ބުރު ސްޕޯޓްސް ކްލަބް 1-0 އިން ބަލިކޮށް، ހއ. ދިއްދޫ ފުޓްބޯޅަ ޓީމުން ދިވެހި ޕްރިމިއާ ލީގުގައި ތާރީހީ މޮޅެއް ހޯދައިފި އެވެ.
ބުރަކީ މިދިޔަ ސީޒަނުގައި ދިވެހި ޕްރިމިއާ ލީގުގެ ގަދަ ހަތަރެއްގައި ނިންމި ޓީމެއް ނަމަވެސް، އެ ޓީމު އަތުން، ދިއްދޫން މި ވަނީ ތާރީހީ ކާމިޔާބެއް ހޯދައިފަ އެވެ.
މިއީ، ނޯތު ރީޖަން ލީގުގެ ޗެމްޕިއަންކަން ހޯދައިގެން، ރާއްޖޭގެ ފުރަތަމަ ޑިވިޝަނުން ފުރުސަތު ހޯދައި، ދިވެހި ޕްރިމިއާ ލީގުގައި ދިއްދޫން ކުޅުނު ފުރަތަމަ މެޗެވެ. ދިހަ ޓީމު ވާދަކުރާ ދިވެހި ޕްރިމިއާ ލީގުގައި މި ފަހަރު މުޅިން އަލަށް ތިން ޓީމެއް ވާދަކުރެ އެެވެ. އެއީ، ސައުތު ރީޖަން ލީގުގެ ޗެމްޕިއަން، ގދ. ގައްދޫ ފުޓްބޯޅަ ޓީމާއި، މާލެ ރީޖަން ލީގުގެ (ކުރީގެ ދެ ވަނަ ޑިވިޝަން ފުޓްބޯޅަ މުބާރާތުގެ) ޗެމްޕިއަން، ބިސް ބުރު ސްޕޯޓްސް އެވެ. މި ތިން ޓީމުން ވެސް ދިވެހި ޕްރިމިއާ ލީގުގެ ޖާގަ ހޯދީ، ކޮލިފައިން ބުރެއް ކުޅެގެންނެވެ.
ގައްދޫ އާއި ބިސް ބުރު މިއަދު ކުޅުނު މެޗުތަކުން ބަލިވި ނަމަވެސް، ދިއްދޫ މި ވަނީ މޮޅުވެފަަ އެވެ. އަދި، ހޯމް އެންޑް އަވޭ ފޯމެޓްގައި ކުޅޭ ލީގެއްގައި، މޮޅުވި ރާއްޖޭގެ ފުރަތަމަ ރަށެއްގެ ޓީމުގެ ޝަރަފް ހޯދައިފަ އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން ބުރު ފެނުނީ ވަރަށް ފޯމުގައި ކުޅެލިތަނެެވެ. އެ ގޮތުން، އެ ޓީމުގެ އަބްދުﷲ ޔާމީން (ޔާން) ފޮނުވާލި ބޯޅައެއް ދިއްދޫގެ ކީޕަރު، މުހައްމަދު ޝިފާން މަތަކުރިިއިރު، ބުރުގެ ކެޕްޓަން، އަލީ ހަމްދާން (އައްޔަ) ފޮނުވާލި ޝޮޓެއް ވަނީ ގޯލުގެ ދަނޑި އަށް އަމާޒުވެފަ އެވެ.
ދިއްދޫން މަޑުމަޑުން މެޗުގެ ތެރެއަށް އައިސް، މެޗުގެ 24 ވަނަ މިނިޓްގައި ލީޑުނެގި އެވެ. މިއީ، ހާފުގެ މެދެއްހާ ހިސާބުން ލިބުނު ހިލޭ ޖެހުމަކުން، ދިއްދޫ ޓީމުގެ ފޯވާޑް ގާނާގެ ގިޑިއެން ޓެޓޭ އެވެ. އޭނާ ފޮނުވާލި ބޯޅަ ގޯލަށް ވަނީ ބުރުގެ ކީޕަރު، ހަސަން އަލީފް އިބްރާހިމް އަތްދަށުން ގޮހެވެ.
