ފުރަތަމަ ފަަހަރަށް ދިވެހި ޕްރިމިއާ ލީގުގެ މެޗެއް އަތޮޅު ތެރޭގައި ކުޅުނުއިރު، ގދ. ގައްދޫ ފުޓްބޯޅަ ޓީމު އަތުން ނިއު ރޭޑިއަންޓް ސްޕޯޓްސް ކްލަބުން 2-0 އިން މޮޅުވެއްޖެ އެވެ.
ދިހަ ޓީމު ވާދަކުރާ ދިވެހި ޕްރިމިއާ ލީގުގެ ސީޒަނުގައި މި ފަހަރު ދެ ރަށެއްގެ ޓީމު ވާދަކުރެ އެވެ. އެއީ، ސައުތު ރީޖަން ލީގުގެ ޗެމްޕިއަން، ގައްދޫގެ އިތުރުން ނޯތު ރީޖަން ލީގުގެ ޗެމްޕިއަން، ހއ. ދިއްދޫ އެވެ. މި ދެ ޓީމުގެ ހޯމް މެޗުތައް އެ ރަށްރަށުގައި ކުޅޭއިރު، ގައްދޫ ފުޓްބޯޅަ ދަނޑުގައި، މިއަދު ހަވީރު ވަނީ ނިއުއާ ދެކޮޅަށް ކުޅެފަ އެވެ. މި މެޗަކީ އިއްޔެ ހަވީރަށް ފުރަތަމަ ޝެޑިއުލްކުރި މެޗެއް ނަމަވެސް، ވިއްސާރައިގެ ސަބަބުން މިއަދަށް ފަސް ކުރަން ޖެހުނީ އެވެ.
ނިއު އިން ވަނީ ގައްދޫ ކޮޅަށް ނުވަ ވަނަ މިނިޓްގައި ލީޑުނަގައިފަ އެވެ. މިއީ، އަރިމަތިން ނިއުގެ ބްރެޒިލް މިޑްފީލްޑަރު، ގޯމޭސް ޑަ ސިލްވާ ނެގި ހުރަހަކުން، ބްރެޒިލް ފޯވާޑް، ޑޮރިއެލްޓަން ގޯމޭސް (ޑޯރީ) ބޮލުން ޖެހި ގޯލެކެވެ. އޭގެ އިރުކޮޅެއް ފަހުން، ނިއުގެ ލީޑުފުޅާކުރަން އަލީ ފާސިރު (ސެންޓޭ) އަށް ލިބުނު ފުރުސަތުގައި ފޮނުވާލި ބޯޅަ ދިޔައީ ހުރަސް ދަނޑިމަތިންނެވެ.
މުހައްމަދު ނަޒީހުގެ ކޯޗުކަމުގައި ކުޅޭ ގައްދޫން 30 ވަނަ މިނިޓްގައި ނަތީޖާ ހަމަހަމަ ކުރުމާ ގާތަށް ޖެހިލި އެވެ. މިއީ، ނިއުގެ އޭރިއާ ރޮނގުކައިރިން ހިލޭ ޖެހުމަކުން ގައްދޫގެ ސާބިއާ ފޯވާޑް، އުރޯސް ޖެމޯވިޗް ފޮނުވާލި ހަމަލާއެކެވެ. އޭނާ ފޮނުވާލި ހިލޭޖެހުން، ނިއުގެ ކީޕަރު، އަހުމަދު ސަމީރު އަތުގައި ޖެހިފައި އަމާޒުވީ ހުރަސްދަނޑިއަށެވެ.
ނިއު އަށް ކުޅޭ ލައިބީރިއާގެ މިޑްފީލްޑަރު، އަބްދުﷲ ބިލިޓީ ފޮނުވާލި ބޯޅައެއް ވަނީ ދަނޑިކައިރިން ބޭރަށް ގޮސްފަ އެވެ.
ނިއު އިން ވަނީ ފުރަތަމަ ހާފުގެ އިތުރު ވަގުތުގައި ދެ ވަނަ ލަނޑު ޖަހައިފަ އެވެ. މިއީ، ވެސް ޑަ ސިލްވާ އާއި ޑޯރީގެ ކޮމްބިނޭޝަނުން އައި ގޯލެކެވެ. އެ ގޮތުން، ޑަ ސިލްވާ ނެގި ހުރަަހަކުން ޑޯރީ މި ލަނޑު ވެސް ޖެހި ބޮލުންނެވެ.
ދެ ވަނަ ހާފުގައި ނިއުގެ ކެޕްޓަން، އަލީ އަޝްފާގު (ދަގަނޑޭ)، އޭރިއާބޭރުން ފޮނުވާލި ބޯޅަ ދިޔައީ ގޯލާ ސީދާނުވެ އަރިމަތިން ބޭރުންނެވެ.
މެޗުގެ 70 ވަނަ މިނިޓްގައި ގައްދޫގެ އޭރިއާތެރެއިން ޑޯރީ އަށް ހުސްކޮށް ލިބުނު ފުރުސަތަކުން އޭނާ ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ. ޑޯރީ ވަނީ މީގެ ކުރިން ކަޕް ވިނާސް ކަޕްގެ ދެ މެޗެއްގައި ނިއު އަށް ހެޓްރިކެއް ހަދައިދީފަ އެވެ. އެއީ، އޮޑި ސްޕޯޓްސް ކްލަބާއި ބުރު ސްޕޯޓްސް ކްލަބް ކޮޅަށެވެ.
