މި މަހުގެ 15 އިން 18 އަށް ސޯޝަލް ސެންޓަރުގައި ބާއްވާ ޕީއެންސީގެ ކޮންގްރެސްގައި އިންތިހާބުކުރާ މަގާމުތަކަށް މީހުން ހޮވަނީ މޯބައިލް އެޕްލިކޭޝަނެއް މެދުވެރިކޮށް ވޯޓުލައިގެން ކަމަށް ބައެއް ކެންޑިޑޭޓުން ބުންޏެވެ.
ޕީއެންސީގެ ނައިބު ރައީސްގެ މަގާމާއި އެހެން ބައެއް މަގާމުތަކަށް ހޮވަންޖެހޭ މީހުންނަށްވުރެ ގިނަ ބަޔަކު ވާދަކޮށްފައިވާއިރު، އެޕެއް ބޭނުންކޮށްގެން ވޯޓުލުން ކުރިއަށްދާނެ ގޮތަކާ މެދު ބައެއް ކެންޑިޑޭޓުން ވަނީ ކަންބޮޑުވުން ފާޅުކޮށްފަ އެވެ.
އަދަދު އާ ވާހަކަ ދެއްކި ބައެއް ކެންޑިޑޭޓުން ބުނީ އެޕްލިކޭޝަނެއް މެދުވެރިކޮށް ވޯޓުލާން ނިންމީ ގިނަ ބަޔަކު ބައިވެރިވާ މި ކޮންގްރެސްގައި އަތް އުފުލައިގެން ވޯޓުލުން ކުރިއަށް ގެންދިޔުމަށް އުނދަގޫތަކެއް ހުރުމުން ކަމަށެވެ.
ޕީއެންސީގެ އެތެރޭގައި ކުރިން ބޭއްވި އިންތިހާބުތަކުގައި ލީޑަޝިޕުން ބޭނުންވާ މީހުން ހޮވާފައިވާތީ، މިފަހަރުގެ އެޕްލިކޭޝަނެއް މެދުވެރިކޮށް ވޯޓުލައިގެން ނަތީޖާ ރަނގަޅަށް ނުކުމެދާނެ ކަމާމެދު ޝައްކު އުފެދޭ ކަމަށް ވާހަކަ ދެއްކި މީހުން ބުންޏެވެ.
"އެންމެ ރަނގަޅު ގޮތަކީ ވޯޓު ކަރުދާސްކޮޅު. ނަމަވެސް ލީޑަޝިޕުން ބޭނުމެއް ނުވާނެ ވޯޓުލުން އެގޮތަށް ބަދަލުކުރާކަށް،" ވާހަކަ ދެއްކި އެކަކު ބުންޏެވެ.
ޕީއެންސީގެ އަސާސީ ގަވާއިދުގައި ބުނެފައި ވަނީ މަތީ މަޖިލީހުގައި ކަންކަން ފާސްކުރުމަށް ވޯޓުދޭނީ އަތް އުފުލައިގެން ކަމަށާއި، މެންބަރުން އިންތިހާބުކުރުމަށް ނެގޭނީ ހާމަ ވޯޓެއް ކަމަށެވެ.
