އާމްދަނީން ޓެކްސް ނުވަތަ އިންކަމް ޓެކްސް ދައްކަން ޖެހޭ މިންވަރު ކަމުގައިވާ މަހެއްގެ މައްޗަށް 60،000ރ. އަށް ވުރެ ބޮޑު އާމްދަނީއެއް ލިބޭ 60،000 އަށް ވުރެ ގިނަ މީހުން އެބަތިބި ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ތަފާސްހިސާބުތަކުން ދައްކައިފި އެވެ.
މީރާގެ މިދިޔަ އަހަރުގެ އަހަރީ ރިޕޯޓުގައިވާ ގޮތުން އެ އަހަރު ނިމުނުއިރު އިންކަމް ޓެކްސް ދައްކަން 86,637 ޓެކްސްޕެޔަރުން ރަޖިސްޓްރީކޮށްފައިވެ އެވެ. މީގެ ތެރެއިން 60،489 އަށް މީހުންނަކީ ވަކިވަކި ފަރުދުންނެވެ.
އިންކަމް ޓެކްސް ދައްކަން ރަޖިސްޓްރީކޮށްފައިވާ މީހުންގެ ތެރެއިން ގިނަ މީހުންނަކީ އަމިއްލަ ވިޔަފާރިކޮށްގެން ބޮޑު އާމްދަނީއެއް ހޯދާ މީހުންނެވެ. ނަންބަރުތަކުން ދައްކާ ގޮތުގައި ވަޒީފާ އަދާކޮށްގެން ލިބޭ މުސާރައިން ޓެކްސް ދައްކަނީ 23،098 މީހުންނެވެ. ބާކީ ތިބި އެންމެންނަކީ ވިޔަފާރިކޮށްގެން ބޮޑު އާމްދަނީއެއް ލިބޭތީ ޓެކްސް ދައްކާ މީހުންނެވެ.
މިދިޔަ އަހަރު އަމިއްލަ ފަރުދުންގެ (އިންޑިވިޖުއަލް) އިންކަމް ޓެކްސްގެ ގޮތުގައި 172 މިލިއަން ރުފިޔާ ދައުލަތަށް ލިބުނެވެ. މިއީ މި ޓެކްސް ނަގަން ފެށި 2020 ވަނަ އަހަރާ އަޅާބަލާއިރު، ވަރަށް ބޮޑު އިތުރުވުމެކެވެ. އެ އަހަރު ލިބުނީ 41 މިލިއަން ރުފިޔާ އެވެ. އެހެންކަމުން ތިން އަހަރު ތެރޭގައި މި އަދަދު ވަނީ ތިން ގުނައަށް ވުރެ އިތުރުވެފަ އެވެ.
އިންކަމް ޓެކްސް ދައްކާ މީހުންގެ ތެރޭގައި އެންމެ ގިނައީ އަމިއްލަ ފަރުދުން ކަމަށް ވިޔަސް، ދައުލަތަށް ލިބޭ ޖުމްލަ ފައިސާގެ ތެރެއިން އެންމެ ކުޑަ އިންސައްތައެއް ހިއްސާ ކުރަނީ މި ފަރާތްތަކުންނެވެ. މިދިޔަ އަހަރު އިންކަމް ޓެކްސްގެ ހުރިހާ ދާއިރާއަކުން 5.2 ބިލިއަން ރުފިޔާ ލިބުނު އިރު، އަމިއްލަ ފަރުދުންގެ އަތުން ލިބުނީ އެންމެ ތިނެއް ޕަސެންޓެވެ.
މި ވަރުގެ އާމްދަނީއެއް ލިބޭ މީހުންނަށް އާސަންދައިގެ ފުލް ކަވަރޭޖު ދިނުން ހުއްޓާލަން ސަރުކާރުން މިހާރު ވަނީ ނިންމާފަ އެވެ.
ރައީސް މުހައްމަދު މުއިއްޒު އިއުލާންކުރައްވާފައިވާ ގޮތުގައި، އަންނަ އޮކްޓޫބަރު މަހުން ފެށިގެން އިންކަމް ޓެކްސް ދައްކާ ވަރަށް އާމްދަނީ ލިބޭ މީހުންނަށް އާސަންދަ ލިބޭނީ ކޯޕޭ ނުވަތަ ޕްރީ ޕޭ ނިޒާމެއްގެ ތެރެއިންނެވެ. މި ބަދަލާއެކީ، މުއިއްޒު ވިދާޅުވީ، އަންނަ އަހަރު 287 މިލިއަން ރުފިޔާ ދައުލަތަށް ސަލާމަތް ކުރެވޭނެ ކަމަށެވެ. އަދި، އެ ފައިސާ ހަރަދު ކުރާނީ ރައްޔިތުންގެ އެހެން ބޭނުންތަކަށް ކަމަށް މުއިއްޒު ވިދާޅުވި އެވެ.
އާސަންދައިގެ ބަދަލުތައް އިއުލާންކުރެއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ މުއްސަނދިންނާއި އިންކަމް ޓެކްސް ދައްކާ މީހުންނަށް އާސަންދަ ލިބެން ނުޖެހޭ ކަމަށެވެ. އަދި މި ގޮތަށް މުއްސަނދިންނަށް އާސަންދަ ކަވަރޭޖެއް ދިނުމަކީ ރަނގަޅު ގޮތެއް ނޫން ކަމަށް ފަންނީ މީހުން ވެސް ގަބޫލުކުރާ ކަމަށް އެމަނިކުފާނު ވިދާޅުވި އެވެ.
އާސަންދަ ނިޒާމަށް މި ބަދަލުތައް ގެންނަނީ އާސަންދައަށް ކުރާ ހަރަދުތައް ކުޑަކުރަން ކުރާ މަސައްކަތުގެ ތެރެއިންނެވެ.
ފާއިތުވި ހަ އަހަރުގެ ތަފާސްހިސާބުތަކަށް ބަލާއިރު، ކޮންމެ އަހަރަކު ވެސް ބަޖެޓު ކުރާ ވަރަށް ވުރެ އިތުރަށް އާސަންދައަށް ހަރަދު ކުރެ އެވެ. މިކަމަށް އަވަސް ފިޔަވަޅެއް ނާޅައިފި ނަމަ އާސަންދަ ސްކީމް ދެމެހެއްޓުމަށް ދަތިވާނެ ކަމަށް އޮޑިޓް ރިޕޯޓުގައި ވަނީ ބުނެފަ އެވެ.
