތިން. އެކަމަކު ފެންނަން ހުރި ތާރީހީ ހަގީގަތްތައް އެބަހުރި. ރާއްޖޭގައި ދީނުގެ ނަމުގައި އިންސާނުން ގުރުބާންކުރެވިފައިވާކަން ފެންނަން ހުރި އާސާރުތަކުން އެނގެން އެބަ އޮތްކަމަށް، މުއައްރިހުން ވިދާޅުވޭ،" ރައީސް ވިދާޅުވި އެވެ.
"އިންސާނުން ގުރުބާން ކުރުން ނުވަތަ ދީނުގެ ނަމުގައި އިންސާނުން ކަތިލުމަކީ ބާތިލް ވަރަށް ގިނަ ދީންތަކުގައި އޮންނަ ކަމެއް. އެ މީހުން އަޅުކަންކުރަން ތިބޭ ތަންތަނުގައި މި ފަދަ ޖަރީމާތައް ހިންގައިފައިވާކަން ބޭރުގެ ތަފާތު ހޯދުންތަކުން ވެސް ފެނިފައި ވެސް އެބަ ހުރި."
އިންސާނުން ގުރުބާން ކުރިކަން އެނގެނީ ރާއްޖެއިން ފެނުނު ކޮން އާސާރަކުން ކަމެއް ރައީސް މުއިއްޒު ވިދާޅެއްނުވެ އެވެ. އަދި ރާއްޖޭގައި އިންސާނުން ގުރުބާންކޮށް އުޅުނު ކަމަށް ބުނާ މުއައްރިހުންނަކީ ކޮބައިކަމެއް ވެސް އެމަނިކުފާނު ވިދާޅެއްނު ވެ އެވެ.
އިންސާނުން ގުރުބާން ކުރުމުގެ ސަގާފަތެއް ރާއްޖޭގައި އޮތް ކަމުގެ ވާހަކަ އިތުރަށް ދައްކަވަމުން ރައީސް ވިދާޅުވީ، ދިވެހިންނަށް ދިރިހުރުމުގެ ހައްގު ލިބުނީ އިސްލާމްދީނަށް ފަހު ކަމަށެވެ.
"ދިވެހި ކޮންމެ ރައްޔިތަކަށް އެއީ އެ މީހާ ފަގީރަސް މުއްސަންޖަސް، އެއީ އަންހެނެއް ކަމުގައި ވިޔަސް، ފިރިހެނެއް ކަމުގައި ވިޔަސް، އެއީ ރީތި މީހެއް ކަމުގައި ވިޔަސް، ނުވަތަ އެ ނޫން މީހެއް ކަމުގައި ވިޔަސް، ކޮންމެ ދިވެހި ފަރުދަކަށް ދިރިހުރުމުގެ ހައްގު ކަށަވަރުކޮށް ދިނީ ހިޖުރީ ގޮތުން މީގެ 900 އަހަރުކުރިން މާތްވެގެންވާ އިސްލާމްދީން،" އެމަނިކުފާނު ވިދާޅުވި އެވެ.
މުއިއްޒު އެހެން ވިދާޅުވި ނަމަވެސް، ރާއްޖޭގައި އިންސާނުން ގުރުބާންކޮށް އުޅުނުކަމުގެ އެއްވެސް ހެއްކެއް ފެންނަން ނެތް ކަމަށް އަދަދު އާ ވާހަކަ ދެއްކި ތާރީހު ދިރާސާ ކުރާ ތަޖުރިބާކާރަކު ބުންޏެވެ.
"ރަންނަމާރި ވާހަކަ ދިރާސާ ކުރުމުގައި އޭގެ ބައެއް ހިޔާލު ގެންގުޅޭ ބައެއް މުއައްރިހުން. އެއްބަޔަކު ބުނަނީ ގަދީމީ ޒަމާނުގައި ވެސް އޮތްކަމެއް ނޫނޭ. އަނެއްބަޔަކު ބުނަނީ ޖާވާ ހިސާބުގައި އޮތް ބުދު ދީނުގެ ތެރޭގައި ވެސް އޮތޭ އެކަން. ވީމާ ރާއްޖޭގައި ވެސް އޮވެދާނޭ. މިހެންގޮސް ކުރެވޭ ދިގު ބަހުސެއް އޮވޭ،" ނޫހުގައި ނަން ނުޖެހުމަށް އެދި އޭނާ ބުންޏެވެ.
