ނުރައްކާތެރި ހާލަތެއްގައި އޮތް ބޮޑު ބަލްކު ކެރިއާއެއް މާލެ އަތޮޅުގެ އިރުމަތީ ފަރާތުން ބޭރު ކަނޑުގައި އުޅޭތާ ދެ މަހަށް ވުރެ ގިނަ ދުވަސްވެއްޖެ އެވެ.
މެރިޓައިމް ޓްރެފިކް ވެބްސައިޓުން ދައްކާ ގޮތުގައި ގާތްގަނޑަކަށް 1,000 ފޫޓު ދިގު "ޔުރޭނަސް 1" ހުޅަނގު އެފްރިކާގައި އޮންނަ ގިނީގެ ބޮފާ އަންޗު ބަނދަރުން ފުރީ ޖޫން 14 ވަނަ ދުވަހު އެވެ. އަދި ރާއްޖެއާ ކައިރިއަށް އައީ ޖުލައި 23 ވަނަ ދުވަހު އެވެ.
"އެ ބޯޓުގައި ހުރީ އެލްމިނިއަމް އުފެއްދުމަށް ބޭނުންކުރާ މައުދަނެއް. ބޯޓުން ތިރީހަކަށް ފޫޓުގެ ދިގު ސަރަހައްދެއް އޮތީ ނައްޓައިގެން ގޮސް. އެހެންވެ، ދުއްވުނަސް މާލެ ބަނދަރު ކުރަން އެދުނީ. ނަމަވެސް ހުއްދަ އަދި ނުދޭ،" މައުލޫމާތު އެނގޭ މަސްދަރަކުން ބުންޏެވެ.
އޮގަސްޓު މަހުގެ ތެރޭގައި އެ ބޯޓު މާލޭގެ އިރުމަތިން ބޭރު ކަނޑުގައި އޮއްވައި އަދަދުގެ ނޫސްވެރިންނަށް ވެސް ފެނިފައިވެ އެވެ.
"އެ ބޯޓު އެ އޮންނަނީ އެގޮތަށް ދުއްވާލަ ދުއްވާލާ، ބައެއް ފަހަރަށް ރާއްޖޭގެ ކަނޑުގެ ސަރަހައްދަށް ވެސް ވަދޭ. އެހެންވެ ނޯޓިސް ވެސް ދީފައިވޭ."
މި ބޯޓުގެ ތެޔޮ ހުސްވެގެން ދާދި ފަހުން ލަންކާއިން ބޯޓެއް ގެނެސްގެން ތެޔޮ ވެސް ބަރުކޮށްފައިވާ ކަމަށް އަދަދު ނޫހާ ވާހަކަ ދެއްކި މީހާ ބުންޏެވެ.
އޭނާ ބުނި ގޮތުގައި ބޯޓުގައި ހުރި މައުދަން ކަނޑުގެ ސަރަހައްދަށް އެޅިއްޖެ ނަމަ އޮޔާއި ވައި ހުންނަ ގޮތަކުން ރާއްޖޭގެ ކަނޑުތަކަށާއި ފަޅުތަކާއި ރަށްތަކަށް ގެއްލުން ލިބުމުގެ ބިރު އެބަ އޮތް ކަމަށް ވެސް އޭނާ ބުންޏެވެ.
މިދިޔަ އޭޕްރީލް މަހު އެފްރިކާއިން ފުރައިގެން އައި ދެ ބޯޓު މާލޭ ސަރަހައްދަށް ވަގަށް ވަދެ ބަނދަރުކޮށްފައި އޮތްއިރު، ސިފައިންނާއި ފުލުހުން، އަދި ކަސްޓަމަށް ވެސް އެނގުނީ އޭގެ ހަފުތާއެއްގެ ފަހުންނެވެ.
މިދިޔަ ބުރާސްފަތި ދުވަހު މާލޭ ސަރަހައްދަށް ވައިގަދަވެ، އެ ދެ ބޯޓު އަޅާފައި އޮތް ނަގިލި ކަހާލައިގެން ގޮސް މާލޭ ތޮށިގަނޑަށާއި ސިނަމާލެ ބުރިޖަށް އުރުނެވެ. އެއަށް ފަހު އޮޔާދަމުން ގޮސް މިހާރު އެ ދެ އުޅަނދު އަޑިއަށް ގޮސްފައިވާ ކަމަށް އެމްއެންޑީއެފުން ބުންޏެވެ.
