އިންޑޮނޭޝިއާގެ ޖާވާ ކަނޑުން 243 މީހުންނާއެކު ދަތުރުކުރި ބޯޓެއް، މޫސުން ގޯސްވުމުގެ ސަބަބުން އާދީއްތަ ދުވަހުގެ ހެނދުނުގެ ވަގުތެއްގައި ޚަބަރެއް ނުވެ ގެއްލިފައިވާ ކަމަށް އެ ގައުމުގެ ސާޗް އެންޑް ރެސްކިއު އެޖެންސީން ބުނެފި އެވެ.
އެ އެޖެންސީން މައުލޫމާތު ދޭ ގޮތުގައި "ވާގޯ ޓްރާންސްޕޯޓް 8" ނަމަކަށް ކިޔާ މި ބޯޓު ގެއްލިފައިވަނީ، އިރުމަތީ ޖާވާގެ ސޫރަބާޔާ ސިޓީން ފުރައިގެން ދެކުނު ކަލިމަންޓަންގެ ބަންޖަރުމާސިން ސިޓީއަށް ދަތުރުކުރަނިކޮށް ހޮނިހިރު ދުވަހުގެ ވަގުތެއްގަ އެވެ.
"މި ބަޔާން ނެރުނު ވަގުތާ ހަމައަށް ވެސް ބޯޓާ އެއްވެސް މުއާމަލާތެއް ކުރެވިފައެއް ނުވޭ. އަދި ބޯޓު އޮތް ތަނެއް ވެސް މިހާތަނަށް އެނގިފައެއް ނުވޭ،" ސާޗް އެންޑް ރެސްކިއު އެޖެންސީގެ ބަޔާނުގައިވެ އެވެ.
ބޯޓު ހޯދުމުގެ މަސައްކަތް ސަލާމަތީ ހިދުމަތްތަކުން މިހާރު ފަށާފައިވާއިރު، ބޯޓާ އެންމެ ފަހުން ގުޅުނު ސަރަހައްދަށް ރެސްކިއު ޓީމުތައް މިހާރު ދަތުރުކުރަމުންދާ ކަމަށް އެ އެޖެންސީން އިތުރަށް ބުނެފައިވެ އެވެ.
ގާތްގަނޑަކަށް 17،000 ރަށް ހިމެނޭ ޖަޒީރާ ގައުމެއްގެ ގޮތުގައި އޮތް އިންޑޮނޭޝިއާގައި، އެއް ރަށުން އަނެއް ރަށަށް ދަތުރުފަތުރު ކުރުމަށް އެންމެ ބޮޑަށް ބަރޯސާވަނީ ފެރީގެ ހިދުމަތަށެވެ. އެއީ ވައިގެ މަގުން ދަތުރުކުރުމަށް ވުރެ ކަނޑުމަގުން ދަތުރުކުރުމުގެ އަގު ހެޔޮވެފައި، ފަސޭހައިން މި ހިދުމަތް ލިބެން ހުންނާތީ އެވެ.
ނަމަވެސް، އިންޑޮނޭޝިއާގައި ދަތުރުފަތުރުގެ ސަލާމަތީ މިންގަނޑުތައް އެންމެ ފުރިހަމައަށް ތަންފީޒު ނުކުރެވޭތީ، ކަނޑުމަތީގެ ނުރައްކާތެރި ހާދިސާތައް ހިނގާ ނިސްބަތް އެ ގައުމުގައި ނިސްބަތުން އިތުރެވެ.
