ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅެން ހަމަޖެހިފައި އޮތް ގދ. ގައްދޫ ފުޓްބޯޅަ ޓީމާއި ނިއު ރޭޑިއަންޓް ސްޕޯޓްސް ކްލަބް ބައްދަލުކުރާ މެޗު ވިއްސާރައިގެ ސަބަބުން ފަސްކުރަން ޖެހިއްޖެ އެވެ.
ގައްދޫ ފުޓްބޯޅަ ދަނޑުގައި މިއަދު ހަވީރު 16:00 ގައި ފަށަން ތާވަލުކޮށްފައި އޮތް މެޗަކީ، ދިވެހި ޕްރިމިއާ ލީގުގެ ތާރީހީ މެޗެކެވެ. ރާއްޖޭގެ ޕްރިމިއާ ލީގު، ހޯމް އެންޑް އަވޭ ފޯމެޓަށް ކުޅެން ނިންމައި، މި ފަހަރުގެ ސީޒަނުގައި ލީގުގައި ވާދަކުރާ ގައްދޫން އަމިއްލަ ދަނޑުގައި ކުޅޭ ފުރަތަމަ މެޗު އޮތީ ނިއުއާ ދެކޮޅަށެވެ.
އެކަމަކު، ރާއްޖޭގެ ބޮޑު ބަޔަކަށް މިހާރު ކުރަމުން އަންނަ ވިއްސާރައިގައި ގައްދޫ އަށް ވެސް ވާރޭ ވެހުމާ އެކު، ދަނޑުގައި ފެންހެދިފައި އޮތުމުން، މިއަދު މެޗު ނުކުޅެވޭނެ ކަމަށް ފުޓްބޯލް އެސޯސިއޭޝަން (އެފްއޭއެމް) އިން ވަނީ ނިންމައިފަ އެވެ.
"އަދަދު ސްޕޯޓްސް" އަށް އެފްއޭއެމް އިން ބުނީ، މަސައްކަތް ކުރަމުން އަންނަނީ މާދަމާ ހަވީރު ނިއު އާއި ގައްދޫގެ މެޗު ކުޅެވޭތޯ ކަމަށެވެ. އެއީ، މި މެޗަށް ނިއު އިން ދަތުރުކޮށް، މިހާރު ގައްދޫގައި ތިބުމާ އެކު، އިތުރަށް މި މެޗު އެހެން ތާރީހަަކަށް ފަސްކޮށްފިނަމަ، ލޮޖިސްޓިކްސް ކަަންކަން ހަަމަޖެއްސުމުގައި ގޮންޖެހުންތަކެއް ދިމާވާނެތީ އެވެ.
މިދިޔަ ސީޒަނުގެ ސައުތު ރީޖަން ލީގުގެ ޗެމްޕިއަން، ގައްދޫގެ އިތުރުން ދެން، މި ފަހަރުގެ ދިވެހި ޕްރިމިއާ ލީގުގައި ވާދަކުރާ ރަށަކަށް ނިސްބަތްވާ ޓީމަކީ، ނޯތު ރީޖަން ލީގުގެ ޗެމްޕިއަން، ހއ. ދިއްދޫ އެވެ. ދެން، އަލަށް މި ފަހަރުގެ ޕްރިމިއާ ލީގުގައި ކުޅޭ ޓީމަކީ، މާލެ ރީޖަން ލީގުގެ (ދެ ވަނަ ޑިވިޝަން ފުޓްބޯޅަ މުބާރާތުގެ) ޗެމްޕިއަން، ބިސް ބުރު ސްޕޯޓްސް އެވެ.
ދެން، ޕްރިމިއާ ލީގުގައި އޮތީ ނިއު އާއި އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން، ޓީސީ ސްޕޯޓްސް ކްލަބް، އޮޑި ސްޕޯޓްސް ކްލަބް، ވިކްޓަރީ ސްޕޯޓްސް ކްލަބް، ބުރު ސްޕޯޓްސް ކްލަބް އަދި ކްލަބް އީގަލްސް އެވެ.
ދިވެހި ޕްރިމިއާ ލީގުގެ އާ ސީޒަނުގެ ފުރަތަމަ މެޗުގައި ރޭ މިދިޔަ ފަސް ސީޒަނުގެ ލީގު ޗެމްޕިއަން، މާޒިޔާ އިން ވަނީ އޮޑި އަތުން 1-0 އިން މޮޅުވެފަ އެވެ. ނިއު އާއި ގައްދޫގެ މެޗު ފަސްކޮށްފައިވާއިރު، މިރޭ ކުޅެން އޮތީ ގަލޮޅު ދަނޑުގައި ވިކްޓަރީ އާއި ޓީސީ ބައްދަލުކުރާ މެޗެވެ.
