ބޭންކް އޮފް މޯލްޑިވްސް (ބީއެމްއެލް) އިން އަލަށް ތައާރަފުކުރި "އިސްލާމިކް ފައިނޭންސް ފަސްޓް ޕޮލިސީ" ގެ ދަށުން، މިއަދުން ފެށިގެން އަލަށް ހުޅުވާ ހުރިހާ އެކައުންޓުތަކާއި ދޫކުރާ ޕާސަނަލް ލޯނުތައް އިސްލާމިކް ބޭންކިންގެ އުސޫލުން ދޭން ނިންމައިފި އެވެ.
ބީއެމްއެލް އިން ހާމަކުރި ގޮތުގައި، މި އާ ސިޔާސަތުގެ ދަށުން މިހާރު ހުޅުވާފައިވާ އެކައުންޓުތަކާއި ނަގާފައިވާ ލޯނުތައް ވެސް ޝަރުއީ ހަމަތަކާ އެއްގޮތް ހިދުމަތްތަކަށް ފަސޭހައިން ބަދަލުކުރެވޭނެ އިންތިޒާމު ވަނީ ހަމަޖެހިފަ އެވެ.
މިހެން ނަމަވެސް، އެއްވެސް ކަސްޓަމަރަކު ބޭނުންވެއްޖެ ހާލަތެއްގައި އާންމު ބޭންކިން ނުވަތަ ކޮންވެންޝަނަލް ބޭންކިންގެ ހިދުމަތް ލިބޭނެ މަގު ވެސް ހުޅުވިފައި އޮތް ކަމަށް ބޭންކުން ބުންޏެވެ.
މި ބަދަލާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، މިއީ ރާއްޖޭގެ ބޭންކިން ދާއިރާގެ މުސްތަގުބަލު ބައްޓަން ކުރުމަށް އެޅުނު ވަރަށް މުހިންމު ފިޔަވަޅެއް ކަމަށެވެ. އަދި ބޭންކުގެ މަގްސަދަކީ ކަސްޓަމަރުންނަށް ޝަރުއީ ހަމަތަކަށް ފެތޭ ފުރިހަމަ މާލީ ހިދުމަތްތައް ފޯރުކޮށްދީ، މުޖުތަމައުގެ ބަދަލުވަމުންދާ ބޭނުންތަކާ އެއްގޮތަށް ހިދުމަތްތަކަށް ބަދަލު ގެނައުން ކަމަށް އޭނާ ވިދާޅުވި އެވެ.
ޝަރީފް އިތުރަށް ވިދާޅުވީ 2015 ވަނަ އަހަރު ބީއެމްއެލް އިން އިސްލާމިކް ބޭންކިން ތައާރަފުކުރި ފަހުން ވޭތުވެދިޔަ 10 އަހަރުގެ ތެރޭގައި އެ ހިދުމަތްތަކަށް އާންމުންގެ ބޮޑު ތަރުހީބެއް ލިބިފައިވާ ކަމަށެވެ.
ބީއެމްއެލްއިން ބުނި ގޮތުގައި އިސްލާމިކް ފައިނޭންސް ފަސްޓް ޕޮލިސީގެ ދަށުން މިދިޔަ އަހަރުގެ ތެރޭގައި އަތޮޅުތެރޭގެ ހުރިހާ ބްރާންޗުތަކެއް ވަނީ އިސްލާމިކް ބޭންކިން ބްރާންޗުތަކަށް ބަދަލުކޮށްފަ އެވެ. މިހާރު އެ ބްރާންޗުތަކުން ހިދުމަތް ދެމުން އަންނަނީ އިސްލާމިކް ބޭންކިން ހިދުމަތްތަކަށް އިސްކަންދީގެންނެވެ.
ބީއެމްއެލް އިމް ފޯރުކޮށްދޭ އިސްލާމިކް ބޭންކިން ހިދުމަތްތަކުގެ ތެރޭގައި ޝަރީއާ ހަމަތަކަށް ފެތޭ އެކައުންޓްތަކާއި، ކާޑުތަކުގެ އިތުރުން ތަފާތު ފައިނޭންސިން ހިދުމަތްތައް ހިމެނެ އެވެ.
އާންމުންގެ ބޭންކިން ހިދުމަތްތައް އިސްލާމިކް އުސޫލަށް ބަދަލުކުރުމަކީ ރާއްޖޭގައި އިސްލާމިކް ބޭންކިން ފުޅާކުރުމަށް ބީއެމްއެލް އިން ދޭ އަހަންމިއްޔަތު ހާމަކޮށްދޭ ކަމެއް ކަމަށް އެ ބޭންކުން ވަނީ ބުނެފަ އެވެ.
ބީއެމްއެލް އިން މި ބަދަލުތައް ގެނެސްފައި މި ވަނީ ރާއްޖެ އިސްލާމްވިތާ 900 އަހަރު ފުރުނު މުނާސަބަތާ ދިމާކޮށެވެ.
