ބޭންކް އޮފް މޯލްޑިވްސް އިން އިއްޔެ ސޯޝަލް މީޑިއާތަކުގައި ކުރި ޕޯސްޓުތަކެއްގައި ބުނެފައި ވަނީ، އަލަށް ހުޅުވާ އެކައުންޓުތަކާއި ފައިނޭންސިންގެ ހިދުމަތްތައް އެ ބޭންކުން ދެން ދޫކުރާނީ "ހަމައެކަނި" އިސްލާމީ ޝަރީއާގެ އުސޫލުން ކަމަށެވެ.
"މިއަދުން ފެށިގެން އާންމު ފަރުދުންނަށް ތިރީގައިވާ ހިދުމަތްތައް ހަމައެކަނި ދެމުންދާނީ ޝަރީއާގެ ހަމަތަކާ އެއްގޮތަށް؛ އަލަށް ހުޅުވާ އެކައުންޓު، ފައިނޭންސިން ހިދުމަތްތައް،" އެ ޕޯސްޓުގައި ބުނެފައިވެ އެވެ.
ބީއެމްއެލްގެ ޕޯސްޓާއެކު ހިއްސާކޮށްފައިވާ އެ ބޭންކުގެ ވެބްސައިޓު ލިންކުގައި އިއްޔެގެ ނިންމުމުގެ ވާހަކަ ތަފްސީލުކޮށްދީފައިވެ އެވެ. ނަމަވެސް އޭގައި ބުނެފައިވާ ގޮތުން، އަލަށް ހުޅުވާ އެކައުންޓާއި ފައިނޭންސިންގެ ހިދުމަތް ޝަރީއާ ކޮމްޕްލަޔަންޓް ނޫން ގޮތަށް ވެސް ނެގެ އެވެ.
"ފަރުދުން އަލަށް ހުޅުވާ އެކައުންޓްތަކާއި ޕާސަނަލް ފައިނޭންސް ހިދުމަތްތައް އިސްލާމިކް އުސޫލުން ފޯރުކޮށް ދިނުމަށް ހަމަޖެހިފައިވާއިރު، ކަސްޓަމަރަކު ބޭނުންވެއްޖެ ހާލަތެއްގައި ބޭންކުން ކޮންވެންޝަނަލް ބޭންކިންގ ހިދުމަތް އެ ކަސްޓަމަރަކަށް ލިބޭނެ ގޮތް ހަމަޖައްސައިދޭނެ،" ބީއެމްއެލްގެ ވެބްސައިޓުގައި ބުނެފައިވެ އެވެ.
އެހެންކަމުން، އަލަށް ހުޅުވާ އެކައުންޓުގެ ހިދުމަތާއި ފައިނޭންސިން ނުވަތަ ލޯނުގެ ހިދުމަތްތައް "ހަމައެކަނި ދެމުންދާނީ" ޝަރީއާގެ ހަމަތަކާ އެއްގޮތަށް ކަމަށް ބީއެމްއެލް އިން ސޯޝަލް މީޑިއާގައި ކުރި ޕޯސްޓަކީ ހަގީގަތާ ހިލާފު ވާހަކައެކެވެ.
ރައީސް މުހައްމަދު މުއިއްޒު ވެރިކަމަށް ވަޑައިގަތުމަށްފަހު އެމަނިކުފާނު ވަނީ ބީއެމްއެލްގެ ކޮންޓްރޯލް ހޯއްދަވައިފަ އެވެ. އޭގެ ފަހުން ބޭންކު ހިންގަމުންދަނީ ސިޔާސީ ވިސްނުމެއްގައި ކަމަށް ވަރަށް ގިނަ މާހިރުން ދަނީ ބުނަމުންނެވެ.
އާންމުންނަށް ދޫކުރާ ޑޮލަރު ލިމިޓު ހަނި ކުރަން ބީއެމްއެލް އިން 2024 ވަނަ އަހަރު ނިންމުމުން މުއިއްޒު ވަނީ ބޭންކުން ބަގާވާތެއް ކުރަން އުޅުނު ކަމަށް ބުނެ އެ މައްސަލަ ތަހުގީގު ކުރަން ފުލުހުންނަށް އަމުރުކޮށްފަ އެވެ. އަދި ބޭންކުގެ ނިންމުން ވަގުތުން ބަދަލު ކުރަން މަރުކަޒީ ބޭންކުން ވަނީ މަޖުބޫރުކޮށްފަ އެވެ.
ނަމަވެސް މިހާރު ބީއެމްއެލް އިން ވަނީ އެކި ނަންނަމުގައި ޑޮލަރު ލިމިޓުތަކެއް ކަނޑައަޅައިފަ އެވެ. އަދި މިހާރު، ޑޮލަރު ލިމިޓު ބޭނުން ކުރަން ވެސް ވަނީ ވަރަށް ބޮޑަށް ދަތިކޮށްފަ އެވެ.