ލީޑުނެގުމަށް ފަހު އިތުބާރާ އެކު ކުޅެން ފެށި ދިއްދޫ އަށް ލީޑުފުޅާކުރަން ވެސް ފުރުސަތު ލިބުނެވެ. އެ ގޮތުން، ޓެޓޭ ފޮނުވާލި ޝޮޓެއް ކީޕަރު، އަލީފް އަތުގައި ޖެހިފައި ރީބައުންސަށް ނުކުތް ވަގުތު މުހައްމަދު ޝަނާއު ނަސީރު، އެ ބޯޅަ ފޮނުވާލި ނަމަވެސް ދިޔައީ ބޭރުންނެވެ.
ފުރަަތަމަ ހާފުގައި ބުރަށް ނަތީޖާ ހަމަހަމަ ކޮށްދޭން އެ ޓީމުގެ އާޖެންޓީނާ ފޯވާޑް، ޖުއާން އެޑުއާޑޯ ލެސްކާނޯ އަށް ގޯލު ކުރިމަތިން ހުސްކޮށް ލިބުނު ފުރުސަތުގައި ދެ ފަހަރު ގޯލަށް ޖަހަން ލިބުނު ނަމަވެސް ރަނގަޅަށް ފޮނުވާނުލެވި، ދިއްދޫގެ ޑިފެންޑަރުން އެ ބޯޅަ ސަލާމަތްކުރި އެެވެ.
ދެ ވަނަ ހާފު ފަށައިގެން ދެ މިނިޓް ތެރޭ ދިއްދޫން ދެ ވަަނަ ލަނޑު ޖެހުމާ ގާތަށް ޖެހިލި އެވެ. އެ ގޮތުން، އޭރިއާބޭރުން، ގާނާގެ މިޑްފީލްޑަރު، ޔޫސުފް އަފުލް ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ. އަދި، މެޗުގެ 50 ވަނަ މިނިޓްގައި ހިލޭ ޖެހުމަކުން ބުރުގެ ފޯވާޑް އެޑުއާޑޯ ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ.
ބޯ ވިއްސާރައިގެ ތެރޭގައި މެޗުގެ ބޮޑުބައި ކުޅުނުއިރު، 66 ވަނަ މިނިޓްގައި ބުރުގެ ޔާނު ހިލޭ ޖެހުމަކުން ފޮނުވާލި ބޯޅައެއް ކީޕަރު ޝިފާން ވަނީ މަތަކޮށްފަ އެވެ. އޭގެ މިނިޓެއް ފަހުން، ދިއްދޫގެ ޓޭޓޭ ބޮލުން ފޮނާލި ހަމަލާއެއް ކީޕަރު އަލީފް ވަނީ ހުއްޓުވައިފަ އެވެ.
މެޗުގެ 70 ވަނަ މިނިޓްގައި ކައުންޓަ އެޓޭކުގައި ބުރުގެ މުހައްމަދު ތަޝްމީން (ތައްތި) އަށް ރަނުގެ ފުރުސަތެއް ލިބުނެވެ. ޓެޓޭ ހުސްކޮށްލާފައި ދިން ބޯޅައެއް ކޮންޓްރޯލް ކުރުމަށް ފަހު، ތައްތި ޖެހި ޝޮޓް ދިޔައީ ބޭރުންނެވެ. އަދި، އޭގެ މިނިޓެއް ފަހުން، ބުރުގެ އަބްދުﷲ އަރީން އިބްރާހިމް ފޮނުވާލި ބޯޅައެއް ދިޔައީ ކީޕަރު ޝިފާން އަތުގައި ޖެހިފައި ބޭރަށެވެ.
ބުރުން މެޗު ނިންމާލީ ކުޅުންތެރިއަކު މަދުކޮށެވެ. އެއީ، ދިއްދޫގެ ހުސެއިން ޒިމްޔާން އަށް ކުރި ފައުލަކަށް ބުރުގެ ޝަމްވީލް މުހައްމަދު (ބޮންޑާ) އަށް ރަތެއް ދެއްކުމުންނެވެ.
މި ސީޒަނުގަައި ބުރުއާ ހަވާލުވި ސްޕެއިނުގެ ކްރިސްޓިއަން ރޮޑްރިގޭޒްގެ އިރުޝާދުގެ ދަށުން އެ ޓީމު ކުޅުނު ހަތަރު މެޗުން ވެސް މި ވަނީ ބަލިވެފަ އެވެ. މީގެ ކުރިން، ކަޕް ވިނާސް ކަޕް ތިން މެޗުން ވެސް އެ ޓީމު ވީ ބައްޔެވެ.
