ޑޮލަރު ގަނެވިއްކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ ރަސްމީ ރޭޓަށް ވުރެ ވުރެ ބޮޑު އަގުގައި ޑޮލަރު ވިއްކާ ކަޅު ބާޒާރުގައި ޑޮލަރު ވިއްކާ އަގުގެ ހަބަަރު ޝާއިއުކުރުން ގާނޫނުން މަނާކުރުމުން، އަދަދު ނޫހުން އަދާހަމަކުރަމުންދިޔަ ޑޮލަރު ޓްރެކަރު ވެބްސައިޓުން ނަގައިފި އެވެ.
އަދަދު ނޫހުން ޑޮލަރު ޓްރެކަރެއް ތައާރަފުކުރީ ރާއްޖޭގައި ޑޮލަރުގެ ތާށިކަން އިންތިހާއަށް ބޮޑުވެ، ޑޮލަރު އަގު އުފުލެމުންދާކަމުގެ މައުލޫމާތު ރައްޔިތުންނަށް ހާމަކުރުމަކީ ނޫސްވެރިންގެ ޒިންމާއަކަށްވާތީ އެ ޒިންމާ އަދާކުރުމުގެ ގޮތުންނެވެ.
ނަމަވެސް، ކަޅު ބާޒާރުގައި މި ނޫހުގެ ވެބްސައިޓުން ކުރިން ފެންނަން ހުރި ޓްރެކަރު މިއަދު ނަގާފައި ވަނީ ވިއްކާ އަގުގެ ހަބަރުތައް ގެނެސްދީފިނަމަ، ބޮޑެތި އަދަދުތަކުން ޖޫރިމަނާ ކުރެވޭގޮތަށް ގާނޫނު ބަދަލުކުރުމާ ގުޅިގެންނެވެ.
އެކަމާ ގުޅޭގޮތުން، އަދަދު ނޫހުގެ މެނޭޖިން އެޑިޓަރު ހަސަން މުހައްމަދު ވިދާޅުވީ ރައްޔިތުންގެ މަޖިލީހުން ފާސްކުރާ ގާނޫނަކުން ވެސް އަދި ގަވާއިދަކުން ވެސް ނޫސްވެރިކަމުގެ މިނިވަންކަމަށް އަރައިގަތުމަކީ ގަބޫލުކުރެވޭ ކަމެއް ނޫން ކަމަށެވެ.
"ނޫސްވެރިކަމުގެ ހައްގު ހަނި ކުރުމަކީ، ނޫސްވެރިކަމުގެ ހައްގަށް އަރައިގަތުމަކީ ގަބޫލުކުރެވޭ ކަމެއް ނޫން، އެކަމަކު އަޅުގަނޑުމެންގެ މަސްއޫލިއްޔަތު އަދާކުރަން ހުރަސް އެޅުމަށްވިޔަސް ގާނޫނަށް ބަދަލު ގެނައީމާ އެއަށް ކަމޭހިތުމުގެ ގޮތުން ޓްރެކަރު ރިމޫވްކުރީ،" ހަސަން ވިދާޅުވި އެވެ.
ބޭރު ފައިސާއާ ބެހޭ ގާނޫނަށް ގެނައި ބަދަލުގައިވާ ގޮތުން، ކަޅު ބާޒާރުގައި ޑޮލަރު ވިއްކާ ރޭޓު އާންމުކުރީ ގާނޫނީ ޝަހުސަކުން ނުވަތަ ރަޖިސްޓްރީކޮށްފައިވާ ވިޔަފާރިއަކުން ނަމަ، 100،000ރ. އާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ އެވެ.
އޭގެ އިތުރުން، ބޭރު ފައިސާ ގަނެ ވިއްކުމަށް މަރުކަޒީ ބޭންކުން ކަނޑައަޅާފައިވާ ރޭޓު ނުވަތަ ބޭންޑަށް ވުރެ މަތީ ރޭޓުތަކުގައި ކުރާ ވިޔަފާރި ޕްރޮމޯޓުކުރުމާއި އިޝްތިހާރުކުރުމަކީ ވެސް ކުށެކެވެ. މި ކުށުގެ އަދަބަކީ 25،000ރ. އާއި 500،000ރ.އާ ދެމެދުގެ އަދަދަކުން ޖޫރިމަނާކުރުމެވެ.
