ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ބިސް ބުރު ސްޕޯޓްސް ކްލަބް އަތުން 3-1 އިން ކްލަބް އީގަލްސް އިން އުނދަގޫ މޮޅެއް ހޯދައިފި އެވެ.
މިއީ، މާލެ ރީޖަންގެ (ދެ ވަނަ ޑިވިޝަން ފުޓްބޯޅަ މުބާރާތުގެ) ޗެމްޕިއަންކަން ހޯދައި، ފުރަތަމަ ޑިވިޝަނަށް އަލަށް ޕްރޮމޯޓްވި ބިސް ބުރުން، ޕްރިމިއާ ލީގުގައި ކުޅުނު ފުރަތަމަ މެޗެވެ. އެ ޓީމުގެ ކޯޗަކަށް ހަމަޖަައްސާފައިވާ، އަހުމަދު ނާޝިދު (ނާދު)، މި ވަގުތު ޓީމާ އެކު ނެތެވެ. ބިސް ބުރުން މި މެޗުގައި ކުޅުނީ ގައުމީ ޓީމުގެ ނޫކުލައިގެ ކިޓެއްގަ އެވެ. އެއީ، އެ ޓީމު މި މެޗުގައި ބޭނުންކުރަން އޮތް ޖޯޒީ އާއި އީގަލްސް އިން ކުޅޭ ޖޯޒީއާ ގުޅޭ ކުލައެއް ކަމަށްވާތީ އެވެ.
ގަލޮޅު ދަނޑުގައި މިއަދު ކުޅުނު މެޗުގެ ފުރަތަމަ ހާފުގައި އީގަލްސް އިން ވަނީ ދެ ގޯލު ޖަހައިފަ އެވެ. އެ ގޮތުން، އީގަލްސް އިން ލީޑުނެގި ލަނޑަކީ، ކުރިން ބިސް ބުރަށް ކުޅުނު މިސްރުގެ އެލް ސަޑެކް މުހައްމަދު ޖެހި ގޯލެކެެވެ. އެ ގޮތުން، ލިބުނު ބޯޅައެއް ހިފައިގެން އޭރިއާތެރެއަށް ވަދެ، އެލް ސަޑެކް ވަނީ ގޯލުގެ ކައިރީ ކަނަށް ބޯޅަ އަމާޒުކޮށްލައިފަ އެވެ.
ފުރަތަމަ ހާފުގެ ފަހުކޮޅުގައި، އީގަލްސް އިން ވަނީ ދެ ވަނަ ލަނޑެއް ޖަހައިފަ އެވެ. މި ލަނޑު ޖެހީ ޒައިން ޒަފަރު އެވެ. މިއީ، އޭރިއާތެރެއިން، މުހައްމަދު އަޖުފާން ދިން ބޯޅައަކުން ގޯލުގެ ތިރީ ކަނަށް ބޯޅަ ފޮނުވާލައިގެން ޒައިން ޖެހި ގޯލެކެވެ.
ބިސް ބުރުން ދެ ވަނަ ހާފު ފެށިގެން ކުޅުން ރަނގަޅުކޮށް 10 މިނިޓް ތެރޭ ލަނޑެއް ޖެހި އެވެ. މިއީ، ބަދަލަކަށް ކުޅެން އެރި މުހައްމަދު ޒިދާން ޖެހި ގޯލެކެވެ. އީގަލްސްގެ ކުޅުންތެރިންނަށް ހެދުނު ގޯހެއްގެ ފައިދާ ނަގައި، ޒިދާން ވަނީ ލިބުނު ފުރުސަތުގައި ގޯލުގެ ކައިރި ކަނަށް ބޯޅަ ވައްދާލައިގެން ގޯލު ޖަހައިފަ އެވެ. އެ ބޯޅަ ހުއްޓުވަން އީގަލްސް ގޯލުގައި ހުރި ޕާކިސްތާން ގައުމީ ޓީމުގެ ސާގިބް ހަނީފަށް މާ ބޮޑު ކަމެއް ނުކުރެވުނެވެ.
އީގަލްސް އިން ތިން ވަނަ ލަނޑު ޖެހީ 80 ވަނަ މިނިޓްގައި ލިބުނު ޕެނަލްޓީ އަކުންނެވެ. އީގަލްސް އަށް ލިބުނު ޕެނަލްޓީ އިސްމާއިލް އީސާ (މެސީ) ވަނީ ގޯލަށް ފޮނުވާލައިފަ އެވެ. އޭގެ ފަހުން ވެސް އީގަލްސް އަށް އިތުރު ލަނޑެއް ޖަހަން ލިބުނު ފުރުސަތުތަކުގެ ބޭނުމެއް ނުހިފުނެވެ.
